LUKA 5

₁Ka mohla o mongwe lešaba la mo pitlaganya le rata go kwa Lentšu la Modimo, yena a eme lebotong la lewatle la Genetsareta. ₂A bona maselawatle a mabedi a batagane le leboto, barei ba dihlapi ba tšwile go ona, ba hlatswa malokwa. ₃Jesu a namela le lengwe la maselawatle ao, e bego e le la Simone, a mo kgopela a re a le šuthiše ka gonyane le tlogelane le leboto. A dula mo go lona leselawatle, a ruta lešaba a le moo.

₄Ge a feditše go bolela a laela Simone a re: Suthišetša kua go lego bodiba, le fološe malokwa a lena le sware dihlapi.

₅Simone a fetola a re: Mong aka! Bošego ka moka re letše re itapiša, ra se ke ra bona selo; fela, ke tlo fološa lokwa ke kwile taelo ya gago. ₆Ge ba dira ka mokgwa woo, ba tanya bontši bjo bogolo bja dihlapi, lokwa la bona la ba la gagoga. ₇Ba kgwathetša bagwera ba bona ba leselawatle lela le lengwe gore ba tle ba ba swariše. Ba tla; ba tlatša maselawatle ka mabedi, a ba a teka. ₈Simone Petro ge a di bona a khunama a inametše matolo a Jesu, a re: Tšwaa mo go nna, gobane ke monna wa modiradibe, Morena!

₉A realo a wetšwe ke tšhogo e kgolo le bohle ba ba bego ba na le yena, ba bone bontši bjoo bja dihlapi tše ba di phuthilego. ₁₀Ke tšona tše di wetšego le Jakobo le Johane barwa ba Tsebedeo ba e bego e le badirišani ba Simone. Jesu a bolela le Simone a re: Se boife; go tloga bjalo o tlo ba morei wa go phutha batho.

₁₁Gomme ge ba bušeditše maselawatle lebotong, ba tlogela tšohle ba mo latela.

₁₂Ka mohla o mongwe a le motseng o mongwe ba bona go etla monna a tletše lephera, yo a itšego go bona Jesu, a wela fase ka sefahlogo, a mo kgopela a re: Morena, ge o ka rata, o ka kgona go mphodiša.

₁₃Jesu a iša seatla a mo kgwatha a re: Ke rata fao; fola! Mme lephera la gagwe la napa la mo tloga. ₁₄A mo laela a re a se ke a botša motho, a re: Sepela, o yo ipontšha go moperisita, o iše seleboga sa ge o fodile, ka mo go laetšwego ke Moshe, gore e be bohlatse go bona.

₁₅Gomme kgowane ya ge ba mmolela ya enela e eya, gwa kgobokana mašaba a mantši a ba ba ratago go mo kwa le go fodišwa malwetši a bona. ₁₆Yena gomme a ba wa go itulela mašokeng a rapela.

₁₇Ka letšatši le lengwe ge a ruta, gwa tla bafarisei le baruti ba Molao ba dula; e be e le ba ba tšwago metseng ka moka ya Galilea le ya Juda le Jerusamela; mme matla a Modimo a go fodiša a be a le go yena. ₁₈Ba bona go etla banna ba rwele motho ka malao; e be e le e a rephilego ditho; ba nyaka botseno bja gore ba mo tliše ngwakong ba mmee pele ga Jesu. ₁₉Ba bo hloka ka go tlala ga batho ba namela godimo ga ngwako, ba rutlolla, ba fološa motho eo a le malaong, a fihla mo gare ga bona pele ga Jesu. ₂₀Jesu ge a bona tumelo ya bona, a re: o lebaletšwe dibe tša gago.

₂₁Ge a realo, bafarisei mo dipelong tša bona ba re: Motho yo ke mang? O goboša Modimo. Ke mang a kago lebalela motho dibe, ge e se Modimo?

₂₂Jesu ge a bona dikgopolo tša bona, a ba botšiša a re: Le eleletšang dipelong tša lena? ₂₃Se se bolelo ke sefe? A ke ge motho a re: O lebaletšwe dibe tša gago? Goba ke ge a ka re: Tsoga o sepele? ₂₄Fela, le tlo tseba ge Morwamotho a na le matla a go lebalela batho dibe mo lefaseng. Ya ba gona a bolelago le eo a rephilego ditho, a re: Tsoga! Rwala malao a gago, o ye ngwakong wa gago.

₂₅Monna eo a tsoga ka pela, a rwala tše a bego a letše godimo ga tšona, a ya ngwakong wa gagwe a tumiša Modimo. ₂₆Ka moka ba swarwa ke tlabego, ba reta Modimo ba goletšwe ke poifo, ba re: Lehono re bone ditlaba.

₂₇Ka le lengwe letšatši a tšwa a bona motho wa lekgetho, yo leina la gagwe e bego e le Lefi, a dutše ngwakong wa lekgetho; a mmitša a re: Ntatele! ₂₈Monna eo a ema a tlogela tšohle, a mo latela.

₂₉Bjale Lefi a mo direla monyanya o mogolo mo ngwakong wa gagwe; mme lešaba le legolo la ba lekgetho le batho ba bangwe le dula le bona. ₃₀Bafarisei le bamangwalo ba bona, ba ba tsota, ba bolela le barutiwa ba gagwe ba re: Le reng le eja le ba lekgetho le badiradibe, le enwa le bona?

₃₁Gwa fetola Jesu a re: Ballangaka ga se ba ba thabilego, ke balwetši. ₃₂A re: Ga ka tla go bitša ba ba lokilego gore ba sokologe; ba ke tlilego go ba bitša ke badiradibe.

₃₃Bona ba re: Ke go reng barutiwa ba Johane ba ikona dijo gantši ba dira merapelo; le barutiwa ba bafarisei ba dira ka mokgwa woo, mola ba gago ba fo ja ba enwa?

₃₄Jesu a re: Bagwera ba monyadi le ka se kgone go ba gapeletša go ikona, ge monyadi a sa na le bona. ₃₅Matšatši ao monyadi a tlo go tlošwa go bona a setla; ka matšatši ao ke mo ba tlo go ikona.

₃₆A bolela le bona le ka go swantšha a re: Ga go motho e a kago sega setsiba sa lešela le lefsa a se bea seaparong se setala; ge a ka dira ka mokgwa woo, setsiba seo sa lešela le lefsa se tlo gagola seaparo; le gona lešela le lefsa ga le amane le kobo e tala. ₃₇Le gona morara o mofsa ga o photlelwe nkgong e onetšego; ge go ka dirwa ka mokgwa woo, morara o mofsa o tlo phuma nkgo yeo morara wa falala, le yona nkgo ya senyega. ₃₈Morara o mofsa o tšhelwa nkgong a mpsha, tša kgona di bolokana ka dipedi. ₃₉Le gona, e a nwago tše tala, a ka se akgofe go nwa tše mpsha, gobane o tlo re: Tše bose ke tše tala.