PSALME ya 104

₁Moya wa ka, reta Morena! Morena, wena Modimo wa ka, o e mogologolo, mme o apere phadimo le letago.

₂O ikapeša ka seedi boka kobo; o anega legodimo bjalo ka lešela.

₃Dithekgo tša hlaka ya ngwako wa gago o di tsemile madibeng. Maru o a dira dokoloi tšago; o rotoga ka diphego tša ledimo.

₄Meoya o e dira batseta ba gago; bahlanka ba gago ke kgabo tša mollo.

₅Lefase, metheo ya lona o e theile wa go se šišinyege neng le neng,

₆Wa le apeša ka madiba boka seaparo; meetse a ema godimo ga dithaba.

₇A široga o a kgalemile, a ditšhaba a tšhogile lentšu lago ge le duma.

₈Dithaba tša botoga, melala ya patlama gona moo o e beilego gona.

₉Wa di beela mellwane ye di ka se kego tša sela, tša boela tša ribegetša naga.

₁₀Wa phula methopo mo melapong, ya ela gare ga dithaba.

₁₁E noša diphedi tša naga ka moka; dipitsi tša naga di tima lenyora la tšona.

₁₂Ke mo go agilego nonyana tša leratadima; di kwatša melodi ya tšona di le makaleng.

₁₃Dithaba o di noša meetse a a tšwago kua ngwakong wa gago wa magodimong; lefase le hora dikenyo tša ditiro tša gago.

₁₄Dikgomo o di hlogišetša bjang, le dimela tša go fepa motho, tša go ntšha dilewa mo mobung.

₁₅Le wona morara wa go thabiša pelo ya motho, le makhura a go tagiša sefahlego sa gagwe, le bogobe bja go tiiša pelo ya motho.

₁₆Le dihlare tša Morena di a hora, merokwana ya dithabeng tša Libanoni ye a e šemilego.

₁₇Mo go agilego dinonyana dihlaga tša tšona, le letlaka la re sodi ke legae.

₁₈Gabokome ke maolo a magolo, mariba ke setšhabelo sa dipela.

₁₉O dirile kgwedi taetšamabaka; letšatši le tseba mo le yago go dikela.

₂₀Wa dira leswiswi ya ba bošego, gwa tsoga dibata tša naga.

₂₁Ditawana di a bopa, di lla dinama; di kgopela dijo go Modimo.

₂₂Letšatši ge le hlaba di a goma, di yo lala digoleng tša tšona.

₂₃Ya ba gona motho a tšwelago medirong ya gagwe la ba la dikela.

₂₄Morena, mediro ya gago ga se ka boati! O e dirile gohle ka bohlale; lefase le tletše dibopiwa tša gago.

₂₅Selele lewatle, bogolo le bonami thoko tšohle bja dinyeunya di sa balwego, diphedi tše nyenyane le tše kgolo!

₂₆Matshelawatle a sepela moo, le dibata tša madiba tše o di bopetšego go bapala moo.

₂₇Tšona tšeo tšohle di lebeletše wena gore o di nee dijo lebakeng la gona.

₂₈Ge o di nea di a topa; ge o khuporolla seatla saago di hora ka tše botse.

₂₉Ge o ka uta sefahlego sago, di ka gakanega; ge o gomiša moya wa tšona, di a hwa tša napa tša boela leroleng la tšona.

₃₀Mme ge o roma moya wa gago, di a bopega; o mpshafatša sefahlogo sa lefase ka go realo.

₃₁Letago la Morena a le dule le le gona neng le leng, Morena a thabele dibopiwa tša gagwe.

₃₂Yena yo e rego ge lefase a le lebelela, le nape le šišinyege; e rego ge a kgwatha thaba, e nape e thunthše meuši.

₃₃Nna, ge ke sa phela, ke hlaba fela sa Morena; yena Modimo wa ka, ke tlo mo opelela, ge ke sa fela ke le gona.

₃₄A a kgahlwe ke sereto sa ka. Nna ke thabetše Morena.

₃₅A go fele ba go dira dibe lefaseng; ba ba sa lokago ba se ke ba ba gona. Moya wa ka, reta Morena.