NUMERI 18

₁Gomme Morena a bolela le Arone a re: Wena le barwa ba gago, le ba leloko la gago, le ba go rwala molato o lebanego tše dikgethwa. Gomme wena le barwa ba gago le ba go rwala molato o lebanego boperisita bja lena. ₂Ba geno, ba leloko la Lefi, ba lešika la tatago, ba lese ba batamele ba tle le lena, ba le tlatše, ba le direle, ge wena le barwa ba gago ba lebane le Ngwako wa Molao. ₃Ba hlokomele madišo a gago, le madišo a mo Ntlong e kgethwa ka moka; fela ba se ke ba batamela dilo tše kgethwa le ge e le aletare, gore ba se hwe, bona le lena. ₄A ba eme le wena mo madišong a go diša Ngwako wa Kgwerano, le mo medirong ya wona ka moka; go se ke gwa batamela o šele le lena. ₅Le hlokomele madišo a sekgethweng le aletareng, gore Baisiraele ba se ke ba hlwa ba welwa ke kgalefo. ₆Le tsebe gore ke nna ke hlaotšego bana ba bolena ba Balefi mo go Baisiraele; ke mpho ye e neilwego Morena ka baka la bona, gore ba dire mediro ya mo Ngwakong wa Kgwerano. ₇Gomme wena le barwa ba gago le hlokomele tša boperisita bja lena dilong ka moka tša aletare, le tše di lego ka teng ga lešira, le dire tšona. Boperisita ke neile lena; ke le tsebafile ka go le fa boperisita; o šele e a kago batamela a bolawe.

₈Morena a buša a bolela le Arone a re: Tseba gore ke go neile madišo a dineo tša ka; ka moka tše Baisiraele ba nkgethelago tšona di neilwe wena gore e be kabelo ya gago le ya barwa ba gago. Ke molao wa ka mehla. ₉Tše kgethwakgethwa tše e lego tša gago, tše di sa yego mellong šidi: Ke dibego ka moka, le dibego ka moka tša dijo, le diloba ka moka, le dilefa ka moka, tše ba tlogo ntlišetša tšona. Tše kgethwakgethwa ke tša gago. ₁₀Le di je felo gokgethwakgethwa; di lewe ke banna ka moka; le tsebe ge e le tše kgethwa.

₁₁Tše e lego tša gago ke tše di tšwago go dineo le go diekaro ka moka tša Baisiraele. Ke di neile wena le barwa ba gago, le barwedi ba gago; e be molao wa ka mehla. Di lewe ke mang le mang wa lapeng la gago e a se nago seila.

₁₂Ke go neile ona makhura a mabotse a mohlware, le tšona tše di botse tša morara le tša mabele, ka ge e le dithakangwaga tše ba tlogo di tlišetša Morena. ₁₃Tša gago e tlo ba dithakangwaga tša tšohle tše di lego mašemong a bona tše ba tlogo di tlišetša Morena. Di ka lewa ke mang le mang e a lego lapeng la gago.

₁₄Tšohle tše e lego digafiwakamoka mo go Baisiraele ke tša gago.

₁₅Maitšibulo a tšohle tše di phelago, a ba tlogo a tlišetša Morena, a batho le a dikgomo, ke a gago. Fela, leitšibulo la motho o se ke wa lesa go le lopolla. O lopolle le leitšibulo la seruiwa se se ilago. ₁₆Go lopollwa ga tšona, ke go re se se feditšego kgwedi o se lopolle ka go se rekolla ka silifera ya sekele tše tlhano ka kelo ya sekgethwa e nago le 'Gera tše masome a mabedi. ₁₇Leitšibulo la kgomo le la nku, le ge e le la pudi, o se ke wa le lopolla, ke tše kgethwa. O fokele aletare ka madi a tšona, o fiše makhura a tšona, e be a mello ya Morena a monko o bose. ₁₈Ge e le nama ya tšona ke ya gago, le leumo la seekaro; le serope sa le letona ke sa gago.

₁₉Dineo ka moka tše kgethwa, tše Baisiraele ba di tlišetšago Morena, ke di neile wena le barwa ba gago, le barwedi ba gago. Ke molao wa ka mehla le kgwerano ye e sa senyegego neng le neng pele ga Morena, ye e dirilwego le wena le bana ba gago.

₂₀Gomme Morena a bolela le Arone a re: Kua nageng ya bona wena o ka se ke wa ba le naga ye e tlogo ba ya gago le seabelwa mo go bona. Seabelwa sa gago le legae la gago mo go Baisiraele ke nna.

₂₁O tsebe gore Balefi ke ba neile karolo ya lesome ya tšohle tša Isiraele. Ke yona karolo ya bona ka baka la modiro wo ba o dirago Ngwakong wa Kgwerano. ₂₂Baisiraele ba ka se ke ba hlwa ba batamela Ngwako wa Kgwerano ba oba molato ba hwa. ₂₃Modiro wa Ngwakong wa Kgwerano o dirwe ke Balefi; molato wa gona o rwalwa ke bona. Ke molao wa neng le neng go iša ditlogolong tša lena; le gore ba se ke ba ba le naga ya bona mo go Baisiraele. ₂₄Karolo ya lesome ya tše Baisiraele ba di ntšhetšago Morena ke e neile Balefi gore e be tša bona. Ke ka baka leo ke ba boditšego ka re ba ka se ke ba ba le naga ya bona mo go Baisiraele.

₂₅Morena o boletše le Moshe a re: ₂₆Botša Balefi o re: Ge ba ntšhiša Baisiraele karolo ya lesome ye ke le neilego yona gore e be ya lena gona le ntšhe sa lesome go yona le se tlišetše Morena, gore e be neo ya lena. ₂₇E tlo ba yona neo ya lena ye e tlogo le balelwa bjalo ka ya mabele le ya tše di tšwago dinkgong. ₂₈Ka mokgwa wo le lena le tlo ntšha neo ya Morena e tšwago mo go karolo ya lesome ya lena ka moka ye le e newago ke Baisiraele. Neo ye ya lena le e neele Arone moperisita e be ya Morena. ₂₉Neo ye ya Morena le e ntšhe mo go tše di neilwego lena; mo go tšona ka moka le ntšhe tše botse tša tšona, e be neo e kgethwa. ₃₀O ba botše o re: Tše botse tše Balefi ba di ntšhago di etša motšhelo wola wa tše di tšwago seboeng le mo nkgong. ₃₁Le ka di ja kua magaeng a lena, lena le ba malapa a lena, ka gobane ke wona moputso wa lena wa modiro wo le o dirago Ngwakong wa Kgwerano. ₃₂Ge le ntšhitše tše botse mo go tšona, gona le ka se ke la oba molato ka tšona, le tlo ba le sa goboše tše kgethwa tša Baisiraele, mme le ka se ke la hwa.