MAREKA 5

₁Ba fihla mošola wa lewatle nageng ya ba Gadara. ₂Ge ba sa fologa leselawatle, ba napa ba gahlana le motho e a nago le moya wa ditšhila a etšwa mabitleng, ₃Yo bodulo bja gagwe bo bego bo le mabitleng. Gomme go be go se motho e a kgonnego go mo tlema, le ge e le ka ditshipi. ₄Gobane o be a šetše a tlemilwe ka marala le ka ditshipi; mme ditshipi a di konoganya, a kgaola marala go se motho e a kgonago go mo thapiša. ₅O be a dula mabitleng bošego le mosegare, a fela a goa a ithuma ka mabje.

₆Ya re ge a bona Jesu a sa le kgole, a kitima a tla a mo khunamela, a hlaboša lentšu a re: ₇Ke na le taba mang le wena Jesu Morwa wa Modimo yo godimodimo? Ke go phegelela ka Modimo ke re o se ke wa ntlaiša. ₈A realo ka gobane Jesu o be a itše: Tšwa go motho yoo, wena moya wa ditšhila!

₉A mmotšiša a re: Leina la gago o mang?

A fetola a re: Ke nna Madira, gobane re ba bantši. ₁₀A mo phegelela a re Jesu a se ke a mo leleka nageng yeo.

₁₁Bjale, go be go na le mohlape o mogolo wa dikolobe, di fula modutameng wa thaba. ₁₂Meoya e mebe yeo ka moka ya mo kgopela ya re: Re romele dikolobeng tšeo, re yo tsena go tšona. ₁₃Jesu a dumela. Meoya ya ditšhila ya tšwa, ya tsena dikolobeng; mme mohlape ka moka wa iphekemetša ka legaga wa kodumela lewatleng; dikolobe tše e ka bago tše dikete tše pedi tša hwela lewatleng.

₁₄Badiši ba tšona ba tšhaba, ba yo bolela motseng le mašemong; batho ba tla go bona se se diregilego. ₁₅Ba fihla go Jesu, ba bona motho yola wa meoya e mebe a dutše, a apere, a bego a na le “madira”; mme ba tšhoga. ₁₆Ba ba di bonego ba ba anegela se se diregetšego motho yoo wa meoya e mebe, le tša dikolobe.

₁₇Bjale ba thoma go kgopela Jesu, ba re a tloge mellwaneng ya bona.

₁₈Ge Jesu a sa re ke namela leselawatle, motho yola a bego a na le meoya e mebe, a mo kgopela go ka ya le yena.

₁₉Jesu a se mo dumelele, a mo laela a re: Boela gae go ba geno, o ba botše tše kgolo tše Morena a go dirilego tšona, ka mo a go gaugetšego.

₂₀Motho yoo a tloga a ya le naga ya Dekapoli, a kwalakwatša tše kgolo tše Jesu a mo dirilego tšona; bohle ba tlabega.

₂₁Eitše ge Jesu a seletše mošono ka leselawatle, a phuthegelwa ke lešaba le lentši, yena a sa le lešing la lewatle. ₂₂Ke ge go fihla e mongwe wa ba bagolo ba phuthego, yo leina la gagwe e lego Jairo; a re go bona Jesu, a wela fase maotong a Jesu. ₂₃A mo rapela a re: Morwedi wa ka o a felela. A nke o tle o mmee diatla a phologe a phele.

₂₄Jesu a ya nae; lešaba le lentši la mo latela, la ba la mo pitlaganya.

₂₅Gomme go be go na le mosadi e a bego a feditše nywaga e lesome le metšo e mebedi a babja ke bolwetši bja ngope. ₂₆O be a tlaišegile ka tše ntši ka dingaka tše ntši, a feditše dilo tša gagwe ka moka ka go alafsa a sa fole, bolwetši bja gagwe bo fela bo befa. ₂₇A ba a botšwa tše Jesu a di dirago; a tla a le gare ga lešaba, a kgwatha kobo ya Jesu ka morago. ₂₈Gobane o be a re: Ge nka fo kgwatha kobo ya gagwe fela, ke tla fola.

₂₉Ka kgonthe mothopo wa madi a gagwe wa gopa, a kwa mo mmeleng wa gagwe a fodile bohloko bjoowe. ₃₀Jesu ge a ekwa ge mo go yena go tšwele maatla, a napa a retologa a le gare ga lešaba, a re: Ke mang a kgwathilego kobo ya ka?

₃₁Barutiwa ba gagwe ba re: Ge o bona lešaba le go pitlaganya, a o sa re: Ke kgwathilwe ke mang?

₃₂Jesu a ba dikološa mahlo gore a bone yoo a di dirilego. ₃₃Ke mo mosadi yoo a tšhogilego a roromela, gobane a tseba se a se dirilwego; a tla a mo khunamela a mmotša tšohle a se ute selo. ₃₄Jesu a re: Ngwanaka! Tumelo ya gago e go phološitše; sepela o rotše pelo, o fodile bohloko bja gago.

₃₅A re a sa bolela, gwa fihla ba ga mogolo wa phuthego, ba re: Morwedi wa gago o hwile. Moruti yoo o sa mo lapišetšang?

₃₆Jesu ge a ekwa ba realo, a bolela le mogolo wa phuthego a re: Se tšhoge! Sa gago a e be go dumela. ₃₇A ya a na le Petro le Jakobo le Johane ngwanabo Jakobo, a se dumele ge go latela ba bangwe. ₃₈A fihla ngwakong wa mogolo wa phuthego, a bona lešata, ge ba lla ba golola ka gogolo. ₃₉A tsena a ba sola a re: Le tlaletšang lešata? Le reng le lla? Ngwanenyana yo ga a ka a hwa; o robetše.

₄₀Bona ba mo sega. Yena a ba lelekela ntle bohle, a bitša tatago ngwanenyana le mmagwe, le bao a bego a tlile nabo a tsena nabo moo ngwanenyana a letšego gona. ₄₁A mo swara ka seatla, a re: Thalitha kumi! Ke go re: Mosetsanyana, ke re: Tsoga!

₄₂A sa realo ke ge mosetsanyana a tsoga, a sepela. E be e le wa nywaga e lesome le metšo e mebedi. Batho ba swarwa ke tlalelo e kgolo. ₄₃Jesu a ba laela ka maatla, a re taba ye e se tsebje ke motho; a re ngwanenyana a fiwe dijo.