KUTOLLO 9

₁Morongwa wa bohlano a letša phalafala; mme ka bona naledi ya magodimong e wetše lefaseng, ya newa sekgonyo sa legaga le le išago sekoting. ₂Ya bula legaga leo la go iša sekoting, mme gwa rotoga mokubego wa mollo o mogolo; letšatši le sebaka sa godimo tša fifatšwa ke muši wa sekoting. ₃Mušing woo gwa tšwa ditšie, tša wela lefase di neilwe maatla a e kego ke a diphepheng tša lefaseng. ₄Ditšie tša botšwa gore di se ke tša senya bjang bja naga, le ge e le tše tala, le ge e le dihlare; di hlokofatše batho bao ba se nago leswao la Modimo mo diphatleng tša bona. ₅Tša laelwa gore di se ke tša ba bolaya, di ba hlokofatše kgwedi tše tlhano. Gomme bohloko bja tšona bja swana le bja phepheng ge e lomile motho. ₆Mehleng yeo batho, lehu ba tlo le nyaka ba se le hwetše; ba tlo lla go hwa, mme lehu le tlo ba tšhaba.

₇Gomme sebopego sa ditšie tšeo se swana le sa dipitsi tše di hlamilwego ka tša ntwa; dihlogong tša tšona e ka di rwele mefapahlogo ya gauta; difahlogo tša tšona di swana le difahlogo tša batho. ₈Di na le moriri o swanago le boditsi; mme meno a tšona a bjalo ka a ditau. ₉Di phema dihuba ka dimphaphathi e kego ke tša tshipi; mme modumo wa diphego tša tšona e ke modumo wa makoloi a dipitsi tše di ntši ge a kganyelela go hlabana. ₁₀Di na le mesela e kego ke ya diphepheng e na le mabola; mme maatla a go hlokofatša batho kgwedi tše tlhano a mo meseleng ya tšona. ₁₁Di ba le kgoši ya go buša, ke Morongwa wa sekoting. Leina la gagwe ka Sehebere ke Abadoni, ka Segagešo ke Mosenyaki.

₁₂Tša “Jo” ya pele di fedile; tsebang gore go se tla tša “Joo” tše dingwe tše pedi.

₁₃Morongwa wa go selela a letša phalafala, ka kwa lentšu le le tšwago dinakeng tše nne tša aletare ya gauta e lego pele ga Modimo. ₁₄Lentšu leo la bolela le Morongwa wa go selela e a swerego phalafala, la re: Hunolla Barongwa ba bane bao ke ba tlemilego nokeng e kgolo ya Eforate. ₁₅Barongwa ba bane bao ba hunollwa; ba be ba itokišeditše nako ya letšatši le kgwedi ya ngwaga, lebaka la gore ba bolaye karolo ya boraro ya batho. ₁₆Palo ya dira tša banamedi ba dipitsi e be e le diketekete tše makgolo a mabedi; palo yeo ya bona ke e kwile. ₁₇Mo ponong dipitsi tšeo ke di bone ka mokgwa wo, di na le banamedi ba tšona ba nago le diphemo tša dihuba tša mmala wa mollo, le o motala, le o mosehla. Dihlogo tša dipitsi di swana le tša ditau; mo maganong a tšona go tšwa mollo le muši le tshebela. ₁₈Ka kotlo tše tharo tše gwa bolawa karolo ya boraro ya batho ka mollo le ka muši le ka tshebela e tšwago maganong a tšona. ₁₉Gobane maatla a dipitsi tšeo a maganong a tšona le meseleng ya tšona; gobane mesela ya tšona e bjalo ka dinoga, e na le dihlogo tša go hlokofatša ka tšona.

₂₀Gomme batho ba ba šaletšego, ba ba sa kago ba bolawa dikotlong tšeo, ga ba ka ba sokologa ba lahla mediro ya diatla tša bona, ga ba ka ba lesa go khunamela meoya e mebe le medimo ya diswantšho tša gauta le tša silifera le tša tshipi le tša mabje le tša kwata, medimo yeo e sa kgonego go bona, le go kwa, le go sepela. ₂₁Ga ba ka ba sokologa ba lahla dipolao le boloi le bootswa le bohodu.