1 UTHIMOTHI 4

₁UMoya oCwengileko ukutjho ngokukhanyako bona ngamalanga wokuphela abanye bayokuhlubuka ekukholweni banake imimoya ekhohlisako neemfundiso zamadimoni. ₂Iimfundiso ezinjalo zifafazwa bazenzisi bamala abanesazelo esomeleliswe ngesimbi etjhisako. ₃Bakhandela ukuthathana begodu bathi akuzilwe ukudla okwadalwa nguZimu bona kwamukelwe ngokuthokoza ngilabo abakholwako nabalaziko iqiniso. ₄Koke okudalwe nguZimu kulungile, akukho okufanele bona kulahlwe nangabe kwamukelwa ngokuthokoza ₅ngombana vane sekucwengiswe ngelizwi lakaZimu nangomthandazo.

₆Nangabe ubeka izintwezi phambi kwabazalwana, uyokuba sisebenzi esihle sakaKrestu Jesu, esizondla ngelizwi lokukholwa nefundiso elungileko osele ukakarele kiyo. ₇Wale iinolwani ezisilapheleko zeenlukazi, kunalokho zijayeze ipilo yokwesaba uZimu ₈ngombana ukujayeza ukuthabulula umzimba kusiza kancani, kodwana ukwesaba uZimu kusiza kikho koke ngombana kunesithembiso sokuphila lokhu nalokho okuzako. ₉Ilizweli liqinisile begodu kufanele lamukelwe ngokupheleleko. ₁₀Nje-ke ngalokho sisebenza kabudisi begodu siyatjhikatjhika ngombana sibeke ithemba lethu kuZimu ophilako oMsindisi wabo boke abantu, khulukhulu labo abakholwako.

₁₁Yewuyale ngezintwezo uphele ufundise ngazo. ₁₂Akungabikhona umuntu onyaza ubutjha bakho, kodwana yiba sibonelo kabakholwako ngokukhuluma nangokuziphatha, ngethando, ngokukholwa nangepilo emsulwa. ₁₃Khuthalela ukufunda imitlolo, ukukhuthaza nokufundisa bengifike. ₁₄Ungasiliseleli isiphiwo esikuwe owasamukeliswa ngesiphorofido nangokubekwa izandla baphathi bebandla. ₁₅Khuthalela ukwenza zoke izintwezo, uzinikele kizo ukuze ukuthuthuka kwakho kubonakale kibo boke. ₁₆Uzeluse wena kanye nefundiso yakho, uphikelele ezintwenezo ngombana ngokwenza lokho uzazisindisa wena nabakuzwako.