BAROMA 6

₁Re ka reng bjale? A re ka fo gomarela sebe, gore kgaugelo e be e tletšego? ₂A go se be bjalo! Rena ba re hwilego ka thoko ya dibe, re sa tlo phela bjang sebeng? ₃A ga le tsebe gobane bohle ba re kolobeleditšwego Kriste, re kolobeleditšwe lehu la gagwe? ₄Gomme re fihlilwe le yena lebitleng ka go kolobetšwa lehung la gagwe, gore, boka Kriste ge a tsošitšwe bahung ka letago la Tatagwe, le rena re phele bophelo e le bjo bofsa.

₅Gobane ge re hlomagane nae ka go swana nae lehung la gagwe, gona re tlo hlomagana nae ka go swana nae le tsogong ya gagwe, ₆Ka ge re tseba gore mothomotala wa rena o bapotšwe le yena sefapanong, ya ba go fediša mmele wa sebe, gore re se hlwe re hlankela sona sebe. ₇Gobane e a hwilego, o hunolotswe sebeng. ₈Ge re hwile le Kriste, re dumetše gore le go phela re tlo phela le yena. ₉Gobane re ba ba tsebago, gore Kriste Motsogabahung ga a sa hwa, lehu ga le sa mmuša. ₁₀Ge a ehwa, ke gatee mola a hwela dibe; ge a phela, o phelela Modimo. ₁₁Le lena, thoko ya dibe le itire bahu; le phelele Modimo ka Jesu Kriste Mong a rena.

₁₂Bjale mebeleng ya lena ya go hwa, bobe bo se hlwe bo buša le laolwa ke dikganyogo tša mmele. ₁₃Le gona le se ke la gafela ditho tša lena sebeng, ya ba marumo a bokgopo. Ineeleng Modimo, le le batsogalehung, le phela, ditho tša lena le di gafetše Modimo ya ba marumo a toko. ₁₄Gobane sebe se ka se le laole, ka ge Le se ba go bušwa ke Molao, le bušwa ke kgaugelo.

₁₅Bjale go bjang? A re tla fo dira sebe ka ge re sa bušwe ke Molao, re le ba go bušwa ke kgaugelo? A go se be bjalo. ₁₆A ga le tsebe gore yo le ineelago yena la mo kwa, le balata ba yenaeo le mo kwago. Le ka ba balata ba sebe, mme sa le iša lehung. Le ka ba ba go kwa Modimo, mme la išwa tokong. ₁₇Modimo a a lebogwe, ge lena le bego le le balata, le le ba ba kwago ka dipelo mohuta wo wa thuto ye Modimo a le gafetšego go yona, ₁₈le ba ba hunolotšwego sebeng; le balata ba toko. ₁₉Ke bolela ka mokgwa wa batho ka go bona phokolo ya nama ya lena; ke re: Bjalo ka ge le be le neetše ditho tša lena go hlankela ditšhila le bokgopo la ya nabjo, bjalo neelang ditho tša lena go hlankela toko le kgethego.

₂₀Mola le sa le bahlanka ba sebe, le be le se balata ba toko. ₂₁Mehleng yeo gomme dienywa tša lena e be e le dife? E be e le tšeo bjale le lewago ke dihlong ka tšona; gobane pheletšo ya tšona ke lehu. ₂₂Bjale gomme ge le hunologile sebeng, le le balata ba Modimo, la na le dienywa tša lena tše di išago kgethegong; mme pheletšo ya tšona ke bophelo bjo bo sa felego. ₂₃Gobane moputso wa sebe ke lehu; mme neo ya kgaugelo ya Modimo ke bophelo bjo bo sa felego ka Jesu Kriste mong a rena.