TITO 2

₁Gomme wena bolela tše di amanago le thuto ye e phedilego. ₂Banna ba bagolo o ba eletše gore ba hlwe ba phafogile, e be ba bokwala le ba tlhaologanyo, le ba ba phedilego tumelong, e le ba lerato le go se fele pelo. ₃Le basadi ba bagolo e be ba babjalo, ba sware ka tsela ya ba bakgethwa. E se ke ya ba baphari, le ba go bušwa ke sebela; a e be baruti ba bothakga. ₄Ba rute bafsa bokwala; ba rate bana ba bona. ₅E be ba bokwala bailabowatla, balotodi ba malapa a bona, gore lentšu la Modimo le se gobošwe.

₆Le banna ba bafsa o ba eletše ka mokgwa woo, ba ithute bokwala. ₇Gomme wena, mediro e botse yohle ba e bone e le mo go wena, thuto ya gago e sa iše thoko, e le ya bonatla. ₈Thuto e be ye e phedilego, ye e sa ganetšegego, gore e a sa emego le rena a lewe ke maseme, a hloke sebe se a kago re bolela ka sona.

₉Bahlanka a ba ipoetše ba kwe beng ba bona; e be ba ba kgahlišago dilong tšohle; ba se ke ba nganga. ₁₀Ba se ke ba tšitlanya thoto; ba bonatše bolo ka go botega gohle; e be gona go thakga thuto ya Modimo Mophološi wa rena.

₁₁Go bonagetše kgaugelo ya Modimo ya go phološa batho bohle. ₁₂Ke yona e re rutago go lahla go nyatša Modimo, go lahla dikganyogo tša lefase; gore mehleng yeno re phele re eletšegile, re loka, re na le borapedi, ₁₃re dula re lebeletše mahlogonolo a re a holofetšego, le go bonala ga Modimo o mogolo le Mophološi wa rena Jesu Kriste. ₁₄Ke yena a ikgafilego ka baka la rena, gore a re lopolle bokgopong ka moka, a ithuele setšhaba sa diroto medirong e botse.

₁₅Bolela o realo, o eletše, o kgothatše ka setia sa ruri. Go se ke gwa ba le e a go nyatšago.