NUMERI 1

₁Morena o boletše le Moshe lešokeng la Sinai a le Ngwakong wa Kgwerano, ka la pele la kgwedi ya bobedi, ka ngwaga wa bobedi wa ge ba tšwile Egipita, a re: ₂Balang batho ba phuthego ya Baisiraele, le ye ka meloko ya bona le ka mašika a bona, banna ka moka ka o tee ka o tee; ₃banna ka moka ba nywaga e masome a mabedi le go fetiša fao, ba ba kago tšwa dira mo go. Baisiraele, le ba bale ka mephato ya bona, wena le Arone. ₄Mo molokong o mongwe le o mongwe le hlaole monna o tee wa go le thuša, e lego e mogolo motseng wa tatagwe. ₅Maina a banna ba ba tlogo le thuša šea: Wa leloko la Rubeni ke Elitsuri morwa wa Sedeuri. ₆Wa leloko la Simeone ke Selumiele morwa wa Tsurisadai, ₇wa leloko la Juda ke Nahesone morwa wa Aminadaba. ₈Wa leloko la Isashara ke Nethaniele morwa wa Tsuari. ₉Wa leloko la Sebulone ke Eliaba morwa wa Helone. ₁₀Mo go leloko la Josefa wa la Efuraimi ke Elisama morwa wa Amihudi, wa la Manase ke Gamaliele morwa wa Pedatsuri. ₁₁Wa leloko la Benyamini ke Abidani morwa wa Gideoni. ₁₂Wa leloko la Dani ke Ahiesere morwa wa Amisadai. ₁₃Wa leloko la Asere ke Pagidi morwa wa Okorane. ₁₄Wa leloko la Gada ke Eliasafa morwa wa Dehuele. ₁₅Wa leloko la Nafutali ke Ahira morwa wa Enani. ₁₆Ke bona ba ba kgethilwego ke phuthego, e lego bagolo ba leloko la botatabo, matona a dikgao tša Isiraele. ₁₇Moshe le Arone ba biditše banna bao ba ba boletšwego ka maina; ₁₈ba kgobokanya phuthego ka moka ka la pele la kgwedi ya bobedi; mme batho ba ngwalwa ka go ya ka meloko ya bona, le ka malapa a gabo, gwa balwa e a nago le nywaga e masome a mabedi le a fetišitšego yeo, ka o tee, ka o tee. ₁₉Moshe o ba badile lešokeng la Sinai ka mo Morena a mo laetšego ka gona. ₂₀Ba leloko la Rubeni, yena morwa wa pele wa Isiraele, ba lešika la bona, ka palo ya maina ka o tee ka o tee, ge go balwa banna ka moka ba ba feditšego nywaga e masome a mabedi le e fetago yeo, ka moka ba ba kago tšwa dira, ₂₁go bona bao ba leloko la Rubeni go badilwe ba dikete tše masome a mane a metšo e selelago, le makgolo a mahlano. ₂₂Ba leloko la Simeone, ba lešika la bona, ge go iwa ka meloko le ka malapa, ka palo ya maina, ka o tee ka o tee, ge go balwa banna ka moka ba ba feditšego nywaga e masome a mabedi le e fetago yeo, ka moka ba ba kago tšwa dira, ₂₃go bona bao ba leloko la Simeone go badilwe ba dikete tše masome a mahlano a metšo e senyane le makgolo a mararo. ₂₄Ba leloko la Gada, ba lešika la bona, ge go iwa ka meloko le ka malapa, ka palo ya maina, ge go balwa ba ba feditšego nywaga e masome a mabedi le e fetago yeo, ka moka ba ba kago tšwa dira, ₂₅go bona bao ba leloko la Gada go badilwe ba dikete tše masome a mane a metšo e mehlano le makgolo a selelago a masome a mahlano. ₂₆Ba leloko la Juda, ba lešika la bona, ge go iwa ka meloko le ka malapa, ka palo ya maina, ge go balwa ba ba feditšego nywaga e masome a mabedi le e fetago yeo, ka moka ba ba kago tšwa dira, ₂₇go bona bao ba leloko la Juda go badilwe ba dikete tše masome a šupago a metšo e mene, le makgolo a a selelago. ₂₈Ba leloko la Isashara, ba lešika la bona, ge go iwa ka meloko le ka malapa, ka palo ya maina, ge go balwa ba ba feditšego nywaga e masome a mabedi le go fetiša yeo, ka moka ba ba kago tšwa dira, ₂₉go bona bao ba leloko la Isashara go badilwe ba dikete tše masome a mahlano a metšo e mene, le makgolo a mane. ₃₀Ba leloko la Sebulone, ba lešika la bona, ge go iwa ka meloko le ka malapa, ka palo ya maina, ge go balwa ba ba feditšego nywaga e masome a mabedi le e fetago yeo, ka moka ba ba kago tšwa dira, ₃₁go bona bao ba leloko la Sebulone go badilwe ba dikete tše masome a mahlano a metšo e šupago, le makgolo a mane. ₃₂Ba leloko la Josefa, ba la Efuraimi, ba lešika la bona, ge go iwa ka meloko le ka malapa, ka palo ya maina, ge go balwa ba ba feditšego nywaga e masome a mabedi le go fetiša yeo, ka moka ba ba kago tšwa dira, ₃₃go bona ba leloko la Efuraimi go badilwe ba dikete tše masome a mane, le makgolo a mahlano. ₃₄Ba leloko la Manase, ba lešika la bona, ge go iwa ka meloko le ka malapa, ka palo ya maina, ge go balwa ba ba feditšego nywaga e masome a mabedi le e fetago yeo, ka moka ba ba kago tšwa dira, ₃₅go bona bao ba leloko la Manase go badilwe ba dikete tše masome a mararo a metšo e mebedi, le makgolo a mabedi. ₃₆Ba leloko la Benyamini, ba lešika la bona, ge go iwa ka meloko le ka malapa, ka palo ya maina a bona, ge go balwa ba ba feditšego nywaga e masome a mabedi le e fetago yeo, ka moka ba ba kago tšwa dira, ₃₇go bona bao ba leloko la Benyamini go badilwe ba dikete tše masome a mararo a metšo e mahlano, le makgolo a mane. ₃₈Ba leloko la Dani, ba lešika la bona, ge go iwa ka meloko le ka malapa, ka palo ya maina, ge go balwa ba ba feditšego nywaga e masome a mabedi le e fetago yeo, ka moka ba ba kago tšwa dira, ₃₉go bona bao ba leloko la Dani go badilwe ba dikete tše masome a selelago a metšo e mebedi, le makgolo a šupago. ₄₀Ba leloko la Asere, ba lešika la bona, ge go iwa ka meloko le ka malapa, ka palo ya maina, ge go balwa ba ba feditšego nywaga e masome a mabedi le e fetago yeo, ka moka ba ba kago tšwa dira, ₄₁go bona bao ba leloko la Asere go badilwe ba dikete tše masome a mane a motšo o tee, le makgolo a mahlano. ₄₂Ba leloko la Nafutali, ba lešika la bona, ge go iwa ka meloko le ka malapa, ka palo ya maina, ge go balwa ba ba feditšego nywaga e masome a mabedi le e fetago yeo, ka moka ba ba kago tšwa dira, ₄₃go bona bao ba leloko la Nafutali go badilwe ba dikete tše masome a mahlano a metšo e meraro, le makgolo a mane. ₄₄Ke bona ba ba badilwego, ba Moshe a ba badilwego a na le Arone le mantona ala a lesome le metšo e mebedi a Baisiraele, a a tšwilego ka o tee ka o tee mo molokong o mongwe le o mongwe. ₄₅Baisiraele ka moka ba badilwe, gwa iwa ka meloko ya bona, gwa balwa ba ba feditšego nywaga e mansome a mabedi le e fetago yeo, ka moka ba ba kago tšwa dira mo go Baisiraele. ₄₆Ka moka ba ba badilwego e be e le ba dikete tše makgolo a selelago a metšo e meraro, le makgolo a mahlano a nago le masome a mahlano.

₄₇Balefi bona, ba leloko la gabo bona ga se ba balwa gotee le ba bangwe bao. ₄₈Ka gobane Morena o be a laetše Moshe a re: ₄₉Ge e le moloko wa Balefi o se ke wa o bala wa hlakanya palo ya bona le ya Baisiraele. ₅₀Balefi bona o ba balele Ngwako wa Melao le dilo tša wona ka moka, le tšohle tše e lego tša wona; bona ba rwale Ngwako woo le dibjana tša wona ka moka, ba dire mediro ya wona, ba age mešaša ya bona ba dikologe nawo. ₅₁Ge Ngwako o khuduga, Balefi ba o hlahlamolle. Ge Ngwako o emišwa, o hlongwe ke Balefi. O šele e a kago batamela a bolawe. ₅₂Baisiraele bona ba age mešaša ya bona mo go lego mešaša ya ba gabo, le mo go lego sefoka sa gabo, le mphato wa gabo. ₅₃Balefi bona ba age mešaša ba dikanetše Ngwako wa Melao, gore phuthego ya Baisiraele e se tlo welwa ke kgalefo. Balefi ke ba go šielana madišo a Ngwakong wa Melao. ₅₄Gomme Baisiraele ba dirile tšohle ka mo Morena a laetšego Moshe ka gona.