KUTOLLO 20

₁Ka bona morongwa a fofa legodimong a swere sekgonyo sa sekoti, a swere le ketane e kgolo ka seatla. ₂A swara nogakgolo, noga yela ya mehleng, e lego yena Diabolo le Sathane, a e tlema gore e fetše nywaga e sekete e tlemilwe. ₃A e lahlela sekoting, a e kgonyeletša moo, a tiiša ka seka sa leswao, gore e se hlwe e aroša ditšhaba, go be go fete nywaga e sekete. Ge yona e fetile o tlo honollwa, a fetša lebakanyana a hunologile.

₄Ka bona didulo tša bogoši; gwa dula ba ba neilwego go ahlola; ka bona meoya ya ba ba kgaotšwego dihlogo ka baka la bohlatse bja Jesu le ka baka la Lentšu la Modimo, le bao ba go se lotšhe sebata le seswantšho sa sona, ba se dumele go swaiwa ka leswao la sona diphatleng tša bona. Bona bao ka ba bona ba phedile, ba buša le Kriste nywaga e sekete. ₅Ge e le bahu ba bangwe ga ba ka ba boela ba phela, gwa ba gwa feta nywaga yeo e sekete. Yela ke yona tsogo ya pele. ₆Wa lehlogonolo, mokgethwa ke eo a nago le kabelo tsogong yeo ya pele. Lehu la bobedi go bona bao ga le na maatla. Sa bona ke go ba baperisita ba Modimo le ba Kriste; ba tlo buša le yena nywaga e sekete.

₇E tlo re ge nywaga yeo e sekete e fetile. Sathane o tlo lokollwa kgolegong ya gagwe, ₈a tlo tšwela go aroša ba ditšhaba ba mathokong a mane a lefase. Bogogo le Magogo, a ba rapa a ba iša tlhabanong, palo ya bona e le ya lešabašaba la lewatle. ₉Ba rotoga ba tla mabaleng a lefase, ba dikanetša mešaša ya bakgethwa le Motsemorategi. Ya ba gona ba welwago ke mollo wo o tšwago go Modimo legodimong, wa ba tšhuma wa ba fetša. ₁₀Mme Diabolo wa go ba fora, a lahlelwa bodibeng bja mollo le tshebela, mo go ilego sebata le moporofeta wa maaka. Ba tlo tlaišwa mosegare le bošego go iša mehleng ya neng le neng.

₁₁Ka bona sedulo se segolo sa bogoši se sešweu, se na le e a dutšego mo go sona. Ke Eo lefase le legodimo di šiago sefahlogo sa gagwe, di se hweletšwe bodulo. ₁₂Ka bona bahu ba eme pele ga Modimo, ba banyane le ba bagolo. Gwa phuthollwa mangwalo; gwa bulwa le lengwe e lego Puku ya Bophelo. Bahu ba sekišwa ka tše di ngwadilwego mangwalong, go iwa ka mediro ya bona. ₁₃Gomme lewatle la ntšha bahu ba lona; le lehu, le bodulabahu tša ntšha bahu ba go tšona. Bohle ba sekišwa go iwa ka mediro ya bona. ₁₄Lehu le bodulabahu tša lahlelwa bodibeng bja mollo. Ke lona lehu la bobedi. ₁₅Le e a sa kago a hwetšwa a ngwadilwe Pukung ya Bophelo, a lahlelwa moo bodibeng bja mollo.