DIEMA 29

₁Palabalai o tlo tšhoga a robega, go se be le moreku.

₂Baloki ge ba ata, ke mo setšhaba se thabago; ge go buša ba babe, se tšhaba se a fegelwa.

₃Monna moratabohlale, o thabiša tatagwe; wa go gwerana le diotswa, o tšitlanya thoto.

₄Kgoši e ladiša naga ka moahlolelo; monna molopametšhelo o a e onatša.

₅Mogokeletšawagabo o mo rea nao ka molaba.

₆Dikarogo tša e mobe ke moreo; moloki o tlo hlalala a thaba.

₇Moloki o tseba taba ya babotlana; yo mobe ga e lemoge, ga e tsebe.

₈Batho ba lonya ba tšhuma motse; ba bohlale ba tima bogale.

₉Yo bohlale ge a sekišana le lešilo, le tlo roga, le tlo sega, taba e se fele.

₁₀Banna ba madi ba beka moilabosodi; ba go kwana nae ke baloki.

₁₁Setlatla se tšholla tšohle tša pelong ya sona; mohlale o di bolokela la ka moso.

₁₂Mmuši wa go theeletša taba tša maaka, bahlanka ba gagwe ka moka ke ba ba babe.

₁₃Modiidi le morui ba fela ba hlakana; mahlo a go bona ba a filwe bohle ke Morena.

₁₄Kgoši ge e buša babotlana ka therešo, bogoši bja yona bo dula bo tiile.

₁₅Kgati le tsholo di a hlalefiša; mošemanamoipuši o leša mmagwe dihlong.

₁₆Ge ba babe ba ata, go ata le dikarogo; baloki bona ba tlo ba ba ba bona ba ewa.

₁₇Sola ngwana wa gago, a tle a go agiše, a kwiše pelo yago bose.

₁₈Ge go hlokwa ponokgethwa, setšhaba ga se bušege; fela, wa lehlogonolo ke moyakamolao.

₁₉Molata ga solege ka mantšu; le ge a ka kwešeša ga a eleletšege.

₂₀Ge o bona motho moakgofagobolela, o phalwa ke setlatla ka go holofetša.

₂₁Mohlanka wa go ekelelwa go tšwa byaneng, o tlo ba a re: Le bohwa ke a ja.

₂₂Motho wa sebefedi o tsoša diphapang; setlalwakepelo se senya gantši.

₂₃Boikgogomošo bo tlo kokobetša mong wa byona; wa pelo e ipoetšago o tlo godišwa.

₂₄Moabelana le mahodu o itlhoile; o tlo kwa kahlolo a ikhomolela.

₂₅Go boifa batho go wetša moreong; go phologa e a botago Morena.

₂₆Ba bantši ba nyaka mahlo a mašweu a babuši; mme kahlolo, batho ba e tšwelwa go Morena.

₂₇Monna yo kgopo o nyenywa ke ba bolo; mme yo mobe o nyenya molokaletsela.