SEFELA SA DIFELA 5

₁Ke tlile tšhemong ya ka, kgaetšedi ya ka mmeeletšwa! Ke kga maroke le diorelo tša ka; ke ja lemapo la dinose tša ka; ke nwa morara wa ka le lebese la ka. Hee lena ba gešo! Nwang le thabe, le baratwa ba ka.

₂Nna ke robetše, pelo ya ka yona e phafogile. Ke kwa moratwa wa ka ge a opaopa.

Mpulele, kgaetšedi ya ka, moratwa wa ka, leebana la ka, mosekegi wa ka! Ka gobane hlogo ya ka e wetšwe ke phoka, meriri ya ka e tletše marotha a bošego.

₃Ke apotše kobo ya ka; nka boela ke apara bjang? Maoto ke šetše ke hlapile; nka boela ke a tšhilafatša bjang?

₄Moratwa wa ka a gomiša atla sagwe lešobeng; pelo ya ka ya mo gaugela.

₅Ka tsoga, ka re ke mmulele, yena moratwa wa ka; mme diatla tša ka di rotha ditlolo, di elela menwaneng, di rothela mpheko wa sefero.

₆Ke re ke mmulele, yena moratwa wa ka, ka hwetša a se gona a fulere. Mola a sa bolela, pelo ya ka e be e tšhogile. Ka mo nyaka, ka se mmone; ka mmitša, a se nkarabe.

₇Ka hwetšwa ke baleti ba go sepela le motse, ba ntia ba nkgobatša, ba nkamoga lešira la ka, bona baleti ba merako.

₈Hee lena barwedi ba Jerusalema! Ke a le eniša ke re: Ge le ka mo hwetša, yena moratwa wa ka, le tla reng? Le re: Ke molwetši ka lerato.

₉Se moratwa wago a phalago baratwa ba bangwe ka sona naa ke eng? Wena yo botsana go basadi! Se moratwa wago a phalago ba bangwe ka sona naa ke eng, ge o re eniša?

₁₀Moratwa wa ka o tagile mme o galogile; ke e mogolo mo go ba diketekete.

₁₁Hlogo ya gagwe ke tshipi e khwibidu ya paala; meriri ke malepelepe, ya boso bja legukubu.

₁₂Mahlo agwe a etša maebana dinokeng tša meetse; a hlapilwe ka lebese; ke talama nganganeng.

₁₃Thama tšago ke rapana tša maroke a monate, tšhengwana ya merediorelo; melomo ya gagwe e etša matšoba a go rotha todi e elago.

₁₄Matsogo a gagwe, maseka tshipi e khwibidu, a go gongwa ka dipheta. Mmele wa gagwe ke naka la tlou le le setilwego la manegwa ka matsaka.

₁₅Maoto a gagwe, kokwane tša lebjelešweu, di ema ka nao tša tshipi e khwibidu. Sebopego sa gagwe ke sa Libanoni, bothakga bja hlare tša merokwana.

₁₆Ganong ga gagwe ke ga menate, ke morategi wa paala. Moratwa wa ka ke yo bjalo. Ke yena moratwa wa ka, lena barwedi ba Jerusalema.