MATEO 16

₁Gwa tla bafarisei le basadutsei ba mo leka; ba mo kgopela ba re a ba bontšhe mohlolo o tšwago legodimong. ₂Jesu a fetola a re: Ka mantšibua le re: Le tlo tsoga go sile, gobane le hubetše. ₃E sa le bosasa le re: Lehono e tlo duma, gobane legodimo le hubetše, le gona go ne maru. -- Lena baikaketši, ponalo ya legodimo le tseba go e hlaologanya, mme mahlola a mabaka le reng le sa a kgone? ₄Moloko o mobe wo wa bahladi o tsoma mohlolo, mme o ka se ke wa fiwa mohlolo o mongwe, ge e se wola wa Jona moporofeta. --

O realo mme a ba tlogela a sepela.

₅Bjale barutiwa ba gagwe, mola ba selela mošola, ba be ba lebetše go tloga le mefago. ₆Jesu a bolela le bona a re: Phafogang, le ile dikomelo tša bafarisei le basadutsei.

₇Ge a realo bona ba eleletša ba re: O ra mefago ye re se kaga ra tšwa nayo.

₈Jesu, ka go tseba tša mo dipelong tša bona, a re: Le eleletšang mo dipelong tša lena? Lena bahlayatumelo! Le re ke ra mphago wo le sa kago la tšwa nawo! ₉A ga lešo la hlaologanya? A ga le sa gopola dinkgwa tšela tše tlhano tša go lewa ke banna ba dikete tše tlhano, le bokae bja diroto tše šetšego natšo? ₁₀Le dinkgwa tšela tše di šupago tša go lewa ke banna ba dikete tše nne, le bokae bja diroto tše le šetšego natšo? ₁₁Bjale le reng le sa hlaologanye gore ke be ke sa bolele mefago, ge ke re: Phafogelang komelo ya bafarisei le basadutsei?

₁₂Ke mo ba lemogilego gobane o be a sa šupe komelo ya magobe; o be a era thuto ya bafarisei le basadutsei.

₁₃Eitše ge Jesu a fihlile mathokong a Kesarea-Filipi, a botšiša barutiwa ba gagwe a re: Batho ge ba bolela Morwamotho ba re ke mang?

₁₄Bona ba re: Ba bangwe ba re o Johane Mokolobetši; ba bangwe ba re o Eliya; ba bangwe ba re o Jeremia goba e mongwe wa baporofeta.

₁₅Jesu a re: Gomme lena le re ke mang?

₁₆Simone Petro a fetola a re: O Kriste Morwa wa Modimo a phelago.

₁₇Ke mo Jesu a fetotšego a re: O wa lehlogonolo wena Simone Morwa-Jona; gobane ga se nama le madi di go utolletšego seo; ke Tate wa magodimong. ₁₈Gomme nna ke go botša ke re: Wena o Petro, o lefsika le ke tlo go aga phuthego yaka godimo ga lona; mme dikgoro tša bodulabahu di ka se ke tša e fenya. ₁₉Ke tlo go nea dikgonyu tša mmušo wa magodimo. Tše o tlogo di tlema mo lefaseng di tlo tlengwa le magodimong. Tše o tlogo di hunolla mo lefaseng di tlo hunologa le magodimong.

₂₀Mohla woo o laetše barutiwa ba gagwe a re ba se ke ba botša motho ge yena e le Kriste.

₂₁Mehla yeo ke ye Jesu a thomilego ka yona go šupetša barutiwa ba gagwe, ge sa gagwe e le go ya Jerusalema le go tlaišwa ka tše ntši ke ba bagolo le baperisita ba bagolo le bamangwalo, le go tsoga ka letšatši la boraro.

₂₂Petro a mmiletša thoko, a thoma go mo phegelela a re: Morena! A nke o lotege, tšeo di se ke tša go diregela.

₂₃Jesu a mo fularela a re: Tloga fa pele ga ka, wena lenaba; o a nkgopiša, gobane ga o eletše tša Modimo, o eleletša tša batho.

₂₄Bjale Jesu a bolela le barutiwa ba gagwe a re: Ge motho a rata go ntšhala morago, a ikgafe, a rwale sefapano sa gagwe, mme a ntatele. ₂₅E a ratago go phološa bophelo bja gagwe, o tlo bo lahla; mme e a lahlago bophelo bja gagwe ka baka la ka, o tlo bo hwetša. ₂₆Gobane motho go tlo mo holang ge a ka rua lefase ka moka mme a senyegelwa moya wa gagwe? Goba motho a ka ntšhang sa go rekolla moya wa gagwe? ₂₇Gobane Morwamotho o tlo tla ka letago la Tatagwe a na le barongwa ba gagwe, ke mo a tlo go putsa mang lemang a mo nea se se lebanego mediro ya gagwe. ₂₈Ruri ke a le botša mo go ba ba emego fa go na le ba ba tlo go bona Morwamotho a etla a le mmušong wa gagwe, bona ba sešo ba kwa lehu.