UBhen-Hadadi usahlela iSamariya
1UBhen-Hadadi ikosi yama-Aramu wahlanganisa loke ibutho lakhe. Wakhuphuka aphekelelwa makhosi amatjhumi amathathu nambili akhamba ngeenjomani kanye neenkarana. Bavimbezela iSamariya ngokuthoma ipi. 2Wathumela iinthunywa ngedorobheni ku-Arhabi ikosi yakwa-Israyeli wathi: “Nakhu okutjhiwo nguBhen-Hadadi, 3‘Isiliva negolide lakho kungekwami, iintandokazi ezibafazi bakho kanye nabantwabakho, ngebami.’ ”
4Ikosi yakwa-Israyeli yaphendula yathi: “Ndabezitha, sekunjengombana ikosami isitjho. Mina nakho koke enginakho singebakho.”
5Iinthunywa zabuya godu zathi: “Nakhu okutjhiwo nguBhen-Hadadi, ‘Namhlanje ngithumele umlayezo bonyana kulandwe isiliva negolide lakho kanye nabafazi bakho nabantwabakho. 6Kodwana kusasa ngeenkhathezi ngizokuthumela iinkhulu zami bonyana zizokubhenyegula isigodlo sakho kanye nezindlu zeenkhulu zakho. Zizakuhlwitha yoke into eligugu kuwe zimuke nayo.’ ”
7Ikosi yakwa-Israyeli yabiza boke abaphathi benarha yathi kibo: “Nithi niyambona umrhali lo bonyana uphehla inturhu na? Ngimvumele nathi ufuna ngimnikele abafazi bami, abantwabami kanye nesiliva negolide lami. Kodwana kwanje khona sekwedlulele!”
8Abaphathi nabo boke abantu bathi ekosini: “Alale alahlile! Ungavumi!”
9Yeke ikosi yaphendula iinthunywa zakaBhen-Hadadi yathi: “Fikani nithi ekosinami, ‘Incekwakho izakwenza koke okufune ekuthomeni, kodwana lokhu osele ukufuna gadesi; uzakufumana ngifile.’ ”
Zakhamba iinthunywa zayokutjela uBhen-Hadadi umlayezo lowo. 10UBhen-Hadadi wathumela omunye umlayezo ku-Arhabi wathi: “Ngiyafunga ngithi abozimu abangikghame nange ngingalisa iSamariya ngingayiphenduli iqutjana leququ elingeze lafunjathwa ngitjho mabuthwami.”
11Ikosi yakwa-Israyeli yaphendula yathi: “Mtjeleni bonyana angazibethi isifuba ngokuhlanza ithunga ikomo ingakazali.”
12Umlayezo lo wafika kuBhen-Hadadi lokha yena namakhosi basaditjhe ngamarhalibogo ebandla, wathi ebantwini bakhe: “Hlomani!” Yeke bahloma bona basahlele idorobho.
13Qala kwafika omunye wabaphorofidi ku-Arhabi ikosi yakwa-Israyeli wathi: “Nakhu okutjhiwo nguSomnini, ‘Uyasibona isinyokotho samabuthwesi na? Ngizosinikela esandleni sakho namhlanje, uzakwazi-ke bonyana mina nginguSomnini.’ ”
14U-Arhabi wathi: “Kuzokwenziwa ngubani lokho?” Umphorofidi wathi: “Nakhu okutjhiwo nguSomnini, ‘Kuzakwenziwa ziinkhulu ezincani zabalawuli beemfunda.’ ”
Yeke wabuza wathi: “Ngubani ozokuthoma ipi leyo?”
Umphorofidi wathi: “Nguwe.”
15U-Arhabi wahlela iinkhulu ezincani zabalawuli beemfunda: Kwaba madoda amakhulu amabili namatjhumi amathathu namabili. Ngemva kwalapho wahlela woke u-Israyeli: Waba ziinkulungwana ezilikhomba. 16Baphuma phakathi kwemini ekulu lokha uBhen-Hadadi namakhosi amatjhumi amathathu nambili aqheme naye baburhiqwa ngamarhalibogo ebandla. 17Iinkhulu ezincani zabalawuli beemfunda zaphuma qangi. UBhen-Hadadi gade asabalalise iinhloli ezabuya nomlayezo othi: “Kunamadoda aphuma ngeSamariya.”
18Wathi: “Nangabe eze ngokuthula, abambeni ningawabulali. Nangabe eze ngepi nakhona abambeni ningawabulali.”
19Iinkhulu ezincani zabalawuli beemfunda zajokola zaphuma edorobheni ziqabelelwe libutho. 20Esinye nesinye isikhulu samadlha umjamelanaso phasi. Ama-Aramu abaleka, ama-Israyeli awalala eenthendeni.
UBhen-Hadadi ikosi ye-Aramu yaphunyurha ikhwelele injomani iphahlwe mabuthwayo weenjomani.
21Ikosi yakwa-Israyeli yatjhidela beyahlula iinkarana neenjomani zama-Aramu, yawalobisa khulu.
Ama-Aramu ahlela ipi ukulwa no-Israyeli godu
22Ngemva kwalapho kwafika umphorofidi ekosini yakwa-Israyeli wathi: “Khwezelela amabuthwakho, utjheje bonyana uzokuthathani uhlanganise nani ngombana ekuthomeni komnyaka ozako ikosi yama-Aramu izokusahlela godu.”
23Iinkhulu zekosi ye-Aramu zayiluleka zathi: “Abozimu babo babozimu beentaba. Kungebangelo babenamandla khulu kunathi. Kodwana nange singalwela nabo egagadwini, nakanjani singababinda. 24Yenza lokhu: Susa woke amakhosi lapha aphethe khona bese uwajamiselela ngezinye iinkhulu. 25Zakhele ibutho elifana naleliya olilobileko. Libe neenjomani neenkarana ezilingana poro nezokuthoma. Asilwe nabo egagadwini, ngalokho sizakuba namandla kunabo.”
Yavumelana nabo, yenza njengombana batjhwile.
26Ekuthomeni komnyaka olandelako uBhen-Hadadi wahlomisa ama-Aramu bonyana akhuphukele e-Afeki ukuyokulwa no-Israyeli.
27Ngesikhatheso ama-Israyeli nawo ahlonyiswa abe aphiwa nemiphako, aphuma ayokuhlangabezana nama-Aramu. Ama-Israyeli ahloma amatendawo aqalana nama-Aramu. Gade anzunzwana inga mihlanjana emibili yeembuzana ukube ama-Aramu wona azele ummango woke.
28Umuntu kaZimu wafika wathi ekosini yakwa-Israyeli: “Nakhu okutjhiwo nguSomnini, ‘Njengombana ama-Aramu adlumbana bonyana uSomnini unguzinyana weentaba ingasi wemirhoba, ngizakunikela soke isinyokotho samabuthwesi esandleni sakho, nje-ke wena uzakulemuka bonyana nginguSomnini.’ ”
29Baqeda amalanga alikhomba baqalene ngamehlo abomvu, kwathi elangeni lekhomba yatholana phezulu. Ama-Israyeli akhubaza iinkulungwana ezilikhulu zamajoni weenyawo wama-Aramu ngelanga elilodwa. 30Amanye aphunyurha abalekela e-Afeki ngedorobheni. Khonapho umthangala wedorobho wagirikela amajoni aziinkulungwana ezimatjhumi amabili nekhomba. UBhen-Hadadi wabalekela edorobheni wazifihla elawini elisemsamo.
31Iinkhulu zakhe zathi kuye: “Qala, sizwile bonyana amakhosi agade abusa indlu yakwa-Israyeli bekanesirhawu. Nambani siye ekosini yakwa-Israyeli sembethe imigodla emadininethu, sibophe neentambo eenhloko zethu. Mhlamunye ingababalela ipilwakho.”
32Bembatha imigodla emadininabo, babopha neentambo eenhloko zabo, banqomba ekosini yakwa-Israyeli bafika bathi: “Ithi incekwakho uBhen-Hadadi, ‘Ngiyakubawa, yewungibabalele.’ ”
Ikosi yakwa-Israyeli yathi: “Kanti usaphila? Musi mfowethu loyo!”
33Amadoda la athatha ikulumo le njengetshwayo elihle abe arhaba ukuyihlanganisa athi: “Iye, sitjho umfowenu uBhen-Hadadi!”
Ikosi yathi: “Khambani niyomthatha.”
Kwathi lokha uBhen-Hadadi nafikako, u-Arhabi wathi akakhwelele ekaranenakhe.
34UBhen-Hadadi wathi: “Ngizakubuyisa amadorobho ubaba awathatha kubabakho. Ungahloma iindawo zerhwebo eDamaseku njengombana nobaba enza njalo eSamariya.”
U-Arhabi wathi: “Nawulungele ukwenza lokho okutjhoko, mina ngizakutjhaphulula.”
Yeke benza isivumelwano, wamthukulula.
U-Arhabi ubonwa umlandu
35Ngokulayelwa nguSomnini omunye wabafundi bomphorofidi wathi kumkhambisanakhe: “Ngimadlha!”
Kodwana umkhambisanakhe wala.
36Yeke umfundi loyo wathi: “Ngebanga lokobana wale ukulalela uSomnini, kuzakuthi nawuqeda ukusuka kimapha, kuvele ibhubezi likurathurathule.”
Ngambala uthe bona asuke, veliyani ibhubezi lambamba lambulala.
37Umfundi wafumana omunye umuntu wathi kuye: “Akhese ungimadlhe ngiyakurabhela.”
Umuntu loyo wamumadlha-ke, wamlimaza. 38Yeke umfundi wakhamba wayokujama endleleni walindela ikosi. Wazitjhatjhanisa ngokuzitateja ngebhanditjhi esiphongweni. 39Kuthe lokha ikosi nayidlulako, umfundi wazililisa wathi: “Incekwakho yangena ekabeni yepi, yeke kwaba nomunye oza kimi nethunjwa wathi, ‘Yelusa umuntu lo. Wathi sithe, uzomkhokhela ngepilwakho, nakungasinjalo uzakubhadela amakhilogremu amatjhumi amathathu nane wesiliva.’ 40Kuthe incekwakho nayisadibadiba ngokhunye, umrhali loya walahleka.”
Ikosi yakwa-Israyeli yathi: “Naso-ke isigwebo sakho. Uzigwebe ngokwakho.”
41Khonokho umfundi wasusa ibhanditjhi ebusweni bakhe; ikosi yakwa-Israyeli yambona bonyana ngomunye wesiqhema sabaphorofidi. 42Wathi ekosini: “Nakhu okutjhiwo nguSomnini, ‘Utjhaphulule umuntu ebengiqunte bonyana afe. Nje-ke uzakufa esikhundleni sakhe, nabantu bakho bafe esikhundleni sabantu bakhe.’ ”
43Ikosi yakwa-Israyeli yabuyela esigodlweni sayo eSamariya idanile begodu igcwele ipotjwana.
