NUMERI 10

₁Morena o boletše a re: ₂Itirele dinaka tše pedi tša silifera; o di dire ka silifera e batotšwego; e be tša go kgoba phuthego, le go khuduša mešaša. ₃Ge ba letša tšona e be go re phuthego ka moka e phuthegele go wena mojako wa Ngwako wa Kgwerano. ₄Ge go letšwa e tee ya tšona, e be go re matona, balaodi ba madira a Isiraele ba phuthegele go wena. ₅Ge di letswa ka maatla e be go re go hlahlamologe ba mešaša ya thoko ya bohlabela. ₆Ge di letšwa la bobedi ka maatla e be go re go hlahlamologe ba mešaša ya thoko ya borwa; go letšwa ka maatla ge e le go re ba hlahlamologe. ₇Ge e le gore go kgobelwe pitšo, gona di se letšwa ka maatla. ₈Baletši ba dinaka tšeo e be baperisita barwa ba Arone.

E be mokgwa wa lena ka mehla go iša ditlogolong. ₉E tlo re ge le tšwa dira kua nageng ya lena, le elwa le manaba a a le šwahletšego, le letša dinaka ka maatla, le tlo ba le gopolwa pele ga Morena Modimo wa lena, mme la namolelwa diatleng tša manaba a lena. ₁₀Le ka matšatši a ge le thabile, le ka menyanya ya lena, le ka la go balama ga kgwedi, le letše dinaka tšeo ge go tlišwa dihlabelo tša lena le didimo tša lena, gore e be go le tlišetša go gopolwa pele ga Modimo wa lena, nna Morena Modimo wa lena.

₁₁Ka la masome a mabedi la kgwedi ya bobedi ya ngwaga wa bobedi leru le hlatlogile la tloga mo Ntlong ya Molao. ₁₂Baisiraele ba khuduga mo lešokeng la Sinai, makoko a bona a lokologana; gomme leru la ya la ema lešokeng la Parana.

₁₃Ya ba la mathomo ge ba khuduga ka go laelwa ke Morena ka Moshe. ₁₄Ba sefoka sa mešaša ya Bajuda ba tsoga ba ba eta pele ka makoko a bona, Nahesone morwa wa Aminadaba a na le madira a gagwe. ₁₅Nathaniele morwa wa Tsuari a na le madira a ba leloko la Isashara. ₁₆Eliaba morwa wa Helone a na le madira a leloko la Sebulone.

₁₇Le Ntlokgethwa ya hlahlamolwa, Bagerisone le ba Merari ba tsoga ba e rwele.

₁₈Gwa kgona go tsoga ba sefoka sa mešaša ya Barubeni ka makoko a bona; Elitsuri morwa wa Sedeuri a na le madira a gagwe; ₁₉Selumiele morwa wa Tsurišadai a na le madira ba leloko la Simeone; ₂₀Elisafa morwa wa Dehuele a na le madira a leloko la Gada.

₂₁Ya ba gona go tsogilego Bakahathe ba rwele tše kgethwa; ge bona ba fihla ba hweditše Ntlokgethwa e šetše e hlomilwe.

₂₂Gwa latela ba sefoka sa mešaša ya Baefuraimi ka makoko a bona, Elisama morwa wa Amihudu a na le madira a gagwe; ₂₃Gamamiele morwa wa Pedatsuri a na le madira a leloko la Manase; ₂₄Abidani morwa wa Gideoni a na le madira a leloko la Benyamini.

₂₅Gwa latela ba sefoko sa mešaša ya Badani, ya ba ba go khunyeletša ba mešaša ka moka ka makoko a bona, Ahiesere morwa wa Ahitsuri a na le madira a gagwe, ₂₆Pagiele morwa wa Okorane a na le madira a leloko la Asere, ₂₇Ahira morwa wa Enani a na le madira a leloko la Nafutali. ₂₈Ke gona go lokologana ga Baisiraele ka makoko a bona ge ba khuduga.

₂₉Gomme Moshe a bolela le Hobaba morwa wa Reguele Momidiani mogwegadi wa Moshe, a re: Rena re a khuduga; re ya kua go boletšwego ke Morena a re: Ke tlo le nea felo fao. Sepela le rena; re tlo go dira gabotse, ka gobane Baisiraele Morena o ba baletše tše botse.

₃₀Hobaba a re: Nka se ke ka ya. Nna ke tlo boela nageng ya gešo go metswalo ya ka.

₃₁Moshe a re: A nke o se re tlogele, ka gobane ke wena o tlogo re tsebela makutšo lešokeng; o tlo ba mahlo a rena. ₃₂Ge o sepela le rena, mme ra tlelwa ke tše botse tše Morena a tlogo re direla, le wena re tlo go dira gabotse.

₃₃Gomme ba tlogile thabeng ya Morena ba sepela matšatši a mararo; polokelo ya kgwerano ya Morena ya ba eta pele leetong le la matšatši a mararo, ya ba nyakela makhutšo. ₃₄Mosegare ba be ba aparetšwe ke leru la Morena mola ba tlogile mešašeng.

₃₅Ge polokelo e tsoga Moshe o be a bolela a re: Nanoga, Morena, manaba, a gago a rakwe, Bahloi ba gago ba tšhabe! ₃₆Ge polokelo e etla mešašeng, Moshe a re: Morena, boela go mašaba a diketekete tša Isiraele!