DILLO TŠA JEREMIA 2

₁Mong wa rena o reng a fifaditše ngwanenyana wa Tsione a befetšwe? Letago la Isiraele o le ološitše kua magodimong, a le lahlela fase, a se ke a gopola bogato bja dinao tšagwe mohla wola a befetšwe.

₂Mong wa rena o phušotše meago ya Jakobo yohle, a se hlwe a setša. A galefile a kgereša dibo tša morwetšana wa Juda, a di ušetša fase, a goboša mmušo wa gona, le magoši a gona.

₃O kgotše lenaka ka moka la Isiraele mohla wola a tuka bogale; mme tsogo lagwe le letona o le hunyeditse manaba a fihlile; mo go Jakobo a gotetša mollo wa dikgabo tša go fiša tšohle.

₄A nganga bora wa lenaba; a akga tsogo lagwe wa mohloi; mo ngwakong wa ngwanenyana wa Tsione a fediša tšohle di kgahlago, kgalefo ya gagwe a e tšholla boka mollo.

₅Mong wa rena o re fetogetše lenaba, a metša Isiraele. O meditše nywako yohle ya mošate, a senya dibo tša gagwe; morwetšana wa Juda a mo kgophela majapelo le masetlapelo.

₆A rutla Ngwako wagwe bjalo ka legora la serapa, a senya malapa a gagwe. Morena o lebatša Tsione menyanya ya Sabatha; kgoši le bomphamodimo a ba lahla a befetšwe.

₇Mong wa rena o lahlile aletare yagwe; o gerula Ntlokgethwa yagwe; merako ya meago ya mošate o e lahletše diatleng tša manaba a a tladitšego mašata mo Ntlong ya Morena boka mohla wa monyanya.

₈Morena o phethile se a se gopotšego go uša merako ya ngwanenyana wa Tsione. O ngangile lenti le moelo, a se gomiše seatla, a uša, a hlokofatša boto le morako, tša dumala mmogo;

₉A phekgola magoro, a kgola le mepheko a e robaganya; magoši a gona, le bakgoma ba gona, ba tloga le ba ntle. Ga go sa ne molao; le baboni ba gona ga ba sa bona pono ye e tšwago go Morena.

₁₀Ba dutše fase ba ikhomoletše, bagolo ba ngwanana wa Tsione; dihlogo di tšhetšwe lerole; ba apere mankgeretla; dikgarebe tša Jerusalema di kgothutše hlogo.

₁₁Mahlo a ka a rotoba ka megokgo; ka teng ga ka go a bela; bete sa ka se ferega ka go bona go robega ga ngwanana wa setšhaba sešo, ge bana le masea ba felela mekgobeng ya motse.

₁₂Ba llela bommabo ba re: Dikgobe! Tša go nwa! Ba idibala mekgobeng ya motse bjalo ka kgobetši; ba hwa ba gokerwe ke bommabo.

₁₃Joo ngwanenyana wa Jerusalema, nka go fepeletša ka go reng? Nka šupa dife ge ke go swantšhetša? Ngwanenyana wa Tsione, nka go bapetša le bafe ge ke re ke go homotše? Hleng thobego yago e godile wa lewatle? Ke mang a kago go alafa?

₁₄Didupe tša gago di go dupetše maaka le mafela, ba lesa go go botša dibe tšago, ba se go phemele go thopiwa. Ba go dupetše tosa go forwa le go lahlwa.

₁₅Bohle ba go feta fa ba swara melomo ba letša melodi, ba šišinya hlogo ge ba bona ngwanenyana wa Jerusalema; ba re: A ke wona motse wo ba bego ba re ke o botse wa paala, lethabo la lefase lohle?

₁₆Manaba a gago ohle a go ahlamela a go kwera, a re: Kgone! Re mo meditše! Ke lona tšatši le re bego re le lebeletše! Re mo hweditše! Re di bone!

₁₇Morena o dirile se a bego a se eleletša, o phethile ntšu la gagwe la mehleng; o thuthantša a se setše, a kgahla lenaba ka tše di go wetšego, a tsoša naka la ba ba go hloilego.

₁₈Hlaboša lentšu le etšwa pelong, o bitše Mong wa gago, wene morako wa ngwanana wa Tsione. A mahlo a gago a ele megokgo mosegare le bošego bjalo ka nokana; o se ke wa kgaotša; thaka ya ihlo la gago e se ke ya khutša.

₁₉Tsoga o tsoše dillo bošego; o thome tišo tša bošego ka go lla. Tšholla tša pelong ya gago boka meetse pele ga Morena. Emiša matsogo o lebeletše yena ka baka la bophelo bja bana ba gago ba go hwa ka tlala dikhutlong ka moka tša mekgoba.

₂₀Morena, gadia o bone! Ke bomang ba o bilego wa ba dira tšona tše? Basadi ba ba ba ja kenyo tša bona, bana ba banyane ba ba sa ferwego; mme bomphamodimo le baboni ba bolawa sekgethweng sa mong a bohle.

₂₁Sebao ba kaname mekgobeng, ke banna, le bakgalabje; ke dikgarebe, le masogana; ba tekotšwe ke marumo. O ba bolaile mohla o befetšwe, wa gaila, wa se setše.

₂₂O nkepetše solo la tše di ntšhošago thoko tšohle; mohla wa kgalefo ya Morena gwa hlokwa e a phonyokgago a phedile. Ba ke bego ke ba fara ke ba lela, ba feditšwe ke lenaba la ka.