NUMERI 12

₁Miryama, a na le Arone, o be a fela a tsota Moshe ka baka la mosadi wa Mokuše yo a bego a mo tšere, a re, o tšere mosadi wa Mokuše. ₂Le gona ba re: Afa Morena o bolela ka Moshe fela? A ga a bolele le ka rena? -- Gomme Morena a di kwa. ₃Yena Moshe e be e le monna yo boleta ruri go fetiša batho ka moka ba lefase.

₄Gomme Morena a bolela le Moshe le Arone le Miryama ka go akgofa a re: Tšwelang Ngwakong wa Kgwerano boraro bja lena. ₅Morena a fologa a le lerung la thololo, a ema mojako wa Ngwako, a bitša Arone le Miryama, ba tšwela gona bobedi bja bona. ₆Morena a re: Bjale kwang se nna ke se bolelago. Ge mo go lena go na le moporofeta, nna Morena ke itsebiša go yena ka pono, ke bolela le yena ka diloro. ₇Ge e le Moshe mohlanka wa ka ga ke mo dire ka mokgwa woo; mo lapeng la ka ka moka e a botegago ke yena. ₈Ke bolela le yena re lebantše difahlogo, re bonana, e se go bolela ka nyepo. Yena o bona sebopego sa Morena. Ke ka baka la eng le sa ka la boifa go mmolela gampe, yena Moshe mohlanka wa ka?

₉Ba tukelwa ke kgalefo ya Morena; mme Morena a tloga. ₁₀Ya re leru le sa tšo tloga mo Ngwakong ba tšhoga Miryama a tšwile lephera, e le e mošweu bjalo ka leswela. Arone ge a retologela go yena, a bona a tšwile lephera. ₁₁Arone a bolela le Moshe a re: Joo, mong wa ka a nke o se re lefetše sebe se re wetšego go sona ka botlatla mme ra senya. ₁₂A o se ke wa lesa ge a etša mohu e a belegwego a šetše a bodile ka thoko.

₁₃Gomme Moshe a hlatlošetša lentšu go Morena, a re: Joo Modimo! A ko mo fodiše!

₁₄Morena a fetola a re: Ge tatagwe a ka be a mo tshwetše ka mare sefahlogong, naa a ka be a sa dule matšatši a šupago a na le dihlong? Le bjale a a dule kua ntle ga mešaša a tswaleletšwe matšatši a šupago, a kgone go amogelwa. ₁₅Miryama a dula matšatši a šupago a tswaleletšwe kua ntle ga mešaša. Setšhaba sa se ke sa khuduga, sa letela go amogelwa ga Miryama. ₁₆Ya ba gona se khudugilego sa yo hloma mešaša lešokeng la Parana.