NUMERI 29

₁Ka la pele la kgwedi ya go šupa le be le pitšokgethwa; le se ke la ba le modiro wo le o dirago; le le dire tšatši la megobo. ₂Le tliše sehlabelo sa monko wa go natefela Morena, powana, le kgapana, le dikwanyana tše di šupago tše di se nago bosodi tša ngwaga o tee. ₃Di tlišwe le dibego tša tšona tša bupi bjo bo tšhetšwego makhura, seroto se tle le powana, ntlatla e tle le kgapana, ₄ntlatlana le kwanyana e nngwe le e nngwe ya tšeo tše di šupago; ₅le pudi ya sehlabelo gore le direlwe poelanyo. ₆Tše ka moka le di tliše ka ntle ga sehlabelo sa kgwedi le sebego sa sona, le sehlabelo sa ka mehla le sebego sa sona sa dijo le sa dino tše di tlišwago ka mokgwa wa tšona gore e be sa monko o bose wa tša mello ya Morena.

₇Ka 'tšatši la lesome la kgwedi yeo ya go šupa le be le pitšokgethwa; le ikokobetšeng meoyeng ya lena; le se ke la ba le modiro wo le o swarago. ₈Le tlišetše Morena sehlabelo sa monko o bose, powana, le kgapana, le dikwanyana tše di šupago tša ngwaga o tee; e be tše le bonago di se na bosodi. ₉Le tliše le dibego tša tšona tša bupi bjo bo tšhetšwego makhura; powana e tle le seroto kgapana e tle le ntlatla. ₁₀Dikwanyana tše di šupago di tle le ntlatlana ntlatlana; ₁₁le pudi e tee ya seloba, ka ntle ga seloba sa go dira poelanyo, le sehlabelo sa ka mehla le sebego sa sona sa dijo le sa dino.

₁₂Ka 'tšatši la lesome le metšo e mehlano la kgwedi yeo ya go šupa le be le pitšokgethwa; le se ke la ba le modiro wo le o dirago; le binele Morena monyanya wa matšatši a šupago. ₁₃Le tliše sehlabelo sa mello ya monko wa go natefela Morena; e be dipowana tše lesome le metšo e meraro, le dikgapana tše pedi, le dikwanyana tše lesome le metšo e mene; e be tše di se nago bosodi. ₁₄Di tle le dibego tša tšona tša bupi bjo bo tšhetšwego makhura; dipowana tše lesome le metšo e meraro di tle le seroto seroto; dikgapana tše pedi di tle le ntlatla ntlatla; ₁₅dikwanyana tše lesome le metšo e mene di tle le ntlatlana ntlatlana; ₁₆le pudi e tee ya seloba, ka ntle ga sehlabelo sa ka mehla le dibego tša sona tša dijo le tša dino.

₁₇Ka 'tšatši la bobedi le tliše dipowana tše lesome le metšo e mebedi, le dikgapana tše pedi, le dikwanyana tše lesome le metšo e mene tše di se nago bosodi, tša ngwaga o tee. ₁₈Di tle le dibego tša tšona tša dijo le tša dino, tša dipowana, le tša dikgapana, le tša dikwanyana ka palo ya tšona le ka mokgwa wa tšona; ₁₉le pudi e tee ya seloba, ka ntle ga sehlabelo sa ka mehla le dibego tša sona tša dijo le tša dino.

₂₀Ka 'tšatši la boraro le tliše dipowana tše lesome le motšo o tee, le dikgapana tše pedi, le dikwanyana tše lesome le metšo e mene tše di se nago bosodi, tša ngwaga o tee. ₂₁Di tle le dibego tša tšona tša dijo le tša dino, tša dipowana, le tša dikgapana, le tša dikwanyana ka palo ya tšona le ka mokgwa wa tšona; ₂₂le pudi e tee ya seloba, ka ntle ga sehlabelo sa ka mehla le dibego tša sona tša dijo le tša dino.

₂₃Ka 'tšatši la bone le tliše dipowana tše lesome, le dikgapana tše pedi, le dikwanyana tše lesome le metšo e mene tše di se nago bosodi, tša ngwaga o tee. ₂₄Di tle le dibego tša tšona tša dijo le tša dino, tša dipowana, le tša dikgapana, le tša dikwanyana ka palo ya tšona le ka mokgwa wa tšona; ₂₅le pudi e tee ya seloba, ka ntle ga sehlabelo sa ka mehla le dibego tša sona tša dijo le tša dino.

₂₆Ka 'tšatši la bohlano le tliše dipowana tše senyane, le dikgapana tše pedi, le dikwanyana tše lesome le metšo e mene tše di se nago bosodi, tša ngwaga o tee. ₂₇Di tle le dibego tša tšona tša dijo le tša dino, tša dipowana, le tša dikgapana, le tša dikwanyana ka palo ya tšona le ka mokgwa wa tšona; ₂₈le pudi e tee ya seloba, ka ntle ga sehlabelo sa ka mehla le dibego tša sona tša dijo le tša dino.

₂₉Ka 'tšatši la go selela le tliše powana tše seswai, le dikgapana tše pedi, le dikwanyana tše lesome le metšo e mene tše di se nago bosodi, tša ngwaga o tee. ₃₀Di tle le dibego tša tšona tša dijo le tša dino, tša dipowana, le tša dikgapana, le tša dikwanyana ka palo ya tšona le ka mokgwa wa tšona; ₃₁le pudi e tee ya seloba, ka ntle ga sehlabelo sa ka mehla le dibego tša sona tša dijo le tša dino.

₃₂Ka 'tšatši la go šupa le tliše powana tše di šupago, le kgapana tše pedi, le dikwanyana tše lesome le metšo e mene tše di se nago bosodi, tša ngwaga o tee. ₃₃Di tle le dibego tša tšona tša dijo le tša dino, tša dipowana, le tša dikgapana, le tša dikwanyana ka palo ya tšona le ka mokgwa wa tšona; ₃₄le pudi e tee ya seloba, ka ntle ga sehlabelo sa ka mehla le dibego tša sona tša dijo le tša dino.

₃₅'Tšatši la seswai le le dire la monyanya, le se ke la ba le modiro wo le o dirago. ₃₆Le tliše sehlabelo sa mollo le sa monko wa go natefela Morena, powana e tee, le kgapana e tee, le dikwanyana tše di šupago, tše di se nago bosodi, tša ngwaga o tee. ₃₇Le tliše le dibego tša tšona tša dijo le tša dino, tša powana, le tša kgapana le tša dikwanyana ka palo ya tšona le ka mokgwa wa tšona; ₃₈le pudi e tee ya seloba, ka ntle ga sehlabelo sa ka mehla le dibego tša sona tša dijo le tša dino.

₃₉Ke tšona tše le tlogo di direla Morena menyanyeng ya lena, ka ntle ga tša dikeno, le tša go ithapa, le dihlabelo tša lena, le dibego tša lena tša dijo le tša dino, le dileboga tša lena.

₄₀Gomme Moshe a anegela Baisiraele tšohle tše Morena a mo laetšego tšona.