LEFITIKO 23

₁Morena o boletše le Moshe a re: ₂Bolela le Baisiraele o re: Menyanya ya Morena ye le tlogo re ke pitšokgethwa, e lego menyanya ya ka, še: ₃Mediro a e dirwe ka matšatši a selelago; la go šupa lona ke la go khutša sa ruri, ke la pitšokgethwa. Go se ke gwa ba le modiro wo le o dirago ka lona; ke la Sabatha ya Morena mo meagong ya lena yohle. ₄Yona menyanya ya Morena ya pitšokgethwa, ye le tlogo biletšwa go yona ka mabaka a yona, še:

₅La lesome le metšo e mene la kgwedi ya pele, mantšiboa a lona, e be Paseka ya Morena. ₆La lesome le metšo a fetšago seatla la kgwedi yeo ke la monyanya wa Morena wa magobe a sa omelwago. Le je magobe a se nago komelo matšatši a šupago. ₇Ka la pele le kgobele pitšokgethwa; Le se ke la ba la swara modiro. ₈Le fetše matšatši a šupago le batametša tša mello ya Morena; mme la go šupa e be la pitšokgethwa; le se ke la ba la swara modiro.

₉Morena o boletše le Moshe a re: ₁₀Bolela le Baisiraele o re: Ge le tlo ba le fihlile nageng ye ke le fago yona, ge le buna mašemo a yona, gona le tlišetše moperisita ngata ya thakangwaga. ₁₁Ngata yeo o tlo e ekara pele ga Morena, gore le thabelwe ka yona. A e ekare ka tšatši le le hlatlamago la Sabatha. ₁₂Ka lona tšatši leo la go ekara ngata le hlabe kwana ye e se nago bosodi, ya ngwaga o tee, e be sehlabelo. ₁₃Le tliše le sebego sa ntlatlana ya bupi bjo bo tšhetšwego makhura, e be sa mello ya Morena sa monko o bose, le sebego sa moetana wa beine. ₁₄Ge le sešo la tliša ngata yeo ya seekaro, le se ke la ja bogobe, le ge e le masohlo, goba megollelo. A e be molao wa lena wa ka mehla go iša ditlogolong mo meagong ya lena mo go fela.

₁₅Go tlogo ka tšatši leo la go hlatlama la Sabatha, la ngata ya seekaro, le bale dibeke tše di šupago tše di tletšego. ₁₆Go fihla la go hlatlama Sabatha ya go šupa. Le bale matšatši a masome a mahlano; e be mo le tlišetšago Morena sebego sa tše mpsha. ₁₇Le tliše magobe a tšwago nywakong ya lena, e be sebego sa seekaro, e be magobe a mabedi a a apeilwego ka bupi bjo bo tletšego leselwana, a apewe a omeletšwe. Ke tšona dithakangwaga tša Morena. ₁₈Gotee le magobe ao le tliše dikwanyana tše di šupago, tše di se nago bosodi, tša ngwaga o tee; le dikgapana tše pedi; e be tša sehlabelo sa Morena. Di tle di na le dibego tša tšona tša dijo le tša dino, tša mello ya monko o bose wa Morena. ₁₉Phoko e tee le e dire ya seloba; dikwanyana tše pedi e be tša sedimo sa seleboga. ₂₀Moperisita a di ekare le magobe a dithakangwaga pele ga Morena; a a be tše kgethwa; a a be a moperisita gotee le dikwanyana tšeo. ₂₁Ka lona tšatši leo le hlabe mokgoši wa go re go na le pitšokgethwa. Le se ke la ba la swara modiro. E be molao mo meagong ya lena mo go fela go iša ditlogolong tša lena.

₂₂Ge le buna mašemo a lena, o šie mathoko a tšhemo ya gago, o se ke wa budutša, o šadišetše badiitšana le baeti. Ke nna Morena Modimo wa lena.

₂₃Morena o boletše le Moshe a re: ₂₄Bolela le Baisiraele o re: Ka la pele la kgwedi ya go šupa go be le Sabatha ya lena ya kgopotšo, ya meletšo ya phalafala, ya pitšokgethwa. ₂₅Le se ke la ba la swara modiro; le batametše tša mello ya Morena.

₂₆Morena o boletše le Moshe a re: ₂₇Ka la lesome la kgwedi ya go šupa go be le letšatši la poelanyo, la pitšokgethwa; le ikokobetše meoyeng ya lena, le batametše tša mello ya Morena. ₂₈Ka lona tšatši leo le se ke la ba la swara modiro; ka gobane ke letšatši la poelanyo, la gore le boelanywe le Modimo wa lena. ₂₉Ka gobane e a sa ikokobetšego ka lona letšatši leo, o tlo ripiwa setšhabeng sa gabo. ₃₀Motho e a kago swara modiro ka lona tšatši leo, ke tlo mo senyetša ruri setšhabeng sa gabo. ₃₁Le se ke la ba la swara le modiro. A e be molao wa ka mehla go iša ditlogolong tša lena mo meagong ya lena mo go fela. ₃₂E be Sabatha ya lena ya go khutša, le ya gore le ikokobetše meoyeng ya lena ka la senyane la kgwedi ka mantšiboa; e be Sabatha go tloga ka mantšiboa go fihla ka mantšiboa a la ka moswana.

₃₃Morena o boletše le Moshe a re: ₃₄Bolela le Baisiraele o re: Ka la lesome le metšo e mehlano la kgwedi ya go šupa go direlwe Morena monyanya wa mešaša matšatši a šupago. ₃₅Ka la pele go be le pitšokgethwa. Le se ke la ba la swara modiro. ₃₆Le fetše matšatši a šupago le batametša tša mello ya Morena; ka la seswai go be le pitšokgethwa ya lena; mme le batametše tša mello ya Morena; ke la mabothelele; le se ke la ba la swara modiro.

₃₇Ke yona menyanya ye le tlogo e dira la re ke pitšokgethwa, ke ya go batametša tša mello ya Morena, dihlabelo le dibego, le didimo, le dinwewa, la di batametša ka lebaka la tšona. ₃₈Ke tša ka ntle ga disabatha tša Morena, le ka ntle ga dineo tša lena tša keno tša lena ka moka, le ka ntle ga tša go ithapa, tše le di tlišetšago Morena.

₃₉Le gona ka tšatši la lesome la metšo e mehlano la kgwedi ya go šupa, ge le kgobetše dienywa tša naga, le dire monyanya wa Morena wa matšatši a šupago. La pele ke la Sabatha, le la seswai e be la Sabatha. ₄₀Ka la pele le tšee dienywa tša dihlare tše botse, le makala a melala, le a mehlware ya makala a teteanego, le a meretlwanokane, gore le ithabele pele ga Morena Modimo wa lena matšatši a šupago. ₄₁Monyanya wo wa matšatši a šupago le o binele Morena ka ngwaga o mongwe le o mongwe; e be molao wa lena wa ka mehla go iša ditlogolong tša lena. Le bine monyanya wo ka kgwedi ya go šupa. ₄₂Le fetše matšatši a šupago le dutše mešašeng; bohle ba setšhaba sa Isiraele ba dule mešašeng. ₄₃E be gore ditlogolo tša lena di tsebe gore nkile ka dudiša Baisiraele mešašeng mola ke ba ntšhitše nageng ya Egipita. Ke nna Morena Modimo wa lena.

₄₄Gomme Moshe a anegela Baisiraele tšona tše tša menyanya ya Morena.