PSALME ya 42

₁Ke bjalo ka tshepe, ge e llela dinokana tša meetse; o bjalo moya wa ka go llela wena Modimo.

₂Moya wa ka o nyoretšwe Modimo, Modimo wa go phela. Ke tlo fihla neng ka bona sefahlego sa Modimo?

₃Sejo sa ka ke megokgo ya ka mosegare le bošego, ge ba hlwa ba nthera ba re: O kae Modimo wa gago?

₄Ge ke akanya tšeo, ke eletša moya wa ka tša mehla ya mola ke sa ya Ngwakong wa Morena le bontši, ke bo eta pele re hlaboša mantšu a mekgolokwane le ditheto, re le mogobo re bina monyanya.

₅Wena moya waka! O itlhokofaletšang? O ferehlegelang teng ga ka? Bota Modimo! Ke sa tlo mo leboga ge a mphološitše ka sefahlego sa gagwe.

₆Modimo wa ka! Moya wa ka o nyamile fa teng ga ka. Ke gona ke go gopolago ke le mo nageng ya Jorodane, ke le Herimone mo thabeng e nyane.

₇Bodiba bo botša bodiba ka medumo ya diphororo tšago. Mafula a gago ka moka, le maphoto a gago a a nkhurumetša.

₈Ge go sele Morena o tlo roma botho bja gagwe; ke lala ke le wa sefela sagwe, ke rapela Modimo wa bophelo bja ka.

₉Ke bolela le Modimo, yena lentswe la ka. O reng o ntebetše? Ke reng ke sepedišwa ke hlokoga, ke tshwenywa ke manaba?

₁₀Bahloi ba ka ba nnyefola ke monokane ditho; mme ba hlwa ba nthera ba re: O kae Modimo wa gago?

₁₁Wena moya wa ka! O itlhokofaletšang? O ferehlegelang teng gaka? Bota Modimo! Ke sa tlo mo leboga ge a mphološitše sefahlego, yena Modimo wa ka.