JOSHUA 19

₁Gwa tšwa tengwa la Simeone, la ba leloko la Basimeone ka dilete tša bona. Naga ya bona ya ba gare ga naga ya Bajuda. ₂Ba newa motse wa Bereseba, le wa Seba, le wa Molada, ya ba magae a bona. ₃Le wa Hasara-Suali, le wa Bala, le wa Atsema, ₄le wa Elitholadi, le wa Bethuli, le wa Horoma, ₅le wa Tsikilaka, le wa Bethe Marakabothe, le wa Hasara-Susa, ₆le wa Bethe-Lebaothe, le wa Saruhene. Ke metse e lesome le metšo e meraro le metsana ya yona.

₇Le wa Aine le wa Rimoni, le wa Ashani, Ke metse e mene le metsana ya yona. ₈Le metsana ka moka e dikologilego metse yeo go goma ka Balathe-Bere, e lego wona wa Rama wa thoko ya borwa. Ke yona naga ya ba leloko la Simeone ka dilete tša bona. ₉Naga ya Basimeone e mo gare ga naga ya Bajuda, ka gobane ye e aroletšwego Bajuda e be e le e kgolo e ba feta; ya ba gona Basimeone ba neilwego magae gare ga bona.

₁₀Tengwa la boraro la tšwela Basebulone ka dilete tša bona. Mollwane wa bona o tla Sarida. ₁₁O rotoga o leba bodikela wa tla Mareala, o kgotla Dabasethe, o fihla nokeng ya Jokoneama ka thoko ya bohlabela. ₁₂Ge o leba bohlabela o tloga Sarida wa yo fihla mollwaneng wa Kisilothe-Thabora, wa fetela Daberathe, wa rotogela Jafia. ₁₃O tšwa moo o leba bohlabela wa tla Gathi-Hefere le Etha-Katsini, wa tšwela Rimoni o leba Nea. ₁₄Wa o potologa ka thoko ya leboa wa tla Hanathone, wa kgotla ka moedi wa Jifithaele. ₁₅Le Kathate, le Nahalale, le Simirone, le Jedeala, le Betlehema. Ke metse e lesome le metšo e mebedi le metsana ya yona. ₁₆Ke yona naga ya Basebulone ka dilete tša bona, le metse yeo le metsana ya yona.

₁₇Tengwa la bone la tšwela Isashara, ba leloko la Isashara ka dilete tša bona. ₁₈Mollwane wa bona ke Jeseriele, le Kesulothe, le Sunema, ₁₉le Hafaraima, le Sioni, le Anaharathe, ₂₀le Rabithi, le Kisioni, le Ebetse, ₂₁le Remetha, le Enganima, le Ene-Hada, le Bethe-Patsetse. ₂₂Gomme mollwane o kgotla ka Thabora, le Sahatsima, le Bethe-Semese, wa yo fetela nokeng ya Jorodane. ₂₃Ke yona naga ya ba leloko la Isashara ka dilete tša bona, metse le metsana ya bona.

₂₄Tengwa la bohlano la tšwela ba leloko la Baasere ka dilete tša bona. ₂₅Mollwane wa bona o tla Helekathe, le Hali, le Betene, le Akisafa, ₂₆le Amaleke, le Ameada, le Misaele, o kgotla ka thaba ya Karamele ka thoko ya bodikela, le Sihoro-Libinathe; ₂₇O buša o leba Bohlabela wa ya Bethe-Dagona, o kgotla Sebulone le moedi wa Jithaele ka thoko ya leboa ya Bethe-Emeke le Negiele, o tšwela Kabulu ka thoko ya la ntšogošo, ₂₈le Eburone, le Rehobo, le Hamona, le Kana, go fihla motseng o mogolo wa Sidoni. ₂₉O fapogela Rama wa tla Tiro motseng wa sebo, wa boa wa leba Hosa wa yo kgotla ka lewatle o tlogetše la Akasiba. ₃₀Le wa Uma, le wa Afeke, le wa Rehobo, e lego metse e masome a mabedi le metšo e mebedi, metse le metsana ya yona. ₃₁Ke yona naga ya ba leloko la ba Asere ka dilete tša bona, metse le metsana ya yona.

₃₂Ba leloko la Nafutali ba tšwelwa ke tengwa la go selela ka dilete tša bona. ₃₃Mollwane wa bona o tla Helefe, le Elone, o fihla Tsaanaima, le Adami Nekebe, le Jabiniele, le Lakuma, wa felela nokeng ya Jorodane. ₃₄O leba bodikela kwa Asinothe-Thabora, o tloga ntshe o leba Hukoka, o kgotla ka la Sebulone thoko ya borwa, le ka la Asere ka thoko ya bodikela, le ka la Juda le ka noka ya Jorodane ka thoko ya bohlabela. ₃₅Metse ya dibo ke Tsidima, le Tsere, le Hamathi, le Rakathe, le Kinarethe, ₃₆le Adama, le Rama, le Hatsora, ₃₇le Kedese, le Ederei, le Ene-Hatsora, ₃₈le Jireoni, le Migidalaele, le Horema, le Bethe-Anathe, le Bethe-Semese. Ke metse e lesome le metšo e senyane le metsana ya yona. ₃₉Ke yona naga ya ba leloko la Nafutali ka dilete tša bona, metse le metsana ya bona.

₄₀Tengwa la go šupa la tšwela ba leloko la Dani, ka dilete tša bona. ₄₁Mollwane wa naga ya bona o tla Tsarea, le Esithaolo, le Iri-Semese, ₄₂le Saalabini, le Ajaloni, le Jitila, ₄₃le Elone, le Thiminatha, le Ekironi, ₄₄le Etheke, le Gibethone, le Baalathe, ₄₅le Jehudi, le Bene-Baraka, le Gathi-Rimoni, ₄₆le Majarakoni, le Rakoni, le khonu e lebago Jafo. ₄₇Naga ya Badani e be e pitlagane, ka gona Badani ba rotoga ba lwa le Lesema, ba o thopa, ba o fenya ka bogale bja marumo, ba o tšea ba dula go wona, ba o rea leina la Lesemadani ka la Dani tatabo. ₄₈Ke ona magae a ba leloko la Dani ka dilete tša bona, ke yona metse le metsana ya gona.

₄₉Ya re ge ba feditše go abaganya naga ka mellwane ya yona, Baisiraele ba nea Joshua morwa wa Nuni kabelo ya gagwe. ₅₀Ka taelo ya Morena ba mo nea motse wo a o kgopelago, e lego wa Thiminathe-Sera dithabeng tša Efuraimi. A aga motse a dula gona.

₅₁Ke ona magae ao Eleasara moperisita le Joshua morwa wa Nuni le bagolo ba meloko ya Baisiraele ba a aroletšego Baisiraele ka matengwa ba le kua Silo pele ga Morena mojako wa Ngwako wa Kgwerano. Ke mo ba feditšego go arolelana naga.