2 IINKRONIKE 13

₁Emnyakeni wetjhumi nobunane wokubusa kwakaJerobhowamu, u-Abiya waba yikosi yakwaJuda. ₂Wabusa eJerusalema iminyaka emithathu. Unina gade kunguMikaya, indodakazi ka-Uriyeli weGibeya.

Kwaba nepi phakathi kwaka-Abiya noJerobhowamu. ₃U-Abiya waphuma nepi yeengorho zamadoda akhethiweko aziinkulungwana ezimakhulu amane. UJerobhowamu waqaba umthala phambi kwakhe ngeengorho zamadoda akhethiweko aziinkulungwana ezimakhulu abunane. ₄U-Abiya wajama phezu kwentaba yeTsemarayimu ngemibundwini yakwa-Efrayimu wathi: “Lalela lapha wena Jerobhowamu nani noke Israyeli! ₅Kghani anazi bonyana ubukhosi bakwa-Israyeli, uSomnini uZimu wakwa-Israyeli wabunikela uDavida neenzukulwana zakhe ngesivumelwano setswayi na? ₆Kodwana khonapho uJerobhowamu umsa kaNebathi waluma isandla esimphakelako; ₇abhodwe ziinrhwirirhwiri ezihlaza ezamsekela bonyana alwe noRerhobhowamu lokha nasese mncani, asathambile begodu asesebuthakathaka bona angajamelana nazo. ₈Nje-ke nicabanga bona ningajamelana nombuso kaZimu osezandleni zeenzukulwana zakaDavida ngombana nilibutho elikhulukazi nokobana nineenkunzana zegolide enizenzelwe nguJerobhowamu njengabozimu benu na? ₉Angithi niqotjhe abaphristi bakaSomnini, amadodana ka-Aroni namaLevi! Nasuka lapho nazenzela abaphristana benu nalingisa abantu beenarha ezinye! Nanyana ngubani oza kini nomhlabelo wekunzi namaqama alikhomba angazeswa bona abe mphristi wabosingazimu benwabo! ₁₀Thina-ke, uSomnini uZimu nguye onguZimethu begodu asikamhlanuki. Nabaphristi bethu abalotjha uSomnini uZimu bamadodana ka-Aroni begodu basizwa maLevi. ₁₁Njalo ekuseni nantambama baletha umhlabelo wokutjhiswa batjhise netjhwalo phambi kwakaSomnini. Babeka isikwa etafuleni elicwengisiweko bese bakhanyisa iimbani ezisezintini zegolide njalo ngantambama. Thina siphetha ilizwi lakaSomnini uZimethu. Kodwana nina nimlahlile.

₁₂“Yelelani la, uZimu umrholethu unathi. Abaphristi bakhe bazakuhlaba umkhosi weemporompita zepi ngokujamelana nani. Madoda wakwa-Israyeli, kahleni ngokulinga ukulwa noSomnini uZimu waboyihlomkhulu ngombana angeze naphumelela.”

₁₃UJerobhowamu gade asele athumele abakhokhobeli kobana bazombeleze amaJuda ngemuva ukuze kuthi lokha ibutho lakhe nalisaqalene nawo, abakhokhobeli bababhudungele ngemuva. ₁₄AmaJuda athi nakathi ajikisa iinhloko abona kunepi ebasahlela ngemuva nangaphambili. Yeke abiza uSomnini. Abaphristi bavuthela iimporompita zabo, ₁₅abantu bakwaJuda bahlaba umkhosi wepi. Kuthe basahlaba umkhosi wepi njalo, uZimu warhadla uJerobhowamu naye woke u-Israyeli phambi ko-Abiya noJuda. ₁₆Ama-Israyeli abaleka, uZimu wawanikela ezandleni zabakwaJuda. ₁₇U-Abiya nabantu bakhe bamadlha ama-Israyeli khulu kangangobana kwaba neenkulungwana ezimakhulu amahlanu zamadoda akhethiweko ezarabhalaliswa phasi. ₁₈Abantu bakwa-Israyeli bahlulwa kilelo hlandla. Abantu bakwaJuda bona bahlula ngombana bathembela kuSomnini uZimu waboyisemkhulu. ₁₉U-Abiya wagijimisa uJerobhowamu bewamthathela amadorobho alandelako: iBhethe-Eli, iJetjhana ne-Efroni kanye nemizi ewabhodileko. ₂₀UJerobhowamu azange asaba namandla ngesikhathi saka-Abiya. USomnini wamdula phasi bewahlongakala.

₂₁U-Abiya wadlondlobala ngamandla. Wathatha abafazi abalitjhumi nane, waba namadodana amatjhumi amabili nambili namadodakazi alitjhumi nesithandathu. ₂₂Ezinye izehlakalo zokubusa kwaka-Abiya, iindlela zakhe namezwakhe kutlolwe emitlolweni yomphorofidi u-Ido.