JOBO 28

₁Ge e le silifera e ne mo e tšwago; le gauta e ne felo mo e hlatswiwago. ₂Tshipi e ntšhwa fase; mme mphiri o tologa o le leswikeng. ₃Motho o raka leswiswi, a yo fenyeka tša kua fasefase, maswika a swiswing la thiti ya lehu. ₄Ba epa moepo, ba tloga mo go agilego batho; ba lebalwa mo go la mešito; ba ilo lekelela kua go sego batho. ₅Lefase le le medišago dijo, kua teng ga lona le fetoga mme la etša mollo. ₆Matlapa a lona ke lona legae la talama; le gauta e tšwa gona moo. ₇Tsela ya gona ga e tsebje ke lenong; le leihlo la leaka ga lešo la e bona. ₈Le dibata tša lešoka ga di sware tsela yeo; le tau ga e gate moo. ₉Motho yena o iša seatla mantsweng o phekgola medu ya dithaba. ₁₀O thula mefoma mantsweng, leihlo la gagwe la bona matsaka a mehutahuta. ₁₁O thiba didiba tša lesa go dutla; gomme tše di utilwego o di tšweleletša seeding. ₁₂Ge e le bohlale bjona bo ka bonwa kae? Tlhaologanyo e agile kae? ₁₃Motho tlhago ya bohlale ga e tsebe; ga bo hwetšwe mo faseng la ba phelago. ₁₄Bodiba bo re: Mo go nna ga bo yo! Lewatle le re: Ga ke nabjo! ₁₅Ga bo rekwe ka gauta ya paala; ga bo lekanyetšwe silifera. ₁₆Le gauta ya Ofira e ka se bo lekane, le ge e ka ba pheta le talama. ₁₇Ga bo rekwe ka gauta le ka thuka; ga bo rekanywe ka dibjana tša gauta. ₁₈Pheta ya thaga le ditaemane ga di bapetšwe le bjona; theko ya bohlale e feta pheta ya lewatle. ₁₉Le lebje la Kushe le ka se bo fihlele; ga bo elwe ka gauta ya bohlokwahlokwa. ₂₀Bjale, bo tšwa kae bohlale? Tlhaloganyo e agile kae? ₂₁Bo utetšwe bohle ba phelago; bo fihletšwe le dinong tša kua godimo. ₂₂Sekoti le lehu di re: Ditsebe tša rena di kwile tumo ya bjona. ₂₃Mohlathatsela-ya-bohlale ke Modimo; ke yena a tsebago mo bo agilego gona. ₂₄Yena o bona le magomo a lefase; o šetša tšohle tša ka tlase ga leratadima. ₂₅Mola a lekanyetša phefo maatla, a abaganya meetse a lekana gohle, ₂₆mola a bea melao ya pula, a beela tladi ya modumo tsela, ₂₇ke mo a bo bonego, a bo bala a bopa, a bo beakanya; ₂₈a botša motho a re: Go boifa Mong a bohle ke bjona bohlale; go tlogela bobe ke tlhaologanyo.