KUTOLLO 14

₁Ke sa lebeletše ka bona Kwana e eme thabeng ya Sione, e na le ba dikete tše lekgolo le nago le masome a mane a metšo e mene, bao diphatleng tša bona ba swailwego ka leina la yena Kwana le la Tatagwe. ₂Ka kwa modumo o tšwago legodimong o swana le modumo wa meetse a magolo le modumo o mogolo wa pula. Le gona modumo woo ke o kwelego o be o swana le wa baletši ba ba letšago diletšo tša bona. ₃Ba opela sefela se sefsa pele ga sedulo sa bogoši, le pele ga diphedi tšela, le pele ga bagolo bala. Gomme go be go se motho e a kgonago go ithuta sefela seo ge e se bao ba dikete tše lekgolo le nago le masome a mane a metšo e mene, ba ba rekolotšwego lefaseng. ₄Ke bona ba ba sa kago ba itšhilafatša ka basadi; ke dikgarebe. Ke bona ba ba latelago Kwana mo e yago. Ke bona ba ba rekolotšwego bathong, ya ba dithakangwaga tša Modimo le tša Kwana. ₅Le gona, melomong ya bona ga gwa ka gwa hwetšwa maaka; ga ba na bosodi ba le fao pele ga sedulo sa Modimo sa bogoši.

₆Ka bona morongwa e mongwe a fofa gare ga legodimo a swere Ebangedi ya neng le neng ya go tsebišwa ba ba agilego lefaseng, ditšhaba tšohle le meloko yohle, le maleme ohle le merafo yohle; ₇a bolela ka lentšu le legolo, a re: Boifang Modimo le rete yena, gobane nako ya kahlolo ya gagwe e tlile, le khunamele yena e a dirilego legodimo le lefase le lewatle le didiba tša meetse.

₈Gwa latela morongwa e mongwe wa bobedi, a re: O wele! O wele! Motse o mogolo wa Babele, wa go noša tšhaba tšohle sebela sa kgalefo ya bootswa bja wona!

₉Gwa latela morongwa e mongwe wa bararo, a hlaboša lentšu a re: Motho e a kago lotšha sebata le seswantšho sa sona, a dumela go swaiwa phatleng ya gagwe le seatleng sa gagwe, ₁₀yena o tlo nošwa sebela sa kgalefo ya Modimo, se se sa timolwago ge se tšhelwa senwelong sa bogale bja gagwe; mme o tlo hlokofatšwa mollong wa tshebela pele ga barongwa ba bakgethwa le pele ga Kwana. ₁₁Mme muši wa tlhokofatšo ya bona o rotoga go iša mehleng ya neng le neng; ba sa khutše mosegare le bošego, bona bao ba go lotšha sebata le seswantšho sa sona, le ba go swaiwa ka leina la sona.

₁₂Ke mo go nyakago kgotlelelo ya bakgethwa ba go gomarela melao ya Modimo le go dumela Jesu.

₁₃Ka kwa lentšu le etšwa legodimong le re: Ngwala o re: Ba lehlogonolo ke bahu ba hwilego ba le Moreneng go tloga bjalo.

Moya o re: E, a ba yo khutša ditapišo tša bona, gobane mediro ya bona e a ba latela.

₁₄Ke sa lebeletše ka bona leru le lešweu. Godimo ga lona go dutše yo e kego ke Morwamotho, a rwele mofapahlogo wa gauta hlogong, a swere legwetla le le bogale ka seatla. ₁₅E mongwe morongwa a tšwa Ntlongkgethwa, a hlaboša lentšu a re: Tsenya legwetla la gago o bune, gobane lebaka la go buna le tlile; mabele a lefase a omile! ₁₆E a dutšego godimo ga leru a tsenya legwetla la gagwe lefaseng, lefase la bunwa.

₁₇Ntlongkgethwa ya legodimong gwa tšwa e mongwe morongwa, le yena a swere legwetla le le bogale.

₁₈E mongwe morongwa a tšwa moo Ntlongkgethwa a na le maatla a go buša mollo; a hlaboša lentšu a goeletša, a bolela le eo a swerego legwetla a re: Tsenya legwetla le le bogale la gago, o sege thara tša morara wa lefase, gobane ditholwana tša wona di budule. ₁₉Morongwa eo a akgela legwetla la gagwe lefaseng, a buna morara wa lefase, nkgwa a di lahlela bofotlelong bjo bogolo bja bogale bja Modimo. ₂₀Gwa fotlwa moo bofotlelong ka ntle ga motse, bofotlelong gwa tšwa madi, a tlala a goma ka megala ya dipitsi, a ela a fetša tsela ya mašemo a sekete se nago le makgolo a selelago.