JOBO 30

₁Gomme bjale ke segwa ke ba e lego bašimane, bao botatabo ke bego ke sa rate ge ba dula le mpša tša badiši ba mehlape ya ka. ₂Le gona maatla a diatla tša bona a be a nkholang mola ba feletšwe ke senna? ₃Ba gwameditšwe ke tšhego le tlala; maabane ba be ba sa phura tša lešoka le le omilego. ₄Ba sela merogo ya naga, medu ya mehlophi ke dijo tša bona, ₅Ba be ba lelekwa mo go lego batho; ba hlabelwa le mekgoši bjalo ka mahodu. ₆Ba agile melapong e šiišago, meleteng le kua maweng. ₇Ba goa ba le masoding, ba phuthegile ditlwatlweng. ₈Ke bana ba ditlatla, mahleka a batho, balelekwa nageng. ₉Gomme nna bjale bona bao ba ntira sefela, ba ntira seema sa bona. ₁₀Ba ntlhaswa mme ba nkema kgole, ke ba bona ba etshwa mare. ₁₁Ke ka gobane o ripile šika la ka mme a nkokobetša; bjale ba lahla mogala ke ba bona. ₁₂Mohuta wo o tsoga fa hleng ga ka, ba a nkgopiša; ba budušitše tsela ya go ntshenya. ₁₃Ya ka tsela ba e sentše, ba thuša go nkuša. Ba tlo hloka monamodi. ₁₄Ba tsena ka seroba se se ahlamego, ba mpoaboa thoko tšohle ka mašata. ₁₅Ke wetšwe ke tše di tšhošago; bogolo bja ka eke bo tšerwe ke ledimo; go phološwa go mphetile boka leru. ₁₆Bjale moya wa ka go nna o tšhogile; ke swerwe ke matšatši a ditlaišego. ₁₇Bošego bo mphehla mašapo, eke a a kgolwa; tše di nkokonago ga di lale. ₁₈Maatla a magolo a bohloko a onaditše kobo ya ka; mme kobjana ya ka e a ntlima. ₁₉O ntahletše, ditšhileng, ke swana le lerole le molora. ₂₀Ke a go bitša, mme ga o arabe; ge ke ema, o nape o nkgetla. ₂₁O mphetogetše yo šoro, o lwa le nna ka maatla a atla tša gago. ₂₂O nkukile wa nnametša ledimo, wa ntikološa modumong wa lona. ₂₃Ka kgonthe ke tseba gobane o nkiša lehung, ngwakong wola wa boyo bja bohle ba ba phelago. ₂₄Fela, e a wago o ntšha letsogo; e a tlaletšwego o a goeletša. ₂₅A ke be ke sa llele wa matšatši a mathata? A ke be ke sa kwele bahlaki bohloko? ₂₆Ruri, ke be ke holofetše tše di botse, gwa tla bošula; ka re ke letetše seetša, gwa tla leswiswi. ₂₇Ka teng ga ka go a bela, ga go fole; ke wetšwe ke matšatši a ditlaišego. ₂₈Ke sepela ke fifetše, e sego ka letšatši; ke ema ke lla batho ba tletše. ₂₉Ke fetogile wa gabophukubje le mogwera wa bompšhe. ₃₀Ke sola letlalo e le leso, mašapo a ka a omile ka go fiša. ₃₁Fela sa ka se fetogile sello; pina ya ka ke go lla wa bohloko.