PSALME ya 65

₁Modimo, motseng wa Tsione ditheto di išwa go wena go ikhomoletšwe; go phethwa tše ba go enetšego tšona.

₂Batho ka moka ba tla go wena mokwi wa dithapelo.

₃Ge melato e nkimetše, e a re bipelago dikarogo ke wena.

₄Wa lehlogonolo ke yo o mo kgethago, mme wa mmatametša, a dula malapeng a gago. Re khora bose bja Ngwakong wa gago, bja Ntlokgethwa ya gago.

₅Ge o re araba ka tše šiišago ka go loka, o moholofelwa wa magomo ohle a lefase le wa mawatle a kua kgolekgole.

₆Ke wena motheadithaba ka maatla a gago; O itlhama ka bogale.

₇Wena mookobatši wa medumo ya lewatle, ge le duma le seloga, moukubatši wa meferefere ya ditšhaba.

₈Ba ba dutšego kua magomong ba šia mehlolo ya gago; o hlaladiša ba kua bohlabela le ba kua bodikela.

₉O etela naga wa e noša meetse; o e humišitše ka dinoka tša Modimo di tletše meetse; o ba medišetša mabele ge o dira ka mokgwa o mobjalo.

₁₀O nošetša boleme bja naga, o kolobiša makokota, o nea monola ka pula, o šegofatša dimela tša yona.

₁₁Ngwaga wo o o apeša botse bja gago; mehlala ya gago e ela makhura.

₁₂Le mafulo a lešoka a a ela; le meboto e itšhepha ka tlhalalo.

₁₃Melala e apere dihuswana; meedi e itlhama ka mabele. Go hlaletšwe go binwa dikoša.