Leago. Botho. Paulo o rata go etela ba Roma le ba Sepania
1Gomme sa rena ba re tiilego, ke gore re kgotlelele mefokolo ya ba ba sa tiago, re lese go ithata. 2Mang le mang a kgahle ngwanabo ka go thakga le ka go mo agiša. 3Gobane Kriste le yena ga a ka a ithata, bjalo ka ge go ngwadilwe gwa thwe: Ke wetšwe ke kgobogo ya ba go kgobago. 4Gobane tše di ngwadilwego kgale, di ngwaletšwe go ruta rena, gore re hwetše kholofelo ka go tiišwa le ka go homotšwa ka ona mangwalo. 5Gomme Modimo, yena mong wa tiišo le khomotšo, lena ka moka a le fe kgopolo e tee ya go amana le Kriste Jesu. 6Gore Modimo Tatago mong a rena Jesu Kriste le mo rete ka bopelotee le ka molomo o tee.
7Ke gona amogelanang bjalo ka ge yena Kriste a le amogetše, e be gona go leboga Modimo. 8Gomme nna ke re: Jesu Kriste o tlile a direla ba lebollo ka baka la therešo ya Modimo, gore a phethe tše botatawešo ba di holofedišitswego. 9Le bantle a ba leboge Modimo ge ba bona kgaugelo, bjalo ka ge go ngwadilwe gwa thwe: Ke tšona ke go lebogago tšona ke le gare ga ditšhaba; wena Morena, ke tlotla leina la gago. 10Mo gongwe gwa thwe: Hee lena ditšhaba! Hlalalang le tšhaba sa gagwe. 11Gwa buša gwa thwe: Retang Morena, lena ditšhaba tšohle! Mo tumišeng lena merafo yohle. 12Jesaya a tla a re: Mehleng lehlogedi la modu wa Isai le tlogo tsengwa sefoka sa ditšhaba, le tlo nyakwa ke bantle.
13Gomme yena Modimo wa kholofelo ye a a le tlatše lethabomoka le khutšomoka ka yona tumelo, le be ba kholofelokgolo ka maatla a Moyamokgethwa.
14Bana bešo, gomme nna ke kgodilwe bakeng sa lena gore le lena le tletše botho, le go lena go atile tsebo yohle, ya gore le kgone go eletšana. 15Le ge go le bjalo ke ithapile ka le ngwalela ka le kgothatša ka tše dingwe, ka ge e le yona neo ye Modimo a ntsheditšego ka yona. 16Gore ke be motseta wa Jesu Kriste mo go bantle, gore ke be mphamodimo wa Ebangedi ya Modimo, gore bantle e be sedimo se se kgahlago Modimo, se se kgethegilego ka Moyamokgethwa. 17Ke sona sereto sa ka ke le wa Kriste Jesu mo go tše tša Modimo. 18Gobane nka se ke ka ba ka leka go bolela tše šele, ge e se tše Kriste a di dirilego ka nna ka thuto le ka tiro gore bantle ba tle ba bušwe ke Kriste; 19O di dirile ka thuto le ka tiro, ka maatla a dika tša bohlatse le ka mehlolo le ka maatla a Moya, ka ba ka enetša Ebangedi ya Kriste go tloga Jerusalema le tikologong ya gona go fihla kua Iliria. 20Ka tsefelwa ke go iša Ebangedi mo go sešogo gwa bolelwa tša Kriste, gore ke se tle ka aga mo go theilego e mongwe; 21ka re go ye ka lengwalo le le rego: Ba tlo bona tše ba sešogo ba di botšwa; ba tlo lemoga tše ba sešogo ba di kwa.
22Ke tšona tše di nthibetšego gantši ge ke re ke tla go lena. 23Bjale gomme ga ke sa na sebaka dinageng tšeno; e šetše e le nywaga e mentši ke hlologetšwe go tla go lena. 24Ke holofela gore mohla ke tlogo swara leeto la go ya Sepania ke tlo feta ka ga geno ka le bona, la tlo mphelegetša ge ke fetela gona kua, ke thomile go kwa bose bja go ba le lena lebakanyana. 25Ge e le bjale ke sa ya Jerusalema ka go direla bakgethwa. 26Gobane ba Matsedonia le ba Akaya ba kgahlilwe ke go kgobela dimphonyana tša go abelwa bakgethwa ba bahumanegi ba Jerusalema. 27Go ba kgahlile; le gona go ba swanetše; gobane ge ba Jerusalema ba hlalletše bantle tša moya, go swanetše ge ba thuša ba Jerusalema ka tša mmele. 28E tla re ge ke phethile modiro woo, ke ba digetše matšo ao, ke tlo wela tsela ya go tla go lena ka fetela Sepania. 29Ke tseba gore mohla ke tlago go lena, ke tla ba ke humišitšwe ke ditšhegofatšo tša Kriste.
30Gomme lena bana bešo, ke le rapela ka Mong a rena Jesu Kriste le ka lerato la Moya, gore le ntlhabanele ka go nthapelela go Modimo. 31Le nthapelele gore ke se wele diatleng tša ba ba sa dumelego ba kua nageng ya Juda, gore thušo ye ke e išago kua Jerusalema e tle e thabiše ba bakgethwa. 32Ke kgone go tla go lena, ge Modimo a rata, ke tle ke lapologe ke na le lena. 33A Modimo wa molao a be le lena. Amene.
