Pitšo ya bobedi ya Joshua; lehu la gagwe le la Eleasara. Go bolokwa mašapo a Josefa
1Gomme Joshua a phuthela meloko ka moka ya Isiraele motseng wa Sikeme, a bitša bagolo ba Isiraele, le balaodi ba bona, le baahlodi ba bona, ba tla ba ema pele ga Modimo. 2Joshua a bolela le setšhaba ka moka a re: Morena Modimo wa Isiraele o re: Kgaleng botataweno ba be ba dutše mošola wa noka, bo Thara tatago Aborahama le Nahoro, ba be ba direla medimo e šele. 3Ka hlaola tataweno Aborahama a le gona moo mošola wa noka, ka mo sepediša le naga ka moka ya Kanana, ka ba ka atiša bana ba gagwe ke mo neile Isaka. 4Isaka ka mo fa Jakobo le Esau. Esau ka mo fa dithaba tša Seire gore e be tša gagwe; Jakobo le bana ba gagwe ba fologela Egipita. 5Ka roma Moshe le Arone, ka otla Egipita ka mo ke dirilego mo nageng yeo, ka tsebo le ntšha moo. 6Ka ntšha botataweno Egipita, la tla lewatleng. Baegipita ba hlomarela botataweno ka dikoloi le ka banamedi ba dipitsi mo lewatleng la mahlaka. 7Ba hlabela Morena mokgoši, a le amologanya le Baegipita ka leswiswi, a bušetša lewatle godimo ga bona la ba ribegetša. Mahlo a lena a di bone tše ke di dirilego Baegipita, la fetša matšatši a mantši le dutše šokeng. 8Ka le fihliša nageng ya Baamoro ba ba bego ba agile mošola wa Jorodane; bona ba lwa le lena, ka ba gafela diatleng tša lena la tšea naga ya bona, ka ba fediša ge le fihla. 9Gwa tsoga Baraka morwa wa Tsiporo kgoši ya Moaba, a lwa le Baisiraele; a roma batseta ba bitša Bileama morwa wa Beoro gore a le roge; 10nna ka gana go kwa Bileama, a le šegofatša wa go šegofatša, ka le namolela mo atleng sa gagwe. 11La ba la sela Jorodane; banna ba Jeriko ba lwa le lena, le Baamoro, le Bapheresi, le Bakanana, le Bahethe, le Bajebusi; ka ba gafela diatleng tša lena. 12Ka roma mebu ge le fihla, ya ba raka ge go tla bolena; dikgoši tšela tše pedi tša Baamoro, e be e se lerumo la gago le ge e le bora bja gago. 13Mme ke le neile naga ye le sa kago la itapišetša yona, le metse ye le sa kago la e aga, la dula go yona, la ja morara le mohlware wo le sa kago la o šema.
14Bjalo gee, le boifeng Morena; mo hlankeleng ka tlalo le ka go mmotegela; le ile medimo ye botataweno ba bego ba e hlankela mola ba sa le mošolo wa noka le kua Egipita; le hlankeleng Morena. 15Ge le ka hwetša go hlankela Morena e se botse, gona ikgetheleng lehono yo le ratago go mo hlankela, e ka ba medimo yela ye botataweno ba e hlanketšego mola ba sa le mošola wa noka, goba e ka ba medimo ye ya Baamoro ba le dutšego mo nageng ya bona. Ge e le nna le ba lapa la ka, rena re direla Morena.
16Setšhaba sa fetola sa re: Go tlogela Morena, le go yo hlankela medimo e šele, a di be kgole le rena. 17Gobane Morena Modimo wa rena, ke yena a ntšhitšego rena le botatawešo kua nageng ya Egipita, kua ngwakong wa bohlanka; ke yena a dirilego mehlolo e megolo yela, ra e bona ka mahlo a rena; ke yena a re dišitšego leetong ka moka, re swere tsela re phatša ka gare ga ditšhaba tšela tšohle. 18Ke yena Morena e a rakilego ditšhaba tšeo tšohle ge re fihla, le Baamoro ba ba bego ba dutše mo nageng yeno; gomme rena re tlo direla Morena, ka gobane Modimo wa rena ke yena.
19Joshua a rera setšhaba a re: Le ka se ke la kgona go direla Morena; ka gobane Morena ke Modimo e mokgethwa, le gona ke Modimo yo bogale; a ka se ke a le lebalela ge le hlanoga ge le dira dibe. 20Ge le ka lahla Morena la hlankela medimo e šele, o tlo thiša a le hlolela bošula a le fediša, le ge a šetše a le atlile.
21Setšhaba sa fetola sa re: Aowa hle, yo re tlogo mo direla ke Morena.
22Joshua a ba rera a re: Lena le dihlatse tša lena ka noši tša tše le di boletšego la re: Re ithatetše Morena gore re direle yena. Bona ba re: Ee, re dihlatse!
23Bjalo ge tlošang medimo e šele e lego mo ga geno, gomme dipelo tša lena di lebane le Morena Modimo wa Isiraele.
24Setšhaba sa fetola sa re: Re tlo direla Morena Modimo wa rena, ra kwa se yena a se bolelago.
25Mohla woo Joshua o dirile kgwerano le setšhaba, a se beela melao le ditshwanelo gona moo Sikeme. 26Ditaba tšeo ka moka a di ngwala mo pukung ya melao ya Modimo; mme a tšea leswika le legolo a le tsema gona moo ka tlase ga morula o bego o le gona moo sekgethweng sa Morena. 27Gomme Joshua a botša setšhaba ka moka a re: Le tsebe gore leswika le e tlo ba hlatse fa go rena, ka gobane le kwele ditaba ka moka tše Morena a di boletšego le rena; e tlo ba hlatse ya gore le se ke la ba la latola la re: Modimo ga re mo tsebe. 28Ya ba gona Joshua a laelanago le setšhaba, mme sa boela magaeng a sona.
29Ya re ge go fedile ditaba tšeo, Joshua morwa wa Nuni mohlanka wa Morena a hwa a feditše nywaga e lekgolo le le nago le lesome. 30Ba mmoloka lebitleng mo nageng ya gagwe ya moo Thiminathe-Sera e lego dithabeng tša Efuraimi ka thoko ya leboa ya thaba ya Gaase.
31Baisiraele ba be ba direla Morena mehleng ka moka ge go sa phela Joshua, le mehleng yohle ya ge go sa phela bagolo ba ba phetšego galelele mehleng ya ge Joshua a šetše a ile, bona ba ba bego ba tseba mediro yohle ye Morena a e diretšego Isiraele.
32Mašapo ala a Josefa, ao Baisiraele ba tlilego nao ba etšwa Egipita, ba a bolokile kua Sikeme mo serapeng se Jakobo a bego a se rekile go barwa ba Hemoro tatago Sikeme ka disilifera tše lekgolo, ya ba naga ya bana ba Josefa.
33Le Eleasara morwa wa Arone a hwa, ba mmoloka lebitleng kua Gibea, motseng wa Pinease morwa wa gagwe, wo a bego a o neilwe mo dithabeng tša Efuraimi.
