SAKARIA 5

₁Ka buša ka lebelela ka bona lengwalo le fofa. ₂A mpotšiša a re: O bonang? Nna ka re: Ke bona lengwalo le fofa; botelele bja lona ke meelo e masome a mabedi, bophara ke meelo e lesome.

₃Yena a re: Ke mahlolakotsi a hlagetšego lefase ka moka; ka gobane mang le mang e a utswago, o tlo gogolwa ka mo go ngwadilwego ka thoko yeno; le mang le mang e a fogo ena, o tlo gogolwa ka mo go ngwadilwego ka thoko e nngwe. ₄Lengwalo le ke le romile, -- o realo Morena wa mašaba -- gore le fihle ngwakong wa e a utswago, le ngwakong wa e a fogo ena maaka ka leina la ka, gore le dule gona moo ngwakong, le senye dikota tša wona le maboto a wona.

₅Morongwa yola a bego a bolela le nna, a tšwelela a re: Lebelela, o bone se se tlogo tšwelela.

₆Nna ka re: Ke eng? Yena a re: Se se tšwelelago ke seroto. Yena a re: Ke tšona dibe tša ba lefase ka moka.

₇Ka bona go khurumologa sekhurumelo sa morodu, gwa bonala mo serotong go na le mosadi.

₈Morongwa a re: Ke bona bobe! A mo lahlela serotong; a se khurumela ka sekhurumelo sa morodu. ₉Ka re ke sa lebeletše, gwa napa gwa tšwelela basadi ba babedi; moya wa ba phurolla diphego. Ba be ba na le diphego tše di kago tša tlhame; ba tloga le seroto seo ba le sebakeng.

₁₀Nna ka botšiša Morongwa yola a bego a bolela le nna ka re: Ba se iša kae, seroto seo?

₁₁Yena a re: Ba yo mo agela ngwako kua Sineara; e tlo re ge o fedile, ba mo dudiša gona mo a agetšwego gona.