MAREKA 9

₁A bolela le bona a re: Ruri, ke a le botša, mo go bona mmušo wa Modimo o etla ka maatla.

₂Ge go fetile matšatši a selelago, Jesu a tloga a na le Petro le Jakobo le Johane, a ba iša thoko thabeng e telele ba nnoši; mme a fetoga lebopo ba mo lebeletše. ₃Diaparo tša gagwe tša taga di phadima bjalo ka leswela; mo lefaseng ga go na mohlatswi e a kgonago go hlatswa seaparo sa šweufala ka mokgwa woo. ₄Ba bona Eliya le Moshe ba bolela le Jesu. ₅Petro a bolela a re: Moruti, ke mo go botse ge re le fa. Re tlo aga mekutwana e meraro. O mongwe e be wa gago; o mongwe e be wa Moshe; o mongwe e be wa Eliya. ₆A realo a sa tsebe se a se bolelago, gobane ba be ba tšhogile gagolo.

₇Gwa tla leru la ba apeša ka thiti, gwa kwala lentšu le etšwa lerung, la re: Yo ke yena Morwamoratwa wa ka; le mo kwe. ₈Ya re ge ba sa re re iša mahlo, ba se hlwe ba bona motho, ba bona ba šetše le Jesu a nnoši.

₉Ge ba fologa thabeng, Jesu a ba laela a re ba se ke ba botša motho tše ba di bonego, ge e se ge Morwamotho a tsogile bahung.

₁₀Taba ye ya dula ba e utile, ba botšišana seng sa bona ba re: Go tsoga bahung ke eng? ₁₁Ba mmotšiša ba re: Hleng bamangwalo ba re Eliya o swanetše go tla pele?

₁₂A fetola a re: Ge e le Eliya ke tla, gore a lokiše tšohle. Ge e le Morwamotho o tlo tlaišwa ka tše nyatšwa. A mangwalo ga a realo. ₁₃Gomme ke a le botša, Eliya o tlile mme ba mo dira ka mo ba ratilego, bjalo ka ge a boletšwe ke mangwalo.

₁₄Ge ba fihla go barutiwa ba bangwe, ba bona lešaba le lentši le ba beile gare, ba fetolana le bamangwalo. ₁₅Lešaba leo ka moka la re go bona Jesu la tšhoga; ba mo kitimela ba mo dumediša. ₁₆Yena a botšiša bamangwalo a re: Le fetolanang le bona?

₁₇Gwa fetola e mongwe wa gare ga lešaba, a re: Moruti! Ke tlišitše morwa wa ka go wene. O na le moya wa semuma. ₁₈Moya woo, mo o mo swarago o a mo akgaakga, a ntšha mahulo, a tsikitlana meno, mme a omelela. Ke boletše le barutiwa ba gago, ka re ba leleke moya wo; fela, ba paletšwe.

₁₉Jesu a fetola a re: Aowii! Moloko o sa dumelego! Ke tlo ba le lena go le gokae? Ke tlo le kgotlelela go le gokae? Mo tlišeng fa go nna. ₂₀Ba mo tliša go yena.

Ya re ge ngwana yoo a mmona, moya wa tloga o mo utlautla, a wela fase a pshikologa a ntšha mahulo. ₂₁Jesu a botšiša tatagwe a re: E šetše e le lebaka le le kae a le bjalo?

Tatagwe a re: Go tloga bjaneng. ₂₂A re: Ke gantši moya o mobe o mo lahlela mollong le meetseng, o nyaka go mmolaya. Bjalo, ge o ka ba le se o se kgonago, re šokelwe o re hlakodiše.

₂₃Jesu a re: Ge o ra go kgona, dilo tšohle di kgonwa ke e a dumelago.

₂₄Ya ba gona tatago ngwana a goeletšago, a bolela ka megokgo a re: Morena! Ke a dumela. Ntlhakodiše go se dumeleng.

₂₅Bjale Jesu ge a bona batho ba kitimela ba tlala moo, a kgalema moya woo wa ditšhila, a re: Wena moya wa semuma le sefofu, ke nna ke go laelago ke re: Tšwaa go motho yo; o se ke wa hlwa o mmoela.

₂₆Gomme moya wa tšwa ka go goa le ka go mo utlautla o šoro; ngwana yoo a ka mohu; ba bantši ba ba ba re o hwile. ₂₇Jesu a mo swara ka seatla, a mo tsoša a ema.

₂₈Ya re, Jesu a tsene ngwakong, barutiwa ba gagwe ba mmotšiša thopeng, ba re: Ke ka baka lang ge rena re paletšwe go leleka moya woo?

₂₉Jesu a re: Mohuta woo o ka se ke wa tšwa ge e se ka thapelo le ka go ikona.

₃₀Ge ba tloga moo, ba ralala le naga ya Galilea, a se rate go tsebja. ₃₁A ruta barutiwa ba gagwe a re: Morwamotho o tlo gafelwa diatleng tša batho; mme ba tlo mmolaya; mme e tlo re ge a bolailwe a tsoga ka letšatši la boraro.

₃₂Barutiwa taba yeo ba se e kwišiše; fela, ba šia go mmotšiša.

₃₃A tla motseng wa Kaperenaume. Ya re ge ba le ngwakong, a ba botšiša a re: Le be le fetolana eng tseleng?

₃₄Bona ba homola, ka gobane ba le tseleng ba be ba tšere kgang ya go re e mogolo ke mang. ₃₅Jesu a dula, a bitša ba lesome le metšo e mebedi, a bolela a re: E a ratago go ba e mogolo, a e be e monyenyane go bohle le mohlanka wa bohle. ₃₆A tšea ngwana a mmea gare ga bona, a mo gokara, a bolela le bona a re: ₃₇E a amogelago e mongwe wa bana ba ka baka la leina la ka, o amogela nna. Gomme e a nkamogelago ga a amogele nna, o amogela e a nthomilego.

₃₈Johane a mmotša a re: Moruti, re bone motho a leleka meoya e mebe ka leina la gago, a sa sepele le rena; ra mo iletša ka gobane a sa sepele le rena.

₃₉Jesu a re: Se mo iletšeng, gobane ga go motho e a kago dira mohlolo ka leina la ka, a tloga a nkgoboša. ₄₀E a sa lwego le rena, o a re lwela. ₄₁Gobane e a kago le noša segwana sa meetse ka leina la ka, ruri, ke a le botša, a ka se hlokišwe moputso wa gagwe.

₄₂Gomme e a kago kgopiša e mongwe wa ba banyenyane ba ntumelago ba, yena go ka be go le kaone ge lwala la go šila le ka tlemelwa molaleng wa gagwe, mme a lahlelwa lewatleng. ₄₃Le mohla seatla sa gago se go kgopiša, se ripe. Go kaone ge o tsena bophelong o le tsogwane, wa se lahlelwe moleteng, mollong o sa timego o na le diatla tše pedi, ₄₄wa ya mo seboko sa bona se sa hwego, mo mollo o sa timego. ₄₅Le gona ge lenao la gago le go kgopiša, le ripe. Go kaone ge o tsena bophelong o hlotša, wa se lahlelwe moleteng, mollong o sa timego o na le dinao tše pedi, ₄₆wa ya mo seboko sa bona se sa hwego, mo mollo o sa timego. ₄₇Le gona ge leihlo la gago le go kgopiša, le gonye. Go kaone ge o tsena mmušong wa Modimo o le moihlwe, wa se lahlelwe moleteng o na le mahlo a mabedi, ₄₈wa ya mo seboko sa bona se sa hwego, mo mollo o sa timego.

₄₉Gobane mang le mang o tlo nokwa ka mollo, gobane didimo ka moka di nokwa ka letswai.

₅₀Letswai ke selo se botse; fela, ge le tapologa, le sa tlo nokwa kang?

Dulang le na le letswai, le phedišane ka leago.