LEFITIKO 14

₁Morena o boletše le Moshe a re: ₂Melao še ya mohla wa lephera a tlogo thwe: o sekile. A a išwe go moperisita. ₃Moperisita a a tšwele ka ntle ga mešasa. E tlo re ge a nyakorela a hwetša bolwetši bja lephera bo fodile, bo tlogetše motho eo e a bego a pherile, ₄gona a laele gore mohlatswiwa a tliše dinonyana tše pedi di sa phela, tše di sekilego; a tliše le legong la marokane, le moretele, le sefokana sa lehlakanoka. ₅Moperisita a laele gore nonyana e nngwe e hlabelwe moeteng o nago le meetse a mothopo. ₆Nonyana ye e phelago a e tšee a e ine mo meetseng a mothopo a nago le madi a nonyana ye e hlabetšwego moo, a ine le legong la marokane, le moretele, le sefokana, ₇a fokele mohlatswiwa-lephera eo, a dire gašupa, a tsebo re: o thakgafetše. Nonyana ye e phelago a e lese e fofe e boele šokeng. ₈Mohlatswiwa a hlatswe diaparo tša gagwe, a boolwe meriri ka moka, a hlape meetseng; o sekile. A tsebo tla mešašeng; fela, a dule ka ntle ga ngwako wa gagwe matšatši a šupago. ₉Ka la go šupa a boolwe meriri ka moka, le hlogo, le maledu, le dintši tša mahlo, meriri ka moka; a hlatswe diaparo, a hlape mmele; ke moka, o sekile.

₁₀Ka la seswai a hlaole dikwanyana tše pedi tše di se nago bosodi le kwana e tee ya ngwaga o tee; a tliše ntlatla ya bupi bjo bo tšhetšwego makhura, le lefiswana le le nago le makhura. ₁₁Gomme moperisita, yena mohlatswi, a emiše motho eo wa mohlatswiwa pele ga Morena, mojako wa Ngwako wa Kgwerano. ₁₂Moperisita a tšee kwana e nngwe, a e tliše e be selefa, le lefiswana la makhura; a di ekare e be seekaro pele ga Morena. ₁₃Kwana eo a e hlabe mo go hlabelwago diloba le dihlabelo, felo gokgethwa; ka gobane selefa le seloba ke tša moperisita, ke tše kgethwakgethwa. ₁₄Gomme moperisita a kgwathe madi a selefa, a fetše lerephu la tsebe ya le letona ya mohlatswiwa ka ona, le mono o mogolo wa seatla sa gagwe sa le letona, le mono o mogolo wa leoto la gagwe la le letona. ₁₅Moperisita a tšee makhura lefiswaneng, a a tšhele seatleng sa gagwe sa la ntsogošo. ₁₆A ine monwana wa gagwe wa le letona mo makhureng a mo seatleng sa gagwe sa la ntsogošo, mme a fokele pele ga Morena, a dire gašupa. ₁₇Makhura a a šetšego seatleng sa gagwe, a fetše lerephu la tsebe ya le letona ya mohlatswiwa, le mono o mogolo wa seatla sa gagwe sa le letona, le mono o mogolo wa lenao la gagwe la le letona, mo go lego madi ala a selefa. ₁₈Makhura a šalago seatleng sa gagwe a a tšhele mo hlogong ya mohlatswiwa, a kgone go mo direla poelanyo go Morena.

₁₉Moperisita a tliše seloba, a direle mohlatswiwa poelanyo ka baka la ditšhila tša gagwe, a tsebo hlaba sehlabelo. ₂₀Sehlabelo le sebego moperisita a di tliše aletareng; e be gona go mo direla poelanyo gore a sekege.

₂₁Ge motho eo e le modiidi e a hlaelwago ke tšeo, gona a ntšhe kwana ya selefa sa seekaro, ya ba go mo direla poelanyo. A tliše le ntlatlana ya bupi bjo bo tšhetšwego makhura, e be sebego, le lefiswana la makhura, ₂₂le mekurwanyana e mebedi, goba maebana a mabedi, ka mo a kgonago; le lengwe e tlo ba la seloba, le lengwe e tlo ba la sehlabelo. ₂₃A a di tliše ka tšatši la seswai la tlhatso ya gagwe; a di tliše mojako wa Ngwako wa Kgwerano pele ga Morena. ₂₄Moperisita a tšee kwana yeo ya selefa le lefiswana la makhura, a di ekare pele ga Morena. ₂₅A hlabe kwana yeo ya selefa, a kgwathe madi a yona a fetše lerephu la tsebe ya le letona ya mohlatswiwa, le mono o mogolo wa seatla sa gagwe sa le letona, le mono o mogolo wa lenao la gagwe la le letona; ₂₆a tšhele makhura mo seatleng sa gagwe sa la ntsogošo. ₂₇Makhura ao a seatleng sa gagwe a la ntsogošo a a fokele pele ga Morena ka monwana wa le letona, a dire gašupa. ₂₈Makhura ao a a šetšego seatleng sa gagwe sa le letona, a a fetše lerephu la tsebe ya le letona ya mohlatswiwa ka ona, le mono o mogolo wa seatla sa le letona sa gagwe, le mono o mogolo wa lenao la gagwe le letona, mo go lego madi ala a selefa. ₂₉Makhura a a šetšego seatleng sa moperisita a a tšhele mo hlogong ya mohlatswiwa, e be go mo direla poelanyo pele ga Morena. ₃₀Ke mo mohlatswiwa a tlogo hlaba mokurwanyana o mongwe, goba leebana le lengwe, ka mo a kgonago ka gona. ₃₁A dire ka mo a kgonago ka gona. Le lengwe e be la selefa; le lengwe e be la sehlabelo, a tle le sebego; gomme moperisita a direle mohlatswiwa eo poelanyo pele ga Morena. ₃₂Ke wona molao o lebanego motho e a bego a na le bolwetši bja lephera, a hlaelelwa tša tlhatso ya gagwe.

₃₃Morena o boletše le Moshe a re: ₃₄Ge le tlo ba le fihlile nageng ya Kanana, ye nna ke le filego yona gore e be ya lena, gomme ge ke tlo tšweletša bolwetši bja lephera mo ntlong e nngwe ya nageng ya geno, ₃₅gona mong wa ntlo a tle a tsebiše moperisita, a re: Ke bona eke go na le bolwetši ntlong ya ka. ₃₆Moperisita -- a sešo a tla go nyakorela bolwetši bjoo -- a laele a re dilo ka moka tše di lego ntlong yeo di phahlolwe ntle, gore di se ke tša tšhilafala. Ke mo moperisita a tlogo tsena a nyakorela ntlo yeo. ₃₇Ge a nyakorela a bona bolwetši bo le lebotong la ntlo, a hwetša e le diphobe tše ditalana tša bohubetšwana, di phobetše lebotong, ₃₈gona a tšwe ntlong ka mojako, mme a e tswalele matšatši a šupago. ₃₉Ge a tlo boa ka la go šupa, a hwetša bolwetši bo kekile lebotong la ntlo, ₄₀gona a laele gore go phušulwe, mme makokota a a nago le bolwetši bjoo a lahlelwe ntle ga motse sethobolong. ₄₁Mme ntlo ka gare e gopiwe mo go fela, letlala le le gopilwego le ntšhetšwe ka ntle ga motse sethobolong. ₄₂Go tšewe makokota a mangwe a tsenywe madulong a ala, go tšewe leraga le lengwe, mme ba kgakgaphe ntlo.

₄₃Ge bolwetši bo ka boa mo ntlong yeo, mola go šetše go ntšhitšwe makokota, go gopilwe, go kgakgaphilwe, ₄₄mme moperisita a tla a nyakorela, a hwetša bolwetši bo kekile ntlong, gona ke lephera le lešoro la ntlong; ntlo yeo e tšhilafetše. ₄₅Gona ntlo yeo e phušulwe; makokota a yona, le dikwata tša yona, le maboto a ntlo, ka moka di ntšhetšwe ntle ga motse sethobolong. ₄₆E a kago tsena ntlong e bjalo mohla e šetše e tswaletšwe, o tšhilafetše go fihla mantšiboa. ₄₇E a kago robala ntlong e bjalo a a hlatswe diaparo tša gagwe. Le e a jetšego ntlong e bjalo, a hlatswe diaparo tša gagwe.

₄₈Ge moperisita a etla go nyakorela ntlo, a hwetša bolwetši bo sa keka mo ntlong mo go kgakgaphilwego, gona moperisita a a re: e sekile, bolwetši bo tšwile. ₄₉A tšee seloba sa ntlo yeo, sa nonyana tše pedi, le legong la marokane, le moretele, le sefokana sa lehlakanoka. ₅₀Nonyana e nngwe a e hlabele pitšeng, mo meetseng a mothopo. ₅₁A tšee legong la marokane, le sefokana sa lehlakanoka, le moretele, le nonyana e phelago, a di ine mo mading a nonyana e hlabetšwego mo meetseng a mothopo, mme a fokele ntlo yeo a dire gašupa. ₅₂E be go hlatswa ntlo yeo ka madi a nonyana le ka meetse a mothopo, le ka nonyana e phelago, le ka legong la marokane, le ka sefokana sa lehlakanoka, le ka moretele. ₅₃Ge e le nonyana e phelago, a e lesetše ka ntle ga motse e fofe e boele šokeng. E be gona go direla ntlo poelanyo, e sekege.

₅₄Ke yona melao ya bolwetši bja lephera la mehutahuta, le ya sebabo, ₅₅le ya lephera la diaparo, le la ntlo; ₅₆le ya sekutu, le dišo, le mebala e mesehlana. ₅₇Ke ya gore go rutwe go tseba mohla selo se tšhilafetše, le ge se sekile; ke yona melao ya lephera.