JOELE 3

₁Tsebang gobane mehleng yeo le ka lebaka leo, ge ke tlo gomiša mathopša a Juda le Jerusalema. ₂Ke tlo botha tšhaba tšohle moeding wa tsheko ya Morena, mme ke tlo ba sekiša moo tše ba di dirilego batho ba ka le naga ya ka ya Isiraele, ge ba ba tšitlanyetša ditšhabeng, naga ya ka ba arolelana. ₃Ba fana batho ba ka ka matengwa, ba reka seotswa ka mošimanyana, sedila ba se reka ka ngwanana, ba nwa.

₄Mme lena ba Tiro le Sidone, le lena bohle ba dilete tša Bafilisita, le na le taba mang le nna? Tše le tlogo ntira di tlo napa di boela dihlogong tša lena. ₅Le nkamogile silifera ya ka le gauta ya ka; dilo tša ka tša bohlokwa le botšhepi la di iša mo nywakong ya medimo ya lena. ₆Bana ba Juda, le bana ba Jerusalema, le ba rekišitše kua Jafane, gore le ba iše kgole le magae a bona. ₇Tsebang, ke tlo ba tsoša felo fao le ba rekišeditšego gona, mme hlogong tša lena ka bušetša tše le ba dirilego tšona. ₈Barwa ba lena le barwedi ba lena ke bona ba ke tlogo ba gafela atleng tša Bajuda, ba tlo ba rekiša go ba Seba, go setšhaba se se lego kgole; gobane Morena o boletše. ₉Ba ntle ba hlabeleng mokgoši, le re: Epang dira! Le rape bagale! Go tšwe banna ka moka ba bahlabani. ₁₀Batolang megoma le dire ditšhoša, le dithipa tša lena le dire marumo; le sekoka se tle se re: Ke mogale! ₁₁Akgofang le etla, lena ditšhaba tša mathoko ohle, le kgobokaneng! -- Mme wena Morena, iša bagale bago moo. ₁₂A tšhaba di tsoge, di tle moeding wa tsheko ya Morena; ka gobane ke tlo dula moo ke ahlola bohle bantle ba mathokong. ₁₃Tsenyang thipa, mabele a budule! Tlang re fotle; bo tletše bofotlelo bja morara. Dinkgo di bile di a tšhologa; gobane mabobe a bona ke a mantši. ₁₄Seao mašaba, mašaba a moedi wa kahlolo; ka gobane le kgauswi, tšatši la Morena la kahlolo. ₁₅Tšatši le kgwedi di a fifala; le dinaledi di feletšwe ke phadimo. ₁₆Morena o bopa a le Tsione; o hlaboša lentšu a le Jerusalema; legodimo le lefase di a thothomela; mme setšhaba sa Morena se tlo hwetša tšhabelo sa sona e le Johofa, e le yena sebo sa Baisiraele. ₁₇Ke mo le tlogo tseba ge Modimo wa lena e le nna Jehofa; ke dula Tsione, thabeng a kgethwa ya ka. Mme Jerusalema e tlo ba motse o mokgethwa, wo o ka se hlwego o sepelwa ke ba šele. ₁₈Mehleng yeo dithaba di tlo tloroma mananose a morara; mme meboto e tlo ela maswi; melapong ya Juda yohle go tlo ela meetse. Gomme go tlo ba le sediba se se tšwago mo ntlong ya Morena, sa nošetša moeding wa meduhlare. ₁₉Naga ya Egipita e tlo ba ya marope; ya Edomo e tlo ba lešoka la marope; ka gobane ba dirile Juda ka sehlogo, mme nageng ya bona ba tšholla madi a se nago molato. ₂₀Mme naga ya Juda e tlo dulwa go ya go ile; Jerusalema go tlo dula melokoloko ya meloko. ₂₁Mme madi a bona, a ke bego ke sešo ka a latiša, ke tlo a lefeletša: mme Morena o tlo dula fa Tsione.