Mangwalo a go ngwalelwa diphuthego
1Motseta wa phuthego ya Sarede mo ngwalele o re:
Go bolela e a nago le Meoya e šupago ya Modimo, le naledi tše šupago; o re: Mediro ya gago ke a e tseba. O na le leina la go re o a phela; gomme o hwile. 2Phakgama; O tiiše ba ba šetšego, ba ba nyakago go hwa. Gobane ke hweditše mediro ya gago e se ye e phethegilego pele ga Modimo wa ka. 3Bjale gopola ka mo o bego o fiwa, ka mo o bego o ekwa; o sware o tiiše o sokologe. Ge o sa phakgame, ke tlo tla wa lehodu; mme nako ye ke tlogo go tlela ka yona, o ka se ke wa e tseba. 4Fela, moo Sarede o sa na le maina a ba sego ba kae, ba ba sa kago ba tšhilafatša diaparo tša bona. Bona ba tlo sepela le nna ba apere bošweu, gobane go ba swanetše. 5E a fenyago o tlo apešwa diaparo tše ditšhweu; mme ina la gagwe nka se ke ka le tloša pukung ya bophelo. Ina la gagwe ke tlo le emela pele ga Tate le pele ga Barongwa ba gagwe.
6E a nago le tsebe a a kwe se Moya o se botšago diphuthego.
7Motseta wa phuthego ya Filadelefia mo ngwalele o re:
Go bolela yena Mokgethwa Morereši, e a swerego sekgonyo sa Dafida; yo e rego ge a bula, gwa se be le e a kago tswalela; yo e rego ge a tswalela, gwa se bule motho. 8O re: Mediro ya gago ke a e tseba. Bona, ke go file mojako wo o bulegilego pele ga gago, wo go sego motho e a kgonago go o tswalela; gobane maatla a o nago nao ke a manyane, wa tla wa gomarela lentšu la ka, wa se latole ina la ka. 9Tseba gore ke go nea ba phuthego ya Sathane, ba ba rego re Bajuda e se bona, e le ba maaka. O tsebe gore ke tlo ba batametša ba tla ba khunama mo naong tša gago ba tseba gore ke go ratile. 10Ka gobane o lototše lentšu la ka la go re: Kgotlelela, -- le nna ke tlo go lotola ka go hlakodiša nakong ya moleko wo o tlogo wela lešako ka moka, e le go leka ba ba agilego mo lefaseng. 11O tsebe gore ke etla. Swara o tiiše se o nago le sona, gore mphapahlogo wa gago o se tlo tšewa ke e mongwe. 12E a fenyago ke tlo mo dira kokwane Ntlongkgethwa ya Modimo wa ka; mme a ka se ke a ba a tšwa moo. Ke tlo mo swaya ka leina la Modimo wa ka le ka leina la motse wa Jerusalema o mofsa, wo o tlago o etšwa legodimong go Modimo wa ka; ke tlo mo swaya ka Leina la ka le lefsa.
13E a nago le tsebe a a kwe se Moya o se botšago dphuthego.
14Motseta wa phuthego ya Laoditšea mo ngwalele o re:
Go bolela yena Therešo, yena Hlatse ye e botegago, Morereši, yena Mothomahloloyamodimo. 15O re: Mediro ya gago ke a e tseba. Ke tseba ge o sa tonye, ge o sa fiše. E ka be e le kaone ge o tonya, goba o fiša. 16Bjale, ka ge o le yo bololo fela, o sa fiše le ge e le go tonya, ke tlo go tshwa molomong waka. 17Gobane o re: Ke mohumi, ke ruile! Ga ke hloke selo! -- mme ga o tsebe ge o le yo madimabe, ge o nyamiša, ge o le modiitšana, ge o le sefofu, ge o hlobotše. 18Ke go eletša ke re: Reka go nna gauta ye e tšwago meubeng o hume; o reke le aparo tše ditšhweu o apare, gore hlong tša gago di se bonwe; o reke sehlare sa go tlotša mahlo ago, o tle o bone. 19Nna ba ke ba ratago ke a ba sola, ke a ba etetša. Phafoga ge o sokologe. 20O tsebe gore ke eme mojako, ke a opaopa. Ge motho a ekwa lentšu la ka a bula mojako, ke tlo tsena go yena ka lalela nae, yena a lalela le nna. 21E a fenyago ke tlo mo dudiša le nna sedulong sa ka sa bogoši, bjalo ka ge nna ke fentše ka dula le Tate sedulong sa gagwe sa bogoši.
22E a nago le tsebe a a kwe se Moya o se botšago diphuthego.
