JONA 1

₁Lentšu la Morena le kile la tlela Jona morwa wa Amithai, la re: ₂Tsoga, o ye kua motseng o mogolo wa Ninife, o yo goelele o re: Dibe tša wona di fihlile pele ga ka. ₃Jona a tsoga a tšhaba a leba Tarasisi a tšhaba Morena; a fologela motseng wa Jafo, a hwetša leselawatle le le yago Tarasisi; a ntšha tšhelete ya leeto, a namela leselawatle, a re ke ya Tarasisi le batho ba lona, e le go tšhaba Morena. ₄Morena a iša phefo e kgolo lewatleng; mo lewatleng ya ba ledimo le maatla, leselawatle la nyako robega. ₅Basepediši ba lona ba boifa; bohle ba hlaboša mantšu ba bitša medimo ya bona, e mongwe a bitša wa gagwe modimo. Diphahlo tša leselawatle ba di lahlela lewatleng, e le go le imolla gore le se teke. Ge e le Jona, yena o be a fologetše phapošing ya tlase ya leselawatle, a ile le boroko.

₆Gwa tla molaodi wa leselawatle, a bolela le yena a re: O reng o robetše? Tsoga o bitše Modimo wa gago. Mohlomong ke yena Modimo e a tlogo re gopola ra se ke ra senyega.

₇Banna ba botšana ba re: Tlang re lemeng ka matengwa, re tle re hwetše e a re hloletšego kotsi ye! Ba dira matengwa, gwa swarwa Jona. ₈Ba botšiša Jona ba re: Re botše tše di re hlolelago tlalelo ye! Modiro wa gago ke eng? O tšwa kae? Ga geno ke kae? O wa setšaba se fe?

₉Yena a fetola a re: Nna ke Mohebere; nna ke boifa Jehofa Modimo wa magodimong e a dirilego lewatle le lefase. ₁₀Banna bao ba tšhoga, ba boifa gagolo; ba mmotšiša ba re: Tše o di dirilego ke eng? Ka gobane ba be ba tseba ge a tšhabile Morena, a ba boditše. ₁₁Ba mmotšiša ba re: Re go direng gore lewatle le re okobalele? Ka gobane lewatle le be le sa fela le befa le eya.

₁₂Jona a re: Nkukeng le ntahlele lewatleng, ke mo le tlogo le okobalela, gobane ke tseba ge ledimo le legolo le le le tletše ka molato wa ka.

₁₃Le ge go le bjalo banna bao ba diriša mahuduo a leselawatle gore ba le bušetše nageng, gobane lewatle le be le sa fela le befa le eya. ₁₄Ke mo ba nago ba hlaboša mantšu ba rapela Morena ba re: Joo! Morena, joo! A nke re se senyege ka bophelo bja monna yo! Mme madi a se nago molato o se a latiše go rena; ka gobane wena Morena o dira se o se ratago. ₁₅Ya ba gona ba kukago Jona, ba mo lahlela lewatleng; mme la napa la okobala la lesa go galefa. ₁₆Bjale banna bao ba boifa Morena gagolo, ba mo hlabela sedimo, ba mo enela dikeno.

₁₇Ge e le Jona, Morena o romile hlapi e kgolo ya mo metša. Jona a fetša matšatši a mararo le mašego a mararo a le mpeng ya hlapi yeo.