Iinkcukacha ezongezelelweyo

PSALME ya 56

Ya mohlabeledi, ka “Leeba meokeng ya kgole”. Sefela sa Dafida sa mohla wola Bafilisita ba mo swere kua Gathi.

₁Modimo, ntšhokelwe; batho ba ntšhwahletše; ke hlwa ke hlohlwa ke ba ba lwago.

₂Ke hlwa ke šwahlelwa ke bahlomaredi, gobane ke ba bantši ba ba lwago le nna ba nnamela.

₃Mohla wa poifo ke botile wena.

₄Ge Modimo a na le nna, ke fadiša lentšu la gagwe. Ge Modimo a na le nna, ke a holofela, ga ke šie; motho o ntirang?

₅Ba hlwa ba ntshenyetša ditaba tša ka; maano ba loga a go ntlhokofatša.

₆Sa bona ke go rapana le go ntalela; ba ntota lwao ba fišegetšwe go mpolaya.

₇Bobe bja bona o tlo bo lefetša; Modimo, galefa o ba uše, batho bao.

₈Metšhabo ya ka o a e bala; megokgo ya ka e boloke sebjaneng sa gago; a ga ke re: Di pukung ya gago?

₉Mohla ke go bitša, manaba a ka a a goma; ke tseba ge Modimo a na le nna.

₁₀Ge Modimo a na le nna, ke fadiša lentšu la gagwe. Ge Morena a na le nna, ke fadiša lentšu la gagwe.

₁₁Ke bota Modimo, ga ke boife; motho o ntirang?

₁₂Modimo, ke go enetše ka re: Ke tlo Go tlišetša ditebogo.

₁₃Gobane o phološitše moya wa ka wa se ke wa hwa, dinao tša ka tša se ke tša kgopša, ka kgona go sepela seetšeng sa ba phelago ke bonwa ke Modimo.