2 IINKRONIKE 2

₁USolomoni wakhupha umyalo wokwakhela uSomnini ithempeli kanye nokwakhiwa kwesigodlo sakhe. ₂Wabeka iinkulungwana ezimatjhumi alikhomba zamadoda athwala imithwalo neenkulungwana ezimatjhumi abunane zabacozi bamatje emibundwini namakhulu amatjhumi amathathu nesithandathu weenduna. _3-4USolomoni wathumela umyalezo lo kuRhiramu ikosi yeTirosi wathi: “Kwanjesi sele ngizokwakhela uSomnini uZimami ithempeli. Ngizalihlukanisela yena ngokutjhisa itjhwalo phambi kwakhe, ukubeka isikwa esibekwa etafuleni ngamalanga nangokwenza imihlabelo yokutjhiswa ekuseni nantambama, ngamaSabatha, ngokuthwasa kwenyanga nangeenkhathi zomnyanya obekwe nguSomnini uZimethu. Lokhu ngizakwenza njengombana bekumthetho wanini nanini kwa-Israyeli. Ngithumelela iingodo zomsedari njengombana wenza kubaba uDavida lokha nawumthumelela umsedari kobana akhe isigodlo azakuhlala kiso. ₅Iye, ithempeli engizolakha lizokuba likhulu ngombana uZimethu mkhulu kunabo boke abosingazimu. ₆Akakho ongakghona ukumakhela indawo yokuhlala ngombana amazulu ngitjho nezulu elingaphezu kwamazulu angeze anela kilo. Yeke angeze ngakghona ukumakhela indawo yokuhlala, engifuna ukukwenza yindawo yokutjhisa imihlabelo phambi kwakhe. ₇Ngalokho-ke ngithumelela umuntu onelwazi lokusebenza ngegolide nesiliva, ikoporo nesimbi, nangokububende, okutlerebede nokuhlaza komkayi. Godu kumele abe nekghono lokwenza umgwalogobhodlho. Akeze kwaJuda neJerusalema azokusebenza nabososino bami ababekwa ngubaba uDavida. ₈Ungithumelele iingodo zomsedari, zomsayipurusi neze-almugi ezivela eLibhanoni. Ngiyazi bonyana iinsebenzi zakho zinekghono lokugawula iingodo zeLibhanoni. Iinsebezi zami zizakusebenza nezakho ₉ukubonelela iingodo ezinengi ngombana ithempeli engizolakha kufanele libe likhulu begodu libe lihle okurarako. ₁₀Ngizakunikela iinsebenzi zakho ezibagawuli bemithi, iinkulungwana ezimatjhumi amabili zemigodla yekoroyi njengokudla, iinkulungwana ezimatjhumi amabili zemigodla yebhali, iinkulungwana ezimakhulu amane namatjhumi amane zamalitha wewayini neenkulungwana ezimakhulu amane namatjhumi amane zamalitha wamafutha we-oliva.”

₁₁URhiramu ikosi yeTirosi waphendula uSolomoni ngencwadi wathi: “Ngebanga lokobana uSomnini uZimu uthanda abantu bakhe, ukubeke waba yikosabo.”

₁₂Waragela phambili wathi: “Akudunyiswe uSomnini, uZimu wakwa-Israyeli owenza izulu nephasi! Uphe ikosi uDavida indodana ehlakaniphileko, ezele ngelwazi nokuzwisisa ezokwakhela uSomnini uZimu ithempeli beyizakhele nesigodlo. ₁₃Ngikuthumelela indoda ehlakaniphileko nezele ukuzwisisa, uRhuramu osisazi. ₁₄Yena yindodana yomfazi wakwaDani, uyise yindoda yeTirosi. Ubandulelwe ukusebenza ngegolide nangesiliva, ngekoporo nangesimbi, ngelitje nangesigodo. Godu usebenza nangamatjhila abubende, ahlaza komkayi, ayilineni natlerebede. Unekghono lokusebenza ngazo zoke iindlela zomgwalogobhodlho begodu angenza nanyana ngimuphi umtlamo okuthiwa akawenze. Uzakusebenza nabososino bakho nebekosami, uyihlo uDavida. ₁₅Ikosi ayithumele ikoroyi, ibhali namafutha we-oliva ngeenceku zayo njengombana ithembisile; ₁₆thina-ke sizakugawula zoke iingodo ozifunako eLibhanoni bese sizithayisa ngeenyanda elwandle ukufika eJopha. Ungazithatha lapho-ke uzise eJerusalema.”

₁₇USolomoni wabala zoke iinkhonzi ebegade zikwa-Israyeli (lokhu kwenzeka ngemva kokubala okwenziwa nguyise uDavida). Kwafunyanwa iinkhonzi eziziinkulungwana ezilikhulu namatjhumi amahlanu nantathu namakhulu asithandathu. ₁₈Wabeka iinkhonzi eziziinkulungwana ezimatjhumi alikhomba bonyana zithwale imithwalo. Wabeka eziziinkulungwana ezimatjhumi abunane bonyana zicoze amatje emibundwini bese kwathi iinkulungwana ezintathu namakhulu asithandathu kwaba ziinduna zakhona ezeluse bonyana kusetjenzwe.