Khunologo Molaong. Ntwa ya moya le nama
1Bana bešo! Ke botšiša lena ba le tsebago Molao ke re: A ga le tsebe gore Molao o buša motho mehleng ya ge a sa phela? 2Le mosadi e a tšerwego o tlemagantšwe le monna ka molao mehleng ya ge monna a sa phela. Ge monna a hwile, mosadi o hunologa molaong wa monna. 3Ge a ka ba wa monna e mongwe mola monna wa gagwe a sa phela, gona ba tlo re ke seotswa. Ge monna wa gagwe a hwile, gona o hunologa molaong woo, a se be seotswa ge a ka ba wa monna e mongwe. 4Le lena, bana bešo, Molao le o hwetše ka mmele wa Kriste, gore le tle le be ba yo mongwe, ba Eo a tsošitšwego bahung, gore re enyetše Modimo dienywa. 5Gobane mola re sa le nameng, mehlako ya dibe e bego e tsošwa ke Molao, e be e dira dithong tša rena, ra enyetša lehu dienywa. 6Gomme bjalo re hunologile Molaong ka go hwela tše di bego di re tlemile, ra tsebo dira re le ba bafsa ka Moya, re tlogile botala bja go ya le tlhaka ya lengwalo.
7Re reng bjalo? A Molao ke sebe? Ga go bjalo. Fela, sebe nka be ke sa se lemoge ge e se ka Molao; nka be ke sa tsebe se kganyogo e lego sona, ge Molao o ka be o se re: O se ke wa kganyoga. 8Sebe se tla se nthumole ka Molao, sa tsoša dikganyogo tšohle mo go nna. Ge go se Molao, sebe ga se phele. 9Nna nkile ka iphelela go se Molao; mohla go etla taelo ya Molao, ya ba go tsoša sebe sa phela, nna ka ba wa go hwa; 10Ka hwetša Molao wa go thwe o nkiše bophelong, e le wona o nkišago lehung. 11Sebe sa nthumola ka Molao, sa mphora, sa mpolaya ka wona.
12Gwa ba bjalo, Molao e le o mokgethwa, le taelo e le e kgethwa, e lokile, e le e botse. 13A ke go re tše botse di mphetogetše lehu? Ga go bjalo. -- E be e le gore sebe se bonale e le sebe ruri ge se ntlholela lehu ka se botse, gore ka yona taelo sebe se befe wa go befa.
14Molao re tseba ge e le wa Moya; gomme nna ke wa nama; ke lethopša la go bušwa ke sebe. 15Se ke se dirago ga ke sa se tseba; gobane se ke se ratago ga ke se dire; ke dira se ke se hloilego. 16Bjale tše ke di dirago ke sa di rate, ke dumela Molao gore ke o botse. 17Gomme ga e sa le nna ke di dirago, ke sebe se se agilego mo go nna. 18Gobane mo go nna, ke ra nameng ya ka, ke tseba gore ga go dule se botse. Se se lego gona ke go rata; go dira botse gona go a hlaya. 19Ga ke dire botse bjo ke bo ratago; ke dira bobe bjo ke sa bo ratego. 20Gomme ge ke dira se ke sa se ratego, gona ga e sa hlwe e le nna ke se dirago, ke sona sebe se se agilego mo go nna.
21Molao ke o hwetšago mo go nna šo: Nna, mola ke rata go dira tše botse, ke gomarelwa ke bobe. 22Gobane ka thoko ya motho wa teng ke thabela Molao wa Modimo. 23Gomme mo dithong tša ka ke bona molao o šele e lwantšhago le molao wa pelo ya ka, wa nthopa wa mpušiša molao wa sebe o lego dithong tša ka. 24Joo, nnaa motho wa madimabe! Ke mang a tlogo nkhunolla ka tloga mmele wo wa lehu! 25Ke leboga Modimo ka Jesu Kriste mong a rena.
Ke nna e! Ka pelo ya ka ke hlankela Molao wa Modimo; ka nama ya ka ke hlankela molao wa sebe.
