1 UTHIMOTHI 2

₁Kokuthoma ngiyabawa bona ukuncenga, ukuthandaza, ukubawela abanye nokuthokoza kwenzelwe abantu boke, ₂amakhosi nazo zoke iimphathimandla ukuze siphile kuhle nangokuthula, sikhambe ngakho koke ukwesaba uZimu nangokuhlonipheka. ₃Lokhu kuhle begodu kuyathandeka phambi kwakaZimu uMsindisi wethu, ₄othanda bona boke abantu basindiswe bebafikelele elwazini leqiniso ₅ngombana munye uZimu begodu munye umlamuli hlangana noZimu nabantu, mumuntu uKrestu Jesu; ₆owazinikela ukuze abe sihlengo sabo boke. Lokhu kwaba bufakazi esikhathini esifaneleko. ₇Ngebanga lalokho ngakhethwa bona ngibe mtjhumayeli nompostoli. Ngikhuluma iqiniso, angileyi amala, iye, ngibe mfundisi wabatjhili ngokukholwa nangeqiniso.

₈Nje-ke ngithanda bona eendaweni zoke amadoda athandaze aphakamise izandla ezicwengileko, anganalo ilaka nokuphikisana. ₉Godu ngithanda bona nabafazi bembathe kuhle nangokuhloniphekileko, kube zizambatho ezifaneleko, bazikghabise ngendlela ehloniphekako, kungabi ngeenhluthu zabo ezilukiweko namkha ngegolide namkha ngamatje aligugu nanyana ngezambatho ezibizako; ₁₀kodwana akube ngemisebenzi emihle, njengombana kufanele abafazi abathi besaba uZimu. ₁₁Umfazi akafunde ngokuthula ngakho koke ukuzithoba. ₁₂Angivumeli umfazi afundise namkha abe negunya phezu kwendoda kodwana akathule ₁₃ngombana u-Adamu wabunjwa qangi, kwalandela u-Efa; ₁₄kanti-ke godu akusuye u-Adamu owakhohliswako kodwana mfazi, waba sisephulamthetho. ₁₅Kodwana uzakusindiswa ngokubeletha, kwaphela nakube abantwanabo bahlala ekukholweni, ethandweni, ekucwengeni nangokuziphatha kuhle.