TITO 3

₁Ba eletše gore e be ba go bušwa ke marena le mmušo, e be batho ba ba kwago, le ba ba itokišeditšego go dira tše botse tšohle. ₂Ba se be le maroga, e se be ba dintwa; e be ba botho; batho bohle ba ba bone e le ba bonolo bjo bo tletšego. ₃Gobane le rena kgale re be re le mašilo, re le batho ba ba sa kwego, re timetše re gogwa ke dikganyogo le mathabo a mehutahuta, re keka le bobe le mona, re le ba go hloiwa le gona re hloyane. ₄Gwa tla gwa bonala lerato la Modimo Mophološi wa rena, lerato la go rata batho. ₅A tla a re phološa, e se ka baka le mediro ya rena ya toko. O re phološitše ka kgaugelo ya gagwe ka tlhatšo ya go tswalwa la bobedi, le ka mpshafatšo ya ka Moya o mokgethwa, ₆wo a o tšhetšego godimo ga rena wa go re humiša ka Jesu Kriste Mophološi wa rena; ₇gore ge re lokafaditšwe ka kgaugelo ya gagwe, re tle re be baji ba bohwa bja bophelo bjo bo sa felego ka kholofelo.

₈Taba ye e tiile; gomme ke rata gore o tiiše thuto ya yona, gore ba ba dumetšego Modimo ba phegelele mediro e botse. Ke bjona botse bjoo, le go hola batho. ₉Ge e le diphetolano tša bošilo, le go hlatlamanya meloko, le dikgang, le diphapang ka baka la Molao, di fularele; ga di hole selo; ke tša lefela. ₁₀Motho wa thuto ye e arogilego, ge a eleditšwe gatee le gabedi, o mo tlogele. ₁₁Motho yo bjale o hlanogile a tseba se a se dirago; gomme o senya a ipona molato yena mong.

₁₂E tlo re ge ke roma Aretema a tla go wena, le ge e le Tigiko, o se ke wa diega go tla go nna Nikopoli; gobane ge ke nagana ke re marega ke tlo dula gona. ₁₃Tsenase moruti wa Molao, le Apollo, o ba thuše gabotse ka mefago, gore ba se ke ba hloka selo. ₁₄Le ba gešo a ba tlwaele go phegelela mediro e botse, go thuša mo go sa ratego ge go hlaela; gore ba se tlo etša sehlare se se se nago dienywa.

₁₅Bohle ba ba nago le nna ba a go dumediša. Dumediša ba ba re ratago e le ba tumelo.

-- Kgaugelo a e be le lena ka moka. Amene.