Ukunikelwa kwethempeli
1Kwathi bonyana uSolomoni aqede ukuthandaza, kwehla umlilo ezulwini waqothula umhlabelo wokutjhiswa neminikelo. Iphazimulo kaSomnini yazala ithempeli. 2Abaphristi azange bakghone ukungena ngethempelini lakaSomnini ngombana lalizele iphazimulo kaSomnini.
3Lokha woke ama-Israyeli nabona kwehla umlilo nephazimulo kaSomnini yengamele ithempeli, aguqa phasi ecabazini ahloma iinhloko phasi, adumisa uSomnini athi:
“USomnini ulungile,
iye, ithando lakhe ngelanini nanini!”
4Ikosi uSolomoni nabo boke abantu benza imihlabelo phambi kwakaSomnini. 5USolomoni wenza umhlabelo weenkomo eziziinkulungwana ezimatjhumi amabili nambili nezimvu eziziinkulungwana ezilikhulu namatjhumi amabili. Ngendlela leyo yena nabo boke abantu banikela ithempeli kuZimu.
6Abaphristi bajama ngeenkhundla zabo. AmaLevi adumisa uSomnini ngengoma ethi “Iye, ithando lakhe ngelanini nanini” njengombana bekwenzeka nangeenkhathi zakaDavida. Baphekisa ingoma ngeenliliswa ezazenziwe nguDavida. Malungana nabo bekujame abaphristi bavuthela iimporompita nama-Israyeli woke ajama.
7USolomoni wahlukanisela indawo ephakathi yesirhodlo esikhulu ngaphambi kwethempeli lakaSomnini ukuze kulethwe lapho imihlabelo yokutjhiswa kanye nomhlwehlwe wemihlabelo yetjhebiswano ngombana i-aldari lekoporo alenzileko belinganeli imihlabelo yokutjhiswa, iminikelo yeenthoro nomhlwehlwe wemihlabelo.
8Ngesikhatheso uSolomoni wenza umnyanya wamalanga alikhomba. Bekuyimbedla yomnyanya; woke u-Israyeli alapho, bavela eLebo-Rhamathi ngetlhagwini ukuyokutjhayisa emlanjaneni weGibhide ngesewula. 9Elangeni lobunane benza umsebenzi. Ukunikelwa kwe-aldari kwathatha amalanga alikhomba nomnyanya wathatha amalanga alikhomba. 10Elangeni lamatjhumi amabili nantathu enyangeni yekhomba wathi abantu ababuyele emakhaya. Bagoduka bathokozile neenhliziyo zabo zincibilikile ngakho koke okuhle uSomnini uZimu akwenzele uDavida noSolomoni kanye nabantu bakhe u-Israyeli.
UZimu uziveza kuSolomoni
11Ngemva kobanyana uSolomoni sele aqede ithempeli lakaSomnini nesigodlo, waphumelela nokwenza koke ebegade kusemkhumbulwenakhe ngethempelini lakaSomnini nangesigodlo sakhe, 12uSomnini waziveza kuye ebusuku wathi: “Ngiwuzwile umthandazwakho begodu ngizikhethele indawo le kobana kube lithempeli lemihlabelo. 13Lokha nangivala amasango wezulu ukuze kungabi nezulu, ngilayele intethe bonyana idlavuze inarha namkha ngithumele izifo phakathi kwabantu bami, 14kuzakuthi abantu bami ababizwa ngebizo lami nabazithobako, bathandaze bebafune ubuso bami, baphenduke eendleleni zabo ezimbi, ngizakuzwa ngisezulwini bese ngithethelela isono sabo ngelaphe nenarhabo.
15“Yeke ukusukela nje, amehlwami azakuvuleka bese iindlebe zami zibe bukhali, ngizwe imithandazo eyenziwa endaweni le. 16Ngikhethe ithempeleli bengalihlukanisela bona ibizo lami libe kilo isiphelani. Amehlwami nehliziywami kuzakuhlala kulapho nini nanini.
17“Wena-ke, nawukhamba phambi kwami njengombana kwenza uyihlo uDavida, wenze koke engikuyala ngakho, ulonde iimiso nemithethwami, 18ngizakunzinzisa isihlalo sakho sobukhosi njengombana ngathembisa uyihlo uDavida lokha nangithi, ‘Angeze wabhalelwa kukuba nendoda engakuphathela ubukhosi kwa-Israyeli’.
19“Kodwana naningihlanukelako bese nibeba iimiso nemiyalwami engininikele yona, nidlhemadlheme ngemva kwabozinyana nibalotjhe benibakhothamele, 20ngizokuruthula u-Israyeli enarhenami engimnikele yona bengimfuthele kude nethempeli engilihlukanisele ibizo lami. Ngilenze libe sisaga nesiphoqo hlangana nabo boke abantu. 21Iye, ithempeleli lizakuba liqubi leququ. Woke umuntu odlula ngendlela uzalikhuza ababaze athi, ‘Alo, kubayini uSomnini enze into enje enarhenapha nethempelineli?’ 22Kuzakuthiwa, ‘Awa, angithi bahlanuke uSomnini uZimu waboyise owabakhupha eGibhide, badlhemadlhema ngemva kwabosingazimu, babakhothamela bebabalotjha. Ngikho uSomnini abehlisele ihlekelele engaka nje.’ ”
