MAREKA 14

₁Paseka monyanya wa dinkgwa tše di se nago komelo, e šetše e batametše, go sa šetše matšatši a mabedi fela, baperisita ba bagolo le bamangwalo ba lakana ba re ba mo sware ka maano, ba mmolaye. ₂Ba re: Fela, re se ke ra di dira bjale monyanyeng, go se tlo tsoga moferefere setšhabeng.

₃Ke ge Jesu a le Bethania ngwakong wa Simone wa lephera, a dutše dijong. Gwa tla mosadi a swere sebjana se se nago le setlolo sa theko o kgolo; a thibolla sebjana, a tšhela setlolo hlogong ya Jesu. ₄Ba bangwe ba mo tsota ba re: O reng a senya setlolo seo? ₅Setlolo seo se ka be se rekile mašeleng a makgolo a mararo, mme gwa fiwa badiitšana. Ba mo nyamiša ka go realo.

₆Jesu a re: Mo leseng! Le mo nyamišetšang? Se a ntirilego sona ke modiro o mobotse. ₇Badiitšana le na nabo ka mehla; ge e le nna, le ka se be le nna ka mehla. ₈Mosadi e o dirile se a se kgonnego; o šetše a dirile se se tlo go swanela go dirwa mmele wa ka ge o bolokwa. ₉Ruri, ke a le botša, mo Ebangedi e tlo go kwatswa lefaseng ka moka go tlo bolelwa se a se dirilego, gore a se lebalwe.

₁₀Judase Isikariote, e le e mongwe wa ba lesome le metšo e mebedi, a tloga moo a ya go baperisita ba bagolo, gore a mo gafele bona. ₁₁Bona ge ba mo kwa, ba thaba, ba mmalela tšhelete ye ba tlo go mo nea. Mme yena a hlwa a lebeletše lebaka la go mo eka.

₁₂Ka letšatši la pele la dinkgwa tše di se nago komelo, la go hlaba kwana ya Paseka, barutiwa ba gagwe ba mmotšiša ba re: O rata ge re ya kae ra yo lokiša mo o tlogo ja Paseka?

₁₃Jesu a roma ba babedi ba barutiwa ba gagwe, a re: Yang motseng; le tlo gahlana le motho e a rwelego moeta wa meetse. Mo lateleng. ₁₄Gomme mo a tlo go tsena, le botše mong wa ngwako le re: Moruti o re: Ngwako o kae wo nkago jela Paseka go wona le barutiwa ba ka? ₁₅O tlo le laetša ngwako o mogolo wa tletlolo, wo o adilwego magogwa wa thakgwa. Le re lokišetše gona fao.

₁₆Barutiwa ba sepela, ba fihla motseng, mme ba hwetša tše ba boditšwego tšona; ba lokiša Paseka.

₁₇E šetše e le mantšibua Jesu a tla le ba lesome le metšo e mebedi. ₁₈Ya re ge ba šetše ba dutše dijong ba eja, Jesu a bolela a re: E mongwe wa lena, e a jago le Nna, o tlo nkeka.

₁₉Ba thoma go nyama dipelo, ba mmotšiša ka o tee ka o tee, ba re: A e ka ba nna?

₂₀Jesu a fetola a re: Ke e mongwe wa lena ba lesome le metšo e mebedi; ke yo a tlo go ina le nna morufsing. ₂₁Ge e le Morwamotho, yena o ikela ka mo mangwalo a mmoletšego; fela, yo madimabe ke motho eo a mo ekago. Go ka be go le kaone ge a ka be a sa ka a tswalwa.

₂₂Ya re ge ba eja, Jesu a tšea senkgwa, a se šegofatša, a se ngwathaganya, a ba neela a re: Tšeang le je; ke mmele wa ka.

₂₃A tšea le senwelo, a leboga, a ba neela sona, ba nwa ka sona ka moka ga bona. ₂₄Yena a re: Ke madi a ka a kgwerano e mphsa, a a tšhollwago ka baka la ba bantši. ₂₅Ruri, ke a le botša, nka se ke ka hlwa ke enwa seenywa se sa morara, go fihla mehleng yeo ke tlo go buša ke se nwa mmušong wa Modimo.

₂₆Ge ba opetše kopelo, ba tloga ba ya thabeng ya mehlware.

₂₇Jesu a bolela le bona a re: Lena ka moka bošego bjo le tlo gakanega ka tše ke tlo go di dirwa; gobane go ngwadilwe gwa thwe: Ke tlo otla modiši; mme dinku di tlo gašanywa. ₂₈Fela, e tlo re ge ke tsogile, ke tlo Le etapele ra ya Galilea.

₂₉Gwa fetola Petro a re: Le ge bohle ba ka gakanega, nna aowa!

₃₀Jesu a re: Ruri, ke a go botša, bošego bjo bja lehono, mogogonope o sešo wa lla gabedi, o tlo ba o latotše gararo wa re ga o ntsebe.

₃₁Petro a buša a bolela a tiiša a re: Le ge nka thwe ke hwe nago, nka se ke ka latola ka realo.

₃₂Ya ba gona ba fihlago felo go bitšwago Getsemane. Jesu a bolela le barutiwa ba gagwe a re: Dulang mo, ke be ke rapele. ₃₃A tloga le Petro le Jakobo le Johane, mme a thoma go roromela le go tlalelwa. ₃₄A bolela nabo a re: Moya wa ka o nyamile ka gagolo wa go iša lehung; dulang fa le phakgame.

₃₅A fetela pejana, a wela fase, a rapela a re ge go kgonega lebaka le le fete le mo tloge. ₃₆A re: Baba, Tate! Ke Wena o kgonago tšohle. Suthiša senwelo se se ntloge. Fela, e se be ka mo go ratago nna; e be ka mo go ratago wena.

₃₇A tla a ba hwetša ba robetše; a bolela le Petro a re: Simone! A o robetše? A ga wa ka wa kgona go itiša nako e tee fela? ₃₈Phakgamang le rapele, gore le se tsene melekong; gobane moya o mafolofolo, mme nama e a fokola.

₃₉A buša ya a rapela, a boeletša ona mantši ao. ₄₀A boa, a ba hwetša gape ba robetše, mahlo a bona a imelwa ke boroko, ba sa tsebe se ba mo fetolago sona.

₄₁A tla la boraro, a bolela nabo a re: A le sa robetše le khutša? Go hwetše; lebaka le fihlile. Tsebang, Morwamotho o gafelwa matsogong a badiradibe. ₄₂Emang! Eriyeng! E a nke kago šo o batametše.

₄₃A sa realo ke ge go etla Judase Isikariote; e le e mongwe wa ba lesome le metšo e mebedi, a tla a na le lešaba le lentši la ba ba swerego marumo le melamo, ba etšwa go baperisita ba bagolo le go bamangwalo, le go ba bagolo. ₄₄Gomme yena moeki o be a lakane le bona a re: Yo ke tlo go mo atla, ke yenaeo le tloge nae le mo tiišitše.

₄₅Bjale a tšwelela, a batamela, a re: Moruti! Moruti, a mo atlaatla. ₄₆Ke mo bala ba išitšego matsogo ba swara Jesu. ₄₇E mongwe wa ba ba emego moo a kgwamola tšhoša a rema mohlanka wa moperisita e mogolo, a mo kgaola tsebe, ₄₈Jesu a thoma go bolela a re: Le tšwile wa go tšwela mohlakodi ka marumo le melamo, e le go swara Nna, ₄₉ke bego ke na le lena ka mehla ke ruta Ntlongkgethwa; moo le so ntshware. Fela, a go phethege mangwalo.

₅₀Ya ba gona barutiwa ba mo tlogelago bohle ba tšhaba.

₅₁Lesogana le lengwe la mo latela, le iphuthile ka lešela, mmeleng le hlobotše. Gomme banna ba le swara. ₅₂Lesogana la ba tlogelela lešela leo la ba phonyokga le hlobotše.

₅₃Jesu ba mo iša go moperisita e mogolo. Gwa phuthega baperisita ba bagolo bohle, le ba bagolo, le bamangwalo. ₅₄Petro a latela ka kgole; a tla a tsena lapeng la moperisita e mogolo, a dula le bahlanka a ikomoša mollong. ₅₅Baperisita ba bagolo le pitšo ka moka ba nyaka bohlatse bja gore ba bolaiše Jesu; ba bo hloka. ₅₆Ba bantši ba mmega ka bohlatse bja maaka, gwa hlokwa bohlatse bja go kwana.

₅₇Ba bangwe ba eme ba mmega ka maaka ba re: ₅₈Re mo kwile ge a re: Ke tlo phušola Ntlokgethwa ye e dirilwego ka diatla; gomme e nngwe e sa kago ya dirwa ka diatla ke tlo e aga ka matšatši a mararo. ₅₉Fela, le moo bohlatse bja bona ga bja ka bja kwana.

₆₀Gwa ema yena moperisita e mogolo, a botšiša Jesu a re: A ga o fetole selo? Ke eng se batho ba ba go begago ka sona?

₆₁Jesu a homola a se fetole selo. Moperisita e mogolo a buša a mmotšiša a re: A ke wena Kriste Morwa wa Yena Moretiwa?

₆₂Jesu a re: Ke nna! Gomme le tlo bona Morwamotho a dutše ka letsogong le letona la Yomaatla, a etla ka maru a legodimo.

₆₃Moperisita e mogolo a gagola diaparo tša gagwe, a re: Re sa nyaka dihlatse tšang? ₆₄Le mo kwile ge a roga Modimo; le reng?

Ka moka ba ahlola ba re o swanetšwe ke go ahlolelwa polao.

₆₅Ke mo ba bangwe ba thomilego go mo tšhwela ka mare, ba mo khupetša sefahlogo, ba mo setla, ka matswele ba re: Porofeta! Le bahlanka ba mo phasola dithama.

₆₆Petro, yena o be a dutše kwa tlase lapeng. Gwa tla e mongwe wa basetsana ba ga moperisita e mogolo. ₆₇A re go bona Petro a ikomoša, a mo tsepelela a re: Le wena o be o na le monna eo wa Natsaretha, Jesu yo.

₆₈Petro a latola a re: Ga ke tsebe tše o di bolelago; ga ke di kweše. A tšwela kgorong, mme mogogonope wa lla.

₆₉Mosetsana yola a mmona; a boeletša, a botša ba ba emego moo, a re: Monna e ke e mongwe wa bona. ₇₀Petro a buša a latola.

Ge go fetile lebakanyana, ba ba emego moo ba boela ba bolela le Petro, ba re: Ka kgonthe, o wa bona. O Mogalilea le gona; le mmolelo wa gago o iša moo.

₇₁Petro a thoma go ithoga, le go ena, a re: Motho eo le mmolelago, nna ga ke mo tsebe.

₇₂Ke ge mogogonope o lla la bobedi. Petro a elelwa tše Jesu a mmoditšego tšona ge a re: Mogogonope ge o lla la bobedi, o tla ba o latotše gararo wa re ga o ntsebe. A re go elelwa tšeo, a lla.