NEHEMIA 11

₁Bagolo ba setšhaba ba na ba aga motseng wa Jerusalema; ge e le ba bangwe ba setšhaba ba dira matengwa a gore mo go ba lesome go tšwe o tee, a dule motseng wa Jerusalema, motseng o mokgethwa; ba senyane ba ye ba dule metseng e mengwe. ₂Gomme banna ba ilego go dula Jerusalema ka go ithatela, bona setšhaba se ba šegofaditše. ₃Bakgoma ba dilete ba be ba agile Jerusalema, mola ba agile le kua metseng ya Juda; e mongwe le e mongwe o be a dula lapeng la gagwe motseng wa gabo wa Baisiraele, ba na le baperisita le Balefi le bahlanka ba Ntlokgethwa, le ba leloko la bahlanka ba Salomo.

₄Ba bangwe ba leloko la Juda le la Benyamini ba be ba agile Jerusalema. Ba leloko la Juda e be e le Athaya morwa wa Usia morwa wa Sefatya morwa wa Mahalaliele wa gaPheretse, ₅le Maaseya morwa wa Baruki morwa wa Kolohose morwa wa Hosaya morwa wa Adaya morwa wa Joyariba morwa wa Sakaria morwa wa Siloni. ₆Ba ga Pheretse ka moka ba ba dutšego Jerusalema e be e le ba makgolo a mane le masome a selelago a metšo e seswai, banna ba bagale.

₇Babenyamini šeba:

Ke Salu morwa wa Mesulama morwa wa Joede morwa wa Pedaya morwa wa Kolaya morwa wa Maaseya morwa wa Ithiele morwa wa Jesaya. ₈A hlatlangwa ke Gabai le Salai, e le ba makgolo a senyane a masome a mabedi a metšo e seswai. ₉Mohlapetši wa bona e be e le Sikiri; mohlapetši wa bobedi wa motse e be e le Juda morwa wa Senua.

₁₀Baperisita ba ba bego ba dutše motseng wa Jerusalema e be e le Jedaya morwa wa Joyariba, le Jakini, ₁₁le Seraya morwa wa Hilikia morwa wa Mesulama morwa wa Tsadoko morwa wa Merayothe morwa wa Ahitobo, e bego e le modiši wa Ngwako wa Modimo, ₁₂le bana ba bobona ba ba dirago modiro Ngwakong wa Modimo; e be e le ba makgolo a seswai le masome a mabedi a metšo e mebedi; le Adaya morwa wa Jerohama morwa wa Pelalia morwa wa Amatsi morwa wa Sakaria morwa wa Pashuri morwa wa Malakia, ₁₃le bana babo ba e bego e le bagolo ba meloko, e be e le ba makgolo a mabedi a nago le masome a mane a metšo e mebedi; le Amasai morwa wa Asariele morwa wa Ahasai morwa wa Mesilemothe morwa wa Imere, ₁₄le bana babo ba bagale e be e le ba lekgolo le masome a mabedi a metšo e seswai; mohlapetši wa bona e be e le Sabadiele morwa wa Gedolima.

₁₅Ba Balefi e be e le Semaya morwa wa Hasuba morwa wa Asirikama morwa wa Hasabja morwa wa Buni, ₁₆le Sabathai, le Josabadi, e lego ba bangwe ba bagolo ba Balefi ba ba beetšwego mo Ngwakong wa Modimo; ₁₇le Mathanya morwa wa Mika morwa wa Asafa yena mohlabeledi wa pele dikopelong tša dithapelo, mme Bakabukia e be e le wa bobedi mo go bana babo; le Abada morwa wa Samua morwa wa Galala morwa Jeduthune. ₁₈Balefi ka moka ba ba dutšego motseng o mokgethwa e be e le ba makgolo a mabedi le masome a seswai le metšo e mene.

₁₉Baletakgoro boAkuba le Talamoni le bana ba bobona ba go leta dikgoro e be e le ba lekgolo le masome a šupago le metšo e mebedi.

₂₀Ba bangwe ba Baisiraele le ba baperisita le Balefi ba be ba dutše metseng ya Juda mo dinageng tša bona. ₂₁Bahlanka ba Ntlokgethwa bona ba be ba agile mmotong wa Ofele; bahlapetši ba bona e be e le Tsiage le Gisipa.

₂₂Mohlapetši wa Balefi motseng wa Jerusalema e be e le Usi morwa wa Bani morwa wa Hasabja morwa wa Mathanya morwa wa Mika, e mongwe wa barwa ba Asafa, e be e le bona ba ba dirago modiro wa baopedi Ngwakong wa Modimo. ₂₃Gobane taelo ya kgoši ka baka la bona e be e le gore baopedi ka mehla ba fiwe se se ba lebanego.

₂₄Petaya morwa wa Mesesabiele wa ga Sera morwa wa Juda e be e le letona la kgoši ditabeng tša setšhaba ka moka.

₂₅Ge e le ba bangwe ba Bajuda ba kua metsaneng le mašemong ba be ba agile Kireathe-Araba le metsaneng ya gona, le Diboni le metsaneng ya gona, le Jekabasiele le metsaneng ya gona, ₂₆le kua Jeshua, le Molada, le Bethe-Pelethe, ₂₇le kua Hatsara-Suale, le Bereseba le metsaneng ya gona, ₂₈le kua Tsikilaga, le Mekona le metsaneng ya gona, ₂₉le kua Ene-Rimoni, le Tsarea, le Jaramuthe, ₃₀le Sana, le Adulama le metsaneng ya gona, le Lakisi le mašemong a gona, le Aseka le metsaneng ya gona; ba aga go tloga Bereseba go fihla moeding wa Hinomi.

₃₁Babenyamini ba be ba agile metseng e tlogago Gaba ya fihla Aya, le Bethele le metsaneng ya gona, ₃₂le Anathothe, le Nobe, le Ananya, ₃₃le Hatsora, le Rama, le Githaima, ₃₄le Hadidi, le Tseboima, le Nebalathe, ₃₅le Lodi, le Ono moeding wa babetli. ₃₆Balefi ba bangwe ba ba bego ba na le dinaga go la Juda, ba be ba agile le Babenyamini.