Tšhwalalanyo ya Babele e thabelwa legodimong. Go fenywa ga sebata le Moporofeta wa maaka
1Ya ba gona ke kwago se e kego ke kgowa e kgolo ya lešaba le lentšu la ba ba lego kua legodimong, ba re: Haleluya! Go phološa go na le Modimo wa rena, le letago ke la gagwe, le tumišo, le maatla! 2Gobane kahlolo tša gagwe di ya ka therešo le ka toko ge a lahlile seotswa se segolo sa go senya lefase ka bootswa bja sona; o lefeditše madi a bahlanka ba gagwe a se lefiša. 3Ba boeletša ba re: Haleluya! Muši wa sona a o tupe go iša mehleng ya neng le neng! 4Bagolo bala ba masome a mabedi a metšo e mene ba na le diphedi tšela tše nne, ba lotšha ba khunamela Modimo e a dutšego sedulong sa bogoši, ba re: Amene! Haleluya!
5Gwa hlaga lentšu le etšwa moo sedulong la re: Retang Modimo wa rena, lena bahlanka ba gagwe ka moka ba le mmoifago, ba banyane le ba bagolo. 6Ka kwa se e kego ke mogoo wa lešaba le lentši le modumo wa meetse a magolo, le modumo o maatla wa pula, gwa thwe: Haleluya! Morena Modimo Ramaatlaohle o tšere bogoši. 7A re thabeng, re hlalaleng, re mo reteng, gobane monyanya wa tšeo ya Kwana o tlile, monyalwa wa gagwe o tšhephile. 8O dumeletšwe go apara seaparo sa bohlokwa, se sešweu se se se nago ditšhila. Mme aparo seo sa bohlokwa ke tiro tša toko tša ba bakgethwa.
9A bolela le nna a re: Ngwala o re: Ba lehlogonolo ke balalediwa ba monyanya wa tšeo ya Kwana. -- A iša pele a re: Mantšu ao ke a go rereša a Modimo.
10Nna ka wela fase dinaong tša gagwe ka mo khunamela. Yena a re: O ko lese tšeo! Nna ke mohlanka boka wena le bana beno ba ba nago le bohlatse bja Jesu. Khunamela Modimo.
Gobane bohlatse bja Jesu ke Moya wa go porofeta.
11Ka bona legodimo le bulegile, gwa tšwelela pitsi e tšhweu, mme e a e nametšego, leina la gagwe ke Mmotegi, Morereši, yo e rego ge a ahlola le ge a hlabana, a ya ka toko. 12Mahlo a gagwe eke ke kgabo ya mollo; mo hlogong ya gagwe o rwele mefapahlogo e mentši; o na le leina le le ngwadilwego le le se nago wa go le tseba, ge e se yena mong. 13O apare seaparo se se thankgetšego madi; Leina la gagwe -- ke yena Lentšu la Modimo. 14O latelwa ke madira a legodimong, a ba ba nametšego pitši tše ditšhweu, ba apere mašela a bohlokwa a mašweu a se nago ditšhila. 15Molomong wa gagwe go tšwa lerumo le le bogale, la gore a otle ditšhaba ka lona, a di diše ka molamo wa tšhipi, ke yena a tlogo fotla bofotlelong bja morara wa bogale bja Modimo le wa kgalefo ya Modimo Ramaatlaohle. 16O na le leina le le ngwadilwego seaparong sa gagwe mo lethekeng la gagwe, la go re: Kgoši ya magoši, Morena wa marena.
17Ka bona Morongwa e mongwe a eme kua letšatšing, a hlaboša lentšu a bolela le manong ka moka a fofago sebakeng a re: Tlang le phuthegele monyanya o mogolo wa Modimo, 18le je dinama tša magoši, le dinama tša matona, le dinama tša bagale, le dinama tša dipitsi le tša banamedi ba tšona le dinama tša bahunologi le tša bahlanka, le tša banyane le tša bagolo!
19Ka bona sebata sela, le dikgoši tša lefase, le madira a tšona, di bokanetše go hlabana le eo a nametšego pitsi le dira tša gagwe. 20Sebata sa swarwa, gwa swarwa le Moporofeta wa maaka yola a bego a dira mehlolo pele ga sona ye a bego a timetša bao ba go swaiwa ka leswao la sebata ka yona, le bao ba go lotšha seswantšho sa sona. Ka bobedi ba lahlelwa bodibeng bja mollo o tukago tshebela; ba lahlelwa moo ba sa phela. 21Ba ba šetšego ba napa ba bolawa ka lerumo la eo a nametšego pitsi, ka lerumo lela la go tšwa molomong wa gagwe. Gomme manong ka moka a hora dinama tša bona.
