MATEO 10

₁Ya re ge a biditše barutiwa ba gagwe ba lesome le metšo e mebedi, a ba fa matla a go leleka meoya ya ditšhila, le a go fodiša malwetši ka moka le mefokolo ka moka. ₂Ge e le maina a baapostola ba lesome le metšo e mebedi šea: Wa pele ke Simone e a reetšwego la Petro, le Andrea ngwanabo; le Jakobo morwa wa Tsebedeo, le Johane ngwanabo; ₃le Filipi le Baratolomeo; le Tomase le Mateo wa lekgetho; le Jakobo morwa wa Alifeo; le Lebeo wa go ekeletšwa ka la Tadeo; ₄le Simone wa Kana, le Judase Isikariote wa go mo eka.

₅Ke bona ba lesome la metšo e mebedi ba Jesu a ba romilego, a ba laela a re: Le se ke la fapogela tseleng ya go ya go ba ditšhaba; le gona le se ke la tsena motseng wa ba Samaria. ₆Le phegelele go ya go dinku tše di timetšego tša moloko wa Isiraele. ₇Le sepele le tšame le re: Mmušo wa magodimo o batametse. ₈Fodišang balwetši; tsošang bahu; thakgafatšang ba lephera; lelekang meoya e mebe. Le filwe fela; le lena fang fela. ₉Le se ke la ipabalela ka gauta le ge e le ka silifera dikgwameng tša lena. ₁₀Le mekotla ya leeto, le ge e le kobo ya bobedi, le ge e le dieta, le ge e le lepara, le se ke la tloga natšo! Gobane mohlanka sa gagwe ke go newa dijo.

₁₁Ge le tsena motseng goba motsaneng, le botšiše ge go ka ba le e a swanetšego go iwa go yena; Le ye le dule ga gagwe, le be le fetele pele. ₁₂E re ge le tsena lapeng, le dumediše ba gona. ₁₃Gomme ge lapa leo le swanetše, gona molao wa lena o tlo le tlela; fela, ge le sa swanela, gona molao wa lena o tlo boela go lena. ₁₄Ge motho a sa le amogele, a gana go kwa le dipolelo tša lena, le tloge lapeng leo, le ge e le motseng woo, le hlohlore le lerole la naong tša lena. ₁₅Ruri, ke a le botša, motse woo ka tšatši la kahlolo, -- naga ya Sodoma le Gomora e tlo bona tše kaone.

₁₆Tsebang, ke le roma boka dinku gare ga diphiri; ke gona le hlalefe wa dinoga, le ila bomenetša bjalo ka maeba. ₁₇Le phafogele batho, gobane ba tlo le sekiša dikgorong, mme ba tlo le otla mo diphuthegong tša bona. ₁₈Ba tlo le bega go babuši le dikgoši ka baka laka, ya tlo ba bohlatse, go bona le go ba ditšhaba. ₁₉Ge ba le iša tshekong, le se ke la phoraphora, la re: Re yo reng? Gobane ka lebaka la gona le tlo newa se le tlo go se bolela; ₂₀gobane ga se lena le bolelago, ke Moya wa Tataweno o bolelago ka lena.

₂₁Gomme ngwanabomotho o tlo bolaiša ngwanabo, mme tatago motho o tlo bolaiša ngwana wa gagwe; mme bana ba tlo tsogela batswadi matla ba ba bolaiša. ₂₂Le tlo ba ba ba hloilwego ke bohle ka baka la leina laka. Gomme a tlo go kgotlelela go iša bofelong, ke yena a tlo go phološwa. ₂₃E re ge ba le tlaiša motseng o mongwe, le tšhabele go o mongwe. Ruri, ke a le botša, Morwamotho o tlo tla le sešo la enetša metse ye Isiraele.

₂₄Morutiwa ga a fete moruti wa gagwe ka bogolo, le mohlanka ga a fete mong wa gagwe. ₂₅Go lekane ge morutiwa a eba bjalo ka moruti wa gagwe, le mohlanka ge a eba bjalo ka mong wa gagwe. Ge Mong wa ngwako ba mmiditše Beletsebulu, ba ngwako wa gagwe a ba ka se ba dire tše di fetišago tšeo?

₂₆Le se ke la boifa gee; gobane ga go thopa ye e sa tlo go bipollwa; ga go sephiri se se sa tlo go tsebja. ₂₇Se ke le botšago sona lefsifsing, se boleleng seetšeng; se le se kwago le sebelwa tsebeng le se goelele le le seokamong. ₂₈Le se boife ba ba bolayago mmele, ba sa kgone go bolaya moya; gagolo le boife Eo a kgonago go senya mmele le moya moleteng wa mollo. ₂₉A dithaga tše pedi ga di rekwe ka peni? Gomme le e tee ya tšona e ka se wele fase ge Tataweno a sa rate. ₃₀Ešita la meriri ya dihlogo tša lena e badilwe ka moka! ₃₁Ke gona, se boifeng; le feta dithaga e le tše ntši.

₃₂Mang le mang e a mpolelago pele ga batho, le nna ke tlo mmolela pele ga Tate wa magodimong. ₃₃Gomme e a ntahlago pele ga batho, le nna ke tlo mo lahla pele ga Tate wa magodimong.

₃₄Le se ke la re ke tlile go bjala khutšo lefaseng; ga ka tla go bjala khutšo, ke tliša lerumo. ₃₅Gobane ke tlile go šitanya motho le tatagwe, ngwanenyana le mmagwe, ngwetši le matswalagwe. ₃₆Mme babo motho e tlo ba manaba agwe.

₃₇Yo e rego ge a rata tatagwe le mmagwe, a fetiša go rata nna, ga a swanelwa ke go ba wa ka; mme ge a rata morwagwe le morwedi wa gagwe, a fetiša go rata nna, ga a swanelwa ke go ba waka. ₃₈Le yo a sa tšeego fapano sa gagwe mme a ntšhala morago, ga a swanelwa ke go ba wa ka. ₃₉E a ikhweletšago bophelo bja gagwe, o tlo bo timetša; e a timelelwago ke bjona ka baka la ka, o tlo bo hwetša.

₄₀E a le amogelago, o amogela nna; gomme e a amogelago nna, o amogela E a nthomilego. ₄₁E a amogelago moporofeta ka ge a na le leina la moporofeta, o tlo fiwa tebogo ya moporofeta. E a amogelago moloki ka ge a na le leina la moloki, o tlo fiwa tebogo ya moloki. ₄₂E a gelago e mongwe wa banyenyane ba sego sa meetse a batago, ka ge a na le leina la morutiwa, ruri ke a le botša, a ka se tingwe moputso wa gagwe.