LUKA 1

₁Ba bantši ba šetše ba lekile go hlomaganya taodišo ya tše di diregilego mo go rena. ₂Re di neilwe ke ba ba di bonego ka mahlo go tloga mathomong a tšona ya ba bona batseta ba yona taba yeo. ₃Bjale ke bona ge go ntshwanetše, ge le nna ke go ngwalela go hlatlamana ga tšona, wena Theofilo morategi, ke thomile go di latiša tšohle go tloga tlhagong ya tšona, ₄O tle o bone nnete ya ditaba tše o di rutilwego.

₅Mehleng ya Herode kgoši ya naga ya Juda go be go na le moperisita e mongwe e a bitšwago Tsakaria, e le wa sephohla sa Abia; mosadi wa gagwe e be e le wa moloko wa Arone, leina la gagwe e be e le Elisabetha. ₆Ba be ba lokile pele ga Modimo ka babedi, ba eya ka ditaelo ka moka tša Morena ba se na bosodi. ₇Gomme ba be ba se na ngwana, Elisabetha e le moopa; le gona ba be ba tšofetše bobedi bja bona.

₈Ya re mohla Tsakaria a swere modiro wa boperisita pele ga Modimo, e le letšatši la gagwe, ₉A tsena Ngwakong wa Modimo, a thuntšha diorelo ka mokgwa wa boperisita. ₁₀Lešaba ka moka la batho le be le eme ntle, ba rapela ka lebaka leo ge go thuntšwa diorelo.

₁₁Tsakaria a bona morongwa wa Morena a eme ka go le letona la aletare ya diorelo. ₁₂A re go mmona a tšhoga, a welwa ke poifo. ₁₃Morongwa a bolela nae a re: Se boife, Tsakaria! Thapelo ya gago e kwilwe. Elisabetha mosadi wa gago o tlo go belegela morwa, wa tlo mo rea leina la Johane. ₁₄Yena eo e tlo ba lethabo la gago le tlhalalo ya gago; gomme ba ba tlo go thabela go tswalwa ga gagwe ke be bantši. ₁₅Gobane e tlo ba e mogolo pele ga Morena; a ka se ke a nwa morara le sedila; o tlo tlala Moyamokgethwa a sa le mmeleng wa mmagwe. ₁₆Ba bantši ba Baisiraele o tlo ba sokollela go Morena Modimo wa bona. ₁₇Mme o tlo ba etapele ka moya wa Eliya le ka matla a gagwe, gore dipelo tša botatagobana a di sokollele go bana ba bona, le baganyetši a ba sokollele bohlaleng bja baloki, e be go lokišetša Morena setšhaba se se itlhamilego.

₁₈Tsakaria a fetola a re: Tšeo ke tlo di tseba kang? Gobane ke tšofetše, le mosadi waka o fetilwe ke mabaka a gagwe.

₁₉Morongwa a bolela a re: Ke nna Gabriele ke emago pele ga Modimo. Ke romilwe go bolela le wene, le go go tsebiša ditaba tše botse tšeo. ₂₀Tseba gee! O tlo ba semuma, gwa tlo ba gwa tla letšatši le di tlo go tšwelela ka lona; O tlo šitwa go bolela ka gobane o sa ka wa dumela tše ke di boletšego tše ditlo go direga ka lebaka la tšona.

₂₁Ge e le setšhaba, sona se be se letetše Tsakaria, se kgotsa ge a diega mo Ngwakong wa Modimo. ₂₂Bjale ge a etšwa, a šitwa go bolela; ke mo ba lemogilego ge a bone pono mo Ntlong ya Modimo. Yena a fo ba kgwathetša ka diatla, a dula a le semuna.

₂₃Ge go fetile matšatši a tirelo ya gagwe, a boela gae. ₂₄Go tloga mehleng yeo Elisabetha mosadi wa gagwe a ba moima, a ikuta dikgwedi tše tlhano a re: ₂₅Ke tše Morena a ntirilego tšona mehleng yeno a ntebeletše, gore a tloše tše batho ba bego ba nnyatša ka tšona.

₂₆Ka kgwedi ya go selela Morongwa Gabriele a rongwa ke Modimo a ya motseng o mongwe wa Galilea wo ba rego ke Natsaretha. ₂₇A tla go mosetsana e mongwe e a bego a beeleditšwe ke monna yo ba rego ke Josefa, wa moloko wa Dafida. Leina la mosetsana eo e be e le Maria. ₂₈Morongwa a tsena mo a bego a le gona, a re: Thaba, wena Mogaugelwa. Morena o na le wena Mošegofatšwa gare ga basadi.

₂₉Maria ge a mmona, a tšhoga ge a realo; pelong ya gagwe a re: Ke go dumedišwa ka mokgwa o bjang? ₃₀Morongwa a bolela a re: Se tšhoge, Maria, o hweditše go gaugelwa ke Modimo. ₃₁Tseba; o tlo ima mmeleng wa gago, wa tlo belega morwa wa tlo mo rea leina la Jesu. ₃₂Yena eo e tlo ba e mogolo, o tlo bitšwa Morwa wa Yogodimodimo; mme Morena o tlo mo nea sedulo sa Dafida tatagwe. ₃₃O tlo buša moloko wa Jakobo go iša mehleng ya neng le neng; mme bogoši bja gagwe bo ka se ke bja ba le bofelo.

₃₄Maria a botšiša a re: Tšeo di ka direga bjang, etšwe ke sa tsebe monna?

₃₅Morongwa a fetola a re: Moyamokgethwa o tlo theogela go wene mme matla a Yogodimodimo a tlo go okamela wa moriti; ke ka baka leo e a tlo go belegwa ke wene a tlo go bitšwa Morwa-Modimo. ₃₆Gomme o tsebe; Elisabetha motswalo wa gago le yena o imile morwa botšofading bja gagwe; mme kgwedi ye go yena e šetše e le ya go selela; ke yena eo ba bego ba re ke moopa. ₃₇Gobane Modimo, ga go se se sa kgonegego go yena.

₃₈Maria a re: Ke nna e, ke molata wa yena Morena; tše O di boletšego a di ntiregele. -- Mme morongwa a mo tlogela.

₃₉Mehleng yeo Maria a tsoga, a akgofa a ya dithabeng motseng wa Juda. ₄₀A fihla ngwakong wa Tsakaria, a dumediša Elisabetha. ₄₁Ya re Elisabetha ge a ekwa a dumedišwa ke Maria, ngwana mmeleng wa gagwe a sela. Elisabetha a tlala Moya o mokgethwa, ₄₂a hlaboša lentšu le legolo a re: O Mošegofatšwa gare ga basadi; le sona seenywa sa mmele wa gago se šegofaditšwe. ₄₃Go ntšwela kae ge ke etelwa ke mmago Morena waka! ₄₄O k'o tsebe; ge lentšu la ge o ntumediša le ntsena ditsebeng ngwana wa mo mmeleng waka a sela ka go thaba. ₄₅O wa lehlogonolo, wena o dumetšego go phethega ga tše Morena a go boditšego tšona.

₄₆Maria a re: Pelo yaka e reta Morena, ₄₇moya waka o hlalala ka Modimo Mophološi waka. ₄₈O bone bobotlana bja nna molata wagwe. Gobane ke nna e, yo ba meloko yohle ba tlo go nthe ke yo lehlogonolo, ₄₉Ka ge Yomatla a ntira tše kgolo; mme ina la gagwe ke le lekgethwa. ₅₀Kgaugelo ya gagwe e ya le meloko le meloko go ba ba mmoifago. ₅₁O dirile matla ka tsogo la gagwe; o gašantše ba kgopolo tša go ipota. ₅₂O tekola ba dioka ditulong, a godiša babotlana. ₅₃Ba ba lapilego o ba hoša ka tše botse; bahumi a gomiša ba timilwe. ₅₄O šeditše ngwana wagwe Isiraele, e le go gopola kgaugelo, ₅₅bjalo ka ge a boletše le botatawešo Aborahama le bana ba gagwe o tlo fela a gopola kgaugelo go ya go ile.

₅₆Maria a dula moo le Elisabetha a nyako fetša dikgwedi tše tharo; a tsebo boela gae.

₅₇Elisabetha a fihlelwa ke lebaka la gagwe, a belega ngwana wa mošemanyana. ₅₈Baagišani le ba gabo ge ba ekwa gore Morena o godišitše kgaugelo ya gagwe mo go yena, ba thaba le yena.

₅₉Ka tšatši la seswai ba tla go bolotša ngwana, ba mo rea leina la Tsakaria tatagwe. ₆₀Mmagwe a gana a re: Aowa; o tlo bitšwa Johane.

₆₁Bona ba re: Hleng molokong wa geno go se motho wa leina leo! ₆₂Ba kgwathetša tatagwe ba re, o rata ge a bitswa ka leina lefe.

₆₃Yena a nyaka lematšana, a ngwala a bolela a re: Leina la gagwe ke Johane! Ba tlabega ka moka. ₆₄Ke ge molomo wa gagwe o mumologa le leleme la gagwe la hunologa, a bolela areta Modimo. ₆₅Ba gabo bohle ba welwa ke poifo; ditaba tše ka moka tša bolelwa dithabeng tša Juda. ₆₆Gomme bohle ba ba di kwilego ba di bea dipelong tša bona, ba re: Bjale ngwana yo e tlo bang ka gobane seatla sa Morena se be se le moo go yena.

₆₇Tsakaria tatagwe a tlala Moya o mokgethwa a porofeta a re: ₆₈A go retwe Morena Modimo wa Isiraele, gobane o tlile a hlola setšhaba sa gagwe, a se direla topololo, ₆₉A re tsošetša naka la phološo, la lešika la Dafida mohlanka wa gagwe, ₇₀A dira tše a bego a di šupa ka melomo ya baporofeta bagwe ba bakgethwa go tloga kgalelele, ₇₁a re o tlo re phološa manabeng a rena, matsogong a ba re hloilego bohle. ₇₂A re, borrawešo a ba dire ka mabobo, a gopole kgwerano e kgethwa ya gagwe. ₇₃Keno yela a e enetšego tatawešo Aborahama, a re: ₇₄Re tlo Mo direla re se na poifo, re golotšwe diatleng tša manaba, ₇₅Re le ba bokgethwa le ba toko pela gagwe, ka mehla ka moka ya phelo bja rena. ₇₆Mme wena ngwanaka! Ba tlo re o Moporofeta wa Yogodimodimo; o tlo ba Moetapele wa fahlogo sa Morena, wa mo lokišetša tsela tšagwe. ₇₇Ya tlo ba go nea tšhaba sagwe tsebo ya phološo ya go tla ka go lebalelwa dibe. ₇₈Ka pelotšhokwa ya Modimo wa rena, ya go re hlabišetša masa matšwagodimo, ₇₉a go tlo bonwa ke ba go dula lefsifsing, moriting wa lehu, a go tlo sokollela maoto a rena tseleng ya molao.

₈₀Gomme ngwana eo a gola, a dula mašokeng, gwa ba gwa tla letšatši la ge a tšweletše a bonwa ke Baisiraele.