MATEO 28

₁Sabatha ge e fetile, e sa le ka meso ya letšatši pele la beke, Maria Magdalena le Maria yola e mongwe, ba tla go bona lebitla. ₂Gwa kwala tšhišinyego e kgolo ya lefase ka ge morongwa wa Morena a theoga legodimong, a tla a phikološa leswika la tloga mojako wa lebitla, mme a dula godimo ga lona. ₃A bonala a editše boka legadima, seaparo sa gagwe e le se sešweu bjalo ka leswela. ₄Bahlapetši ba tšhoga ba roromela, ba ba bjalo ka bahu ka go boifa.

₅Morongwa a bolela le basadi bala, a re: Lena le se tšhogeng. Ke tseba gobane le nyaka Jesu yo a bego a bapotšwe sefapanong. ₆Ga a mo; o tsogile bjalo ka ge a boletše. Tlang le bone felo mo a bego a letše gona. ₇Le tsebo hlaganela le eya le botša barutiwa ba gagwe, le re: O tsogile; mme le tsebe ge a tlo le etapele le eya Galilea. Gona kua le tlo mmona. Šedio, ke le boditše.

₈Basadi ba tloga moo lebitleng ka lebelo, ka tšhogo le ka thabo e kgolo; ba kganyela ba re ba yo botša barutiwa ba gagwe.

₉Ge ba sa ya ba gahlana le Jesu; a re: Thabang! Bona ba batamela ba swara maoto a gagwe ba mo lotšha. ₁₀Jesu a bolela le bona a re: Se tšhogeng! Sepelang le botše bana bešo le re ba ye Galilea. Gona kua ba tlo mpona.

₁₁Ya re ba sa ya, ke ge ba bangwe ba bahlapetši ba fihla motseng, mme ba botša baperisita ba bagolo tše di diregilego tšohle. ₁₂Baperisita ba bagolo ba phuthega le ba bagolo, ba lakana, ba nea bahlabani bao tšhelete e ntši, ₁₃ba re: Bolelang le re: Barutiwa ba gagwe ba tlile bošego ba mo utswa, rena re robetše. ₁₄Ge taba yeo e ka kwala go mmuši, ke rena re tlogo mo kgodiša ra le šireletša.

₁₅Bahlapetši ba tšea ditšhelete, ba dira ka mo ba rutilwego ka gona; mme polelo yeo ya ba morero mo go Bajuda le lehono.

₁₆Barutiwa ba lesome le motšo o tee ba ya Galilea, thabeng ye Jesu a ba laetšego. ₁₇Ge ba mmona, ba mo khunamela; ke ge ba bangwe ba sa belaela. ₁₈Jesu a batamela a bolela le bona a re: Ke neilwe maatla ka moka legodimong le lefaseng. ₁₉Ke gona yang le dire ditšhaba ka moka barutiwa ka go ba kolobetša leineng la Tate le la Morwa le la Moya o mokgethwa, ₂₀le ka go ba ruta go boloka tšohle tše ke le laetšego tšona. Gomme tsebang, ke na le lena ka mehla go fihla bofelong bja lefase.