MAREKA 11

₁Ge ba batamela Jerusalema ba etla Betefage le Bethania thabeng ya mehlware, Jesu a roma ba babedi ba barutiwa ba gagwe, ₂a re: Yang motsaneng wo le lebanego nawo. E tlo re ge le tsena gona, la tloga la hwetša pokolwana ye e kgokilwego, e sešogo ya namelwa ke motho. Le e hunolle le e tliše. ₃Ge go ka ba le motho e a tlogo re: Le di direlang? Le tlo re: Morena o a e hloka; o tlo akgofa a e romela fa.

₄Barutiwa ba ya ba hwetša pokolwana e le mojako e tlemilwe ntle mokgotheng; mme ba e hunolla. ₅Ba bangwe ba ba bego ba eme moowe, ba re: Le reng le hunolla pokolwana ye?

₆Barutiwa ba fetola ka mo Jesu a ba laetšego; batho bao ba dumela. ₇Barutiwa ba tliša pokolwana go Jesu, ba e bea dikobo tša bona; mme Jesu a e namela. ₈Batho ba bantši ba ala dikobo tša bona tseleng; ba bangwe ba rema mahlare dihlareng, ba a ala tseleng. ₉Ba ba etilegopele le ba ba latelago, ba goba mogobo ba re: Hosiana! Go retwe e a tlago ka leina la Morena. ₁₀Go retwe mmušo o tlago wa Dafida tatawešo. Hosiana magodimodimong!

₁₁Jesu a tsena motseng wa Jerusalema a ya Ntlongkgethwa, a lebelediša tšohle. E šetše e le lebaka la mantšiboa, a tšwa a ya Bethania a na le ba lesome le metšo e mebedi.

₁₂Ka la ka moswana ge a boa Bethania, a ba a swerwe ke tlala. ₁₃A bona sehlare sa mogo se le kgojana, se teteane; a ya ka go re, mohlomongwe a ka hwetša o na le selo. A fihla a hwetša ò se ne selo, ge e se matlakala, ka gobane e be e se lebaka la mago. ₁₄Jesu a bolela le sehlare seo sa mogo a re: Go ka se hlwe go eja motho seenywa sa gago le neng le neng. Barutiwa ba gagwe ba kwa ge a realo.

₁₅Ba tla Jerusalema. A re a tsena Ntlongkgethwa, a thoma go leleka ba ba bapatšago le ba ba rekago moo Ntlongkgethwa, a uša dithalana tša ba ba rekanyago ditšhelete, a tekola ditulo tša babapatši ba maeba. ₁₆A se ke a dumela ge motho a sepela Ntlongkgethwa a rwele morwalo wa thoto. ₁₇A ruta batho a re: A ga go a ngwalwa gwa thwe: Ngwako wa ka ba tlo re ke Ngwako wa thapelo! Mme lena la o dira legolo la bahlakodi.

₁₈Baperisita ba bagolo le bamangwalo ba mo kwa ge a realo, ba yo loga maano a go ka mmolaya, ka gobane ba be ba mmoifa ka ge setšhaba ka moka se tlabja ke thuto ya gagwe.

₁₉Ge e šetše e le mantšiboa, a tloga a tšwa motseng.

₂₀Ka la ka moswana ge ba feta, ba bona mogo wola o omeletše le medu. ₂₁Petro, ka go elelwa tša maabane, a re: Moruti, bona mogo wola wo o o rogilego, o omeletše.

₂₂Jesu a fetola a re: Bang le tumelo ya go dumela Modimo. ₂₃Ruri, ke a le botša, motho e a kago bolela le thaba ye, a re: Tloga fa o yo ikwetša lewatleng, a realo a sa dikadike pelong ya gagwe, a dumela gore tše a di bolelago di tlo direga, di tlo mo diregela. ₂₄Ke ka baka leo ke le botšago ke re: Tšohle tše le kago di kgopela le rapela, le dumele gore le tlo newa; gomme le tlo fiwa. ₂₅E re ge le eme le rapela, le rapele le lebaletše yoo a nago le taba le lena, gore le Tataweno wa magodimong a le lebalele dikarogo tša lena. ₂₆Ge le sa lebalele, le Tataweno wa magodimong a ka se le lebalele dikarogo tša lena.

₂₇Ba boela ba tla Jerusalema. Ya re a itshepelela Ntlongkgethwa, gwa tla baperisita ba bagolo, le bamangwalo le ba bagolo. ₂₈Ba mmotšiša ba re: Tše o di dirago o di dira ka matlamang? Gomme ke mang e a Go filego matla a gore o di dire?

₂₉Jesu a fetola a re: Le Nna ke tlo le botšiša taba e tee fela; le mphetole, ke mo ke tlo go le botša mo go tšwago matla a ke dirago ka ona. ₃₀A kolobetšo ya Johane e be e etšwa legodimong, goba e be e etšwa bathong? Mphetoleng!

₃₁Bona ba eletšana ba re: Ge re ka re e be e etšwa legodimong, o tlo re: Ge le sa ka la mo dumela, le be le reng? ₃₂Ba re: Ge re ka re e be e etšwa bathong, go realo re boifa batho, gobane ka moka ba re Johane ke moporofeta. ₃₃Ba fetola Jesu ba re: Ga re tsebe.

Jesu a re: Gona le nna ga ke le botše mo go tšwago matla a ke dirago ka ona.