2 IINKRONIKE 24

₁UJowatjhi gade aneminyaka elikhomba lokha naba yikosi, wabusa iminyaka ematjhumi amane eJerusalema. Ibizo lakanina gade kunguTsibiya weBheritjheba. ₂UJowatjhi wenza okulungileko phambi kwakaSomnini emihleni yoke kaJehoyada umphristi omkhulu. ₃UJehoyada wamkhethela abafazi ababili. Wabelethelwa amadodana namadodakazi.

₄Kwathi ngemva kwesikhathi kwaba sehliziyweni kaJowatjhi ukuvuselela ithempeli lakaSomnini. ₅Wabizela ndawonye abaphristi namaLevi wathi kibo: “Khambani niye emadorobheni wakwaJuda nibuthelele imali kilo loke lakwa-Israyeli malungana nokuvuselelwa kweminyaka yoke kwethempeli lakaZimakho. Rhabani ngendaba le.” Kodwana amaLevi adosa iinyawo.

₆Ngebangelo ikosi yabiza uJehoyada umphristi omkhulu yathi kuye: “Kungebanga lani ungazange ugandelele amaLevi bonyana alethe kwaJuda neJerusalema umnikelo owasungulwa nguMosi inceku kaSomnini nowanikelwa yihlangano yakwa-Israyeli ethaberinakelini lakaSomnini na?”

₇Ikosi yatjho njalo ngombana amadodana wesikhohlakali somfazesiya u-Ataliya gade agcekeze ethempelini lakaZimu abe athatha nepahla eyayihlukaniselwe ithempeli lakaSomnini ayisebenzisela ekulotjheni aboBhali.

₈Ikosi uJowatjhi yayala bonyana kwenziwe ikasi bese libekwa ngaphandle esangweni lethempeli lakaSomnini. ₉Kwamenyezelwa kwaJuda neJerusalema kobana abantu balethe kuSomnini uZimu umnikelo uMosi inceku kaZimu ayala bona ama-Israyeli awukhuphe lokha naserhalawumbeni. ₁₀Zoke iinkhulu kanye nabantu baletha iminikelwabo bathokozile, bayifaka ngekasini belazala swi. ₁₁Bekuthi njalo lokha amaLevi nabona kunemali enengi ngekasini, ayilethe kilabo abakhethwe yikosi. Nje-ke umabhalana wekosi kanye nesikhulu somphristi omkhulu bebafike balikghuthule ikasi emva kobana libuyiselwe endawenalo. Lokhu bakwenza ngemihla. Ngalokho babuthelela imali enengi. ₁₂Ikosi noJehoyada bayinikela amadoda agade enza umsebenzi wokuvuselela ithempeli lakaSomnini. Baqatjha abacozi bamatje nabafuleli, abakhandisimbi nabosodzila kobana bavuselele ithempeli lakaSomnini.

₁₃Amadoda agade aqalene nomsebenzi wokwakha gade akhuthele, ngalokho umsebenzi wokuvuselela waraga kuhle khulu ngaphasi kwelihlo lawo. Avuselela ithempeli lakaZimu laba njengekuthomeni aliqinisa. ₁₄Kwathi lokha naqedako, aletha yoke imali eseleko ekosini uJowatjhi nakuJehoyada. Yasetjenziselwa ukwakha ipahla yethempeli lakaSomnini: ipahla emalungana nokulotjha nokwenza imihlabelo yokutjhiswa, godu kwenziwa izitja nezinye iinsetjenziswa zegolide nesiliva. Imihlabelo yokutjhiswa yalethwa njalo ethempelini lakaSomnini emihleni yoke yokuphila kwakaJehoyada.

₁₅UJehoyada gade aluphele, sele iphaphela phasi. Wahlongakala aneminyaka elikhulu namatjhumi amathathu. ₁₆Wabulungwa namakhosi eMzini kaDavida ngebanga lobuhle abenzela uZimu nethempeli lakhe kwa-Israyeli.

₁₇Ngemva kokuhlongakala kwakaJehoyada, iinkhulu zakwaJuda zeza zazozirhuhlarhuhla ngekosi, yeke yazilalela. ₁₈Ngalokho abantu batjhiya ithempeli lakaSomnini uZimu waboyisemkhulu, balotjha imifanekiso yabo-Atjhera neenthombembazwa. Ngebanga lomlandwabo lowo, itukuthelo kaZimu yehlela phezu kwakwaJuda neJerusalema. ₁₉Kwala ngitjho nanyana uSomnini sele athumela abaphorofidi ebantwini kobana babasome babuyele kuye, nanyana sele babasola ngomthetho kaZimu, azange balalele. ₂₀Yeke uMoya kaZimu wehlela kuZakariya umsa kaJehoyada umphristi. Wajama phambi kwabantu wathi: “Nakhu okutjhiwo nguZimu, ‘Kubayini ningalaleli imiyalo kaSomnini? Nizase niyihlole, anizukuphumelela ngombana nanifulathela uSomnini naye uzanifulathela.’ ”

₂₁Kodwana bamakhela ubukhwebetjhana bekwathi ngokulayelwa yikosi uJowatjhi bambulala ngokumkhanda ngamatje ngesirhodlweni sethempeli lakaSomnini. ₂₂Ikosi uJowatjhi azange ikhumbule isisa uJehoyada uyise kaZakariya aba naso kiyo. Kodwana wabulala indodanakhe okwathi sele ilele phasi isifa yathi: “Inga uSomnini angakubona lokhu bese uyabuyiselela.”

₂₃Kwathi ekuthomeni komnyaka ibutho lama-Aramu laphuma bona lijamelane noJowatjhi. Lavimbezela uJuda neJerusalema belabulala zoke iinduna zamabutho. Lathumela yoke ipango ekosinalo eDamaseku. ₂₄Nanyana ibutho lama-Aramu lalize namadoda ambalwa nalizokusahlela, uSomnini uZimu wanikela ibutho elikhulu ezandleni zalo ngombana uJuda ahlubuke uSomnini uZimu waboyise.

Godu isigwebo sehlela phezu kwakaJowatjhi ₂₅ngombana lokha ama-Aramu nabuyela emuva, atjhiya uJowatjhi akhubele khulu. Iinkhulu zakhe zamakhela ubukhwebetjhana ngokubulala kwakhe indodana yakaJehoyada umphristi. Zambulalela embhedenakhe. Wahlongakala bewabulungelwa eMzini kaDavida kodwana ingasi emazindleni wamakhosi. ₂₆Labo abamakhela ubukhwebetjhana gade kunguZabadi indodana kaTjhimeyathi umAmonikazi noJehozabadi indodana kaTjhimrithi umuMowabikazi. ₂₇Umlando wamadodanakhe, iimphorofido ezinengi ngaye kanye nomlando wokuvuselelwa kwethempeli lakaZimu kutlolwe emitlolweni yencwadi yamakhosi. U-Amatsiya indodanakhe waba yikosi emva kwakhe.