PSALME ya 71

₁Morena, ke holofetše wena; a nke ke se lewe ke dihlong le gatee.

₂Ntlhakodiše ka ge o emela toko; mme o ntokolle. A ke o ntshekegele tsebe o mphološe.

₃A ke o be lentswe la ka la sebo sa go khuta mehla yohle, bjalo ka ge o laetše wa re ke phološwe, ka kgonthe wa ba thaba ya ka, setšhabelo sa ka.

₄Modimo, ntokolle diatleng tša yo mobe, dinaleng tša yo kgopo, yo sehlogo.

₅Gobane ke go hlologetšwe, Morena Mong wa ka; ke go botile go tloga bjaneng.

₆E sa le mola ke belegwa, ke thekgwa ke wena; e sa le mola ke fepša ke mme, o mmabaledi wa ka; nka se ke ka kgaotša go go reta ka sefela.

₇Ba bantši ba mpona ba kgotsa; mme nna sebo sa ka se se tiilego ke wena.

₈A molomo wa ka o falale theto ya gago le tumišo yago mehla yohle.

₉Se ntahle bjale ge ke tšofala; o se ntlogele bjale ge maatla a ka a felela.

₁₀Gobane ke bolelwa ke manaba a ka, ke lakanwa ke bantaledi.

₁₁Ba re: Modimo o mo lahlile, mo kwatišeng le mo sware; ga a sa na monamoledi!

₁₂Modimo wa ka, o se nkeme kgole; Modimo wa ka, akgofa o ntwele.

₁₃Ba ba mpekago a ba lewe ke dihlong; ba ba bego ba ntlholela kotsi ba apare kgobogo le nyatšego.

₁₄Mme nna ke dula ke go lebeletše; ke tlo fela ke atiša ditheto tša gago ka moka.

₁₅Ka mehla ke tlo laodiša tša ge o le Molokakahlolong, ge o le Mophološi, le ge ke sa kgone go di bala.

₁₆Ke tlo tla ka ditiro tše maatla tša gago, Morena Mong wa ka; ka reta ka re: Molokakahlolong ke wena fela.

₁₇Modimo, o nthutile go tloga bjaneng, gomme le bjale ke sa fela ke kwadiša mehlolo ya gago.

₁₈Mme bjale ge ke tšofala, ke le wa hlogopududu, o se ntlogele, ke be ke anegele ditlogolo tša letsogo la gago; le meloko e tlogo tla yohle ke e anegele ditiro tša gago tše maatla.

₁₉Modimo, go loka ga gago go phagamile kudu; tše o di dirilego ke tše kgolo. Ke mang Modimo moka wena?

₂₀Ke wena o re lebanyago le tlalelo tše dintši, le mabothata; wa buša wa re phediša, wa re ntšha dikoting tša lefase.

₂₁Nna bogolo bja ka o a bo oketša, o buša o nkhomotša pelo.

₂₂Ke gona ke go retago ka seletšo, wena Modimo wa ka; ke reta potego ya gago; ke go binela koša ka lekope, Wena Mokgethwa wa Isiraele.

₂₃Molomo wa ka o goloka ge ke go binela; le moya wa ka, mophološwa wa gago, o a go binela.

₂₄Le leleme la ka le hlwa le tlotla go loka ga gago, ka gobane bantlholelakotsi ba nyamile, ba šegame.