LUKA 8

₁Mehleng yeo Jesu a thoma go ya le metse le metsana a goelela a bolela Ebangedi ya mmušo wa Modimo, a ya a na le bao ba lesome la metšo e mebedi. ₂Go be go na le basadi ba bangwe, ba ba bego ba fodišitšwe ba na le meoya e mebe le malwetši; e be e le Maria Magdalena, yo a kilego a ntšhwa meoya e mebe e šupilego, ₃le Johana mosadi wa Khusa letona la Herode, le Susana, le ba bangwe ba bantši ba nago ba mo thuša ka thoto ya bona.

₄Mohla go phuthegile lešaba le lentši, le ba metseng ba tšhologetše go Yena, a bolela seswantšho a re:

₅Go tšwile mobjadi a bjala dipeu tša gagwe. Ge a bjala, tše dingwe tša wela tseleng tša gatwa; dinonyana tša sebakeng tša tla tša di ja. ₆Tše dingwe dipeu tša wela lekgwareng; ya re ge di medile tša pona ka ge go se monola. ₇Tše dingwe tša wela gare ga metlwa; metlwa ya mela le tšona, ya di bipa. ₈Tše dingwe tša wela mmung o botse, tša mela, tša enywa ga lekgolo.

A realo a fetša ka go re: E a nago le ditsebe tša go kwa a a kwe.

₉Barutiwa ba gagwe ba mmotšiša ba re: Seswantšho se se reng? ₁₀Jesu a re: Lena le filwe gore le tsebe diphiri tša mmušo wa Modimo; e fela ba bangwe ba di kwa ka diswantšho, gore le ge ba bona ba se ke ba bona; le ge ba ekwa ba se ke ba lemoga.

₁₁Ge e le seswantšho, sona sese: Peu ke Lentšu la Modimo. ₁₂Ba tseleng, ke bao ba kwago, mme gwa tloga go etla Sathane a tloša Lentšu dipelong tša bona, gore ba se ke ba dumela ba phološwa. ₁₃Ba lekgwareng ke bao, e rego ge ba kwile Lentšu, ba le amogela ka thabo; gomme ke ba ba se nago modu, ke ba go dumela lebakanyana fela, ba hlanoga mohla wa moleko. ₁₄Tše di wetšego metlweng, ke ba ba rego ge ba kwile Lentšu, ba ya ba imetšwe ke dipelaelo le mahumo le mabose a bophelo bjono, ba bipja ke tšona ba se buduše selo. ₁₅Tša mmung o botse, ke ba ba kwilego Lentšu ba le lotola pelong e botse le e bolo, ba kgotlelela ba bea dienywa.

₁₆Ga go motho yo e rego ge a goteditše lebone a le ribegetša ka sebja, goba a le bea ka tlase ga malao. O tlo le hlomela sehlomong sa lona, gore ba ba tsenago ba bone seetša.

₁₇Gobane ga go na thopa ye e ka se kego ya utollwa; ga go na sephiri se se ka se kego sa tsebja sa tšwela pepeneneng.

₁₈Phafogelang go theetša gee; gobane e a nago natšo, o tlo newa; mme e a se nago natšo, o tlo amogiwa le tše a rego o na natšo.

₁₉Mmagwe le bana babo ba kile ba tla go yena, mme ba šitwa go mmatamela ka baka la lešaba la batho. ₂₀Ba mo tsebiša ba re: Mmago le bana beno ba eme mo ntle, ba rata go Go bona.

₂₁Yena a fetola a re: Mmane le bana bešo ke ba ba kwago Lentšu la Modimo mme ba dira se le se bolelago.

₂₂Ka letšatši le lengwe a namela leselawatle a na le barutiwa ba gagwe; a re: A re seleleng mošola. Mme ba thoma go sela. ₂₃Ya re ba sa ya, yena a robala. Gomme lewatle la welwa ke sesesedi, ba tlalelwa ke meetse, ba bona e le kotsi. ₂₄Ba tla ba mo tsoša ba re: Morena! Morena! Re a lahlega!

Yena a tsoga, a kgalema phefo le maphoto a meetse, mme gwa ruthela ruri. ₂₅A bolela le bona a re: Tumelo ya lena e kae?

Bona ba tlabega ba tšhogile, ba botšišana ba re: Bjale yena-e ke mang, ge a laela diphefo le meetse? Gomme di a mo kwa!

₂₆Ba tla nageng ya Bagadara; ke ye e lebanego le ya Galilea. ₂₇A sa tšo namela lebotong, a gahlana le monna e mongwe wa motse wa gona e a bego a na le meoya e mebe go tloga kgaleng, a sa apare, a sa dule ngwakong, a dula mabitleng. ₂₈A re go bona Jesu, a goa a wela fase pele ga gagwe, a hlaboša lentšu le legolo a re: Ke na le tabamang le wena Jesu Morwa wa Modimo yo godimodimo? Ke a go rapela, o se ke wa ntlaiša. ₂₉A realo ka gobane Jesu o be a laela moya woo wa ditšhila a re o tšwe go monna eo. Gobane moya o mobe woo o be o mo utlautla gantši, a ba a tlengwa matsogo le maoto ka ditšhipi le ka mefiri, e le go mo lotola; mme a kgaoganya ditlemo tšeo, moya o mobe wa mo kwatakwatiša wa mo iša lešokeng.

₃₀Jesu a mmotšiša a re: Leina la gago o mang?

Yena a re: Ke nna Madira! A realo ka gore o be a tsenwe ke meoya e mebe e mentši. ₃₁Yona yeo ya rapela Jesu ya re a se ke a e lelekela moleteng.

₃₂Gomme gona mo go be go na le mohlape wa dikolobe tše ntši, o fula thabeng. Meoya ya mo rapela ya re a e dumelele go tsena go tšona; mme a e dumelela. ₃₃Meoya e mebe ya re go tšwa mothong eo, ya tsena dikolobeng; mme mohlape ka moka wa iphekemetša ka legaga, wa wela bodibeng wa betwa.

₃₄Badiši ge ba bona tše di diregilego, ba tšhaba ba yo bolela motseng le mašemong. ₃₅Batho ba tšwela go bona se se diregilego; ba hwetša motho eo a tšwilwego ke meoya e mebe, a dutše fase maotong a Jesu, a apere, a na le tlhaologanyo; mme ba tšhoga. ₃₆Ba ba di bonego ba ba laodišetša ka mo go phološitšwego motho eo a bego a tsenwe ke meoya e mebe. ₃₇Gomme lešaba ka moka la batho ba naga yeo ya Bagadara ba kgopela Jesu ba re a tloge moo go bona; ba realo ba swerwe ke poifo e kgolo. Gomme Jesu a goma a namela leselawatle. ₃₈Monna yola wa go tšwiwa ke meoya e mebe a mo rapela a re a ye le Jesu.

Jesu a mo gomiša a re: Boela gae o tsebatše tše kgolo tše Modimo a go dirilego tšona.

₃₉Monna eo a goma, a yo kwalakwatša motseng ka moka tše Jesu a mo dirilego tšona.

₄₀Jesu ge a boa, a gahlanetšwa ke lešaba la batho, ka gobane ba be ba mo letetše gohle. ₄₁Gwa tšwelela monna e mongwe, e a bitšwago Jairo, e le mogolo wa phuthego; a khunamela Jesu, a mo rapela a re a tle ga gagwe. ₄₂Gobane o be a na le ngwanenyana wa gagwe a lego nnoši, wa nywaga e ka bago e lesome la metšo e mebedi; yenaeo o be a ehwa.

Gomme Jesu ge a eya gona, mašaba a mo kgohlaganya. ₄₃Bjale go be go na le mosadi e a feditšego nywaga e lesome la metšo e mebedi a babja ke ngope, a ntšheditše dingaka thoto ya gagwe ka moka, gomme go hlokegile e a kgonago go mo alafa. ₄₄Mosadi e a batamela ka morago, a kgwatha morumo wa kobo ya Jesu, gomme go falala ga madi a gagwe gwa kgaotša e sa le moo. ₄₅Jesu a re: Ke mang e a nkgwathilego?

Ge ka moka ba latola, Petro le ba a bego a na nabo ba re: Morena! Ge mašaba a go katelela ka gohle a go kgohlaganya, a o sa re: Ke mang e a nkgwathilego?

₄₆Jesu a re: O gona e a nkgwathilego, gobane ke kwile ge mo go nna go etšwa matla. ₄₇Mosadi eo ge a bona a sa ka a utagala, a tla a roromela, a phuhlama pele ga Jesu, a ipolela pele ga batho ka moka, a mmotša se se mo gapeleditšego go mo kgwatha, le ka mo a fodilego ka gona e sa le semetseng. ₄₈Jesu a re: Beta pelo, morwedi waka. Tumelo ya gago e go phološitše. Sepela o rotše pelo.

₄₉A re a sa bolela, gwa fihla motho e a tšwago ga mogolo wa phuthego, a re: Morwedi wa gago o hwile; se lapiše Moruti.

₅₀Jesu a di kwa, a bolela le mogolo wa phuthego a re: Se tšhoge; sa gago a e be go dumela.

₅₁Ge a fihla ngwakong, ga a ka a dumelela motho go tsena, ge e se Petro le Johane le Jakobo, le tatago ngwana le mmagwe. ₅₂Ka moka ba be ba lla ba mo hlokofalela. Jesu a re: Lesang go lla; ga a hwa; o robetše.

₅₃Bona ba mo sega, gobane ba be ba tseba gobane o hwile. ₅₄Yena a ba ntšhetša ntle ka moka, a swara seatla sa ngwanenyana, a hlaboša lentšu a re: Ngwanaka, tsoga! ₅₅Ya ba gona moya wa gagwe o boa, a tsoga. Jesu a ba laela a re a fiwe dijo. ₅₆Batswadi ba gagwe ba tlabega. Mme yena a ba laela a re, tše di diregilego ba se ke ba di botša motho.